AEMAWIRISAS 12
12
E Yesus mamkawi ow aojurusemfes
1Barewen. E jofay ara, e raja Herodes e wun Yesus basicim barewsi ow ajurusumefen. 2Aram tentara ipic, e Yakobus, parang basakamtiw jirmec ajirimefen. E Yakobus, Yohanes arepwec arawen. 3E Herodes e ow ajurusumef, e Yahudi ow jak akat aememfesen. Aramat ipicam inimas aporef, ar wun ow aojurusumefen. Aram Petrus ban akimomefen. Eras pokbwi aman arawen. E pokbwi juwas Bibit Opok Roti Pokbwi arawen. 4Ar Petrus akimomef masirin, e penjara cem afimimefen. Aram tentara ow enam belas ajiwar, manmok e Petrus batiw jirmec ajirimefen. E tentara ow empat ajiwar emema, ajisosa, wunam empat ajiwar emema, ajisosa, inim manmok batiw ow aererememefen. Herodesam atakam asakamtiwefen. “E Bakamsow Pokbwi acices, dor a Petrus, a ow bipu boworpor afimisimcimin.” Inim aeefen. 5Inimas ara, ow, Petrus, penjara cem aman aakamjirimapomfesen. E Yesus basicim barewsi ow nat, e Petrus, janim fak Allah aanimfesen.
6Herodes, e Petrus, ow bipu bafimisim jofay aenawefen. E iram ara, Petrus, tentara ipic jamnuk wowoc, isi aemamesefen. Bap ara, tentara ow rantai jamnuk e Petrus ajiktewfesen. Wun tentara owam, e penjara manmok batiw, e jimasappu aememfesen. 7Bare, Tuhan malaikat erasan asarimememefen. Seream e kamar aman aseremefen. E malaikatam Petrus e damwic apottewef, wunam aramat ipic ajitimefen. “Basitey. Sarima.” Inim aeefen. Bare, e ban manam ajiktewfes rantai asuruneyefen. 8E malaikat masirin, “E ase manam pok bajikapomey. E sandalam bajimomey.” Inim aeefen. Petrusam inimas cowok aemefen. E malaikat masirin, “E baju bajimomey. Oram fa asatcan.” Inim aeefen. 9Bare, Petrus e malaikat fa asoromomisefen. Ar e malaikat aemefas, pok anakat bapor opoken. Ar pok cowok desen aporef inim arawen. 10Bare, ar e sotop manmok batiw ow asan aokorsakayenfes, wunam ar e wowoc manmok batiw ow asan aokorsakayenfesen. Ar masirin, e cesennak sey jimasappu ajaremfesen. Er e kota bafis jimasap arawen. Bare, e jimasap arma amuapefen. E ow masirin, e jimasap awarimfisfesen. Aram bokotpu cowok ajarfesen. Bokotpu cowok ajarfes masirin, e malaikat e aramat ipic bakan asarimjiosefen.
11Bare, Petrus, e aemefas, umuton aporkurumef, wunam atakam aotawefen. “Tuhan, amalaikat, do bajortew jirmec ajirimef. Inimas Herodes dor bwemjurusum asan opok. Aram e malaikat e Yahudi ow aemcemenesas do bajortew, jirmec ajirimef. Dor wow inimas aporkurumamin.” Inim aeefen.
12Aramat ipic inimas aporkurumef masirin, ar Maria cem ajisosefen. E Maria, Yohanes arosowoc arawen. E Yohanes masirin, wun juwas Markus arawen. Erasan ow arke janim Allah manim bap ajarewsiapfesen. 13Petrusam e cesen jimasap, akakajumefen. Kerja bwemtam cowoc juwas Rode masirin, e jimasap bapayimtam ajisefen. 14Ar Petrus atakam jipi aporef ara, aram jak akat aememefen. Inimas ar e jimasap bapayimtam opokut arew. Aramat cowoc e cem aman akukujiwef, wunam atakam e ow aotawefen. “Petrus e jimasap awamec.” Inim aeefen. 15E ow masirin, “Or jayic ara.” Inim aefesen. Aramat cowoc nat, “Totok opok. Petrus e cesen awamec.” Inim atakam fak aotawefen. E ow masirin, “Ja amalaikat ara.” Inim aefesen. 16Petrus nat, e jimasap kaju kaju aoemefen. E ow masirin, e jimasap apayimtamfes, wunam Petrus bi aporfesen. Bare, aram junum aefesen. 17Petrusam e ow jokon bajiem ban sosin asowimefen. Wunam ar Tuhan e penjara aman atewisimefas, atakam e ow aotawefen. “Inim atakam Yakobusam, e wun Yesus mamkawi owam, mamotawey.” Inim aeefen. Petrus masirin, wun asan ajisosefen.
18Barewen. Jo apuefen. Jo apuef masirin, e tentara ow jisuwan awut ajifesen. “E Petrus wace?” Inim aefesen. 19Herodesam, Petrus bapowtew, emporef opoken. Ar masirin, e penjara manmok batiw ow aoworporef, wunam e ow bacatiw jirmec ajirimefen. Bare, e Herodes, Yudea capinmi ewjisosef, wunam kota Kaisarea ajisosefen. Aram erasan aemapawirien.
Herodes damir aafef
20Barewen. E Herodes, jokmen atakam e kota Tirus owam, e kota Sidon owam, aotawa aeefen. Aram amos pok e ow sey aseyetama ajimepen. Inimas e ow e Herodes bipu atakam mamtaw janim aanimfesen. Aram pay bwe akat arawen. Jipic juwas Blastusam aememefen. Ar e raja cem pok manmok batiwtam ipic arawen. E owam e Blastus, atakam e Herodes akac botaw, janim aanimfesen. E Blastusam inimas akat arawen.
21Bare, e Herodes e ow atakam mamtaw jofay asakamtiwefen. E jofay aenawef ara, aramat ipic e araja pakaian dinas ajimwimefen. Aram araja fa bemap asan ton aemapef, wunam atakam aotawefen. 22E ow masirin, atakam afakaytawfesen. “E atakam, asmat ipic atakam opok. Er allah ipic atakam ara.” Inim aefesen. 23Herodes nat, Allah basicim opok ara. Inimas Tuhan amalaikat, e ipic omop aafefen. Jak aman dimam e ipic anakurumefen. Bare e ipic damir aafefen.
24Barewen. Ow arke, Tuhan atakam, kawey ow aotawfesen. Ow arkeam, e atakam jen ajifesen.
25Barnabasam, Saulusam, erasan kerjaas takas aemtiwkurumfesen. Aemtiwkurumfes masirin, aram Yerusalem bakan ajiemfesen. Aram Yohanes Markus atewfesen.
Currently Selected:
AEMAWIRISAS 12: LAICNS
Highlight
Share
Copy

Want to have your highlights saved across all your devices? Sign up or sign in
LAI 1985