Zakariya 5
5
Txiwoniso txa wutxhanu ni tximwetxo: Dibhuku do puruma
1Ni to engeta kambe ni gula maso angu, ni wona, ni to wona dibhuku do puruma. 2Se ngelozi yi to ni wotisa tiya:
U wona txani kani?
Se ani ni ti khani:
No wona dibhuku di purumako, di ku ni magumi mambidi a mikono ya kulapha, ni digumi da mikono ya kuanama.
3Sekoko ngelozi yi to ni gela ku kha yona:
Atxiya njiruko txi txi no huma txitimwi ka otshe mafu; nguko ni wihi a no pa, a na tutumiswa ditikoni, madingano ni txiruko txa didhawa dimwedo; se ni wihi wule a no xambanya makuhu a na thaviswa ha ditikoni, madingano ni txiruko txa dimwani didhawa. 4Aniko txiruko txiya, ni na txi tisa, kuwomba Mkoma wa Mabutho a Tiyimbi, se ni na txi wuleta nyumbani ka dikhamba, ni nyumbani ka wule a xambanyako makuhu ngu ditina dangu; txi na zumba wusiku wothse nyumbani kwakwe, kambe txi na heta mapulango a yona, ni marigwi a kona.
Txiwoniso txa wutxhanu ni simbidi: Wamsikati mndani ka thavangu
5Se ku to huma ngelozi yile yi nga ti ti womba-womba ni nani, yi txi ta kha yona:
Guleta konkuwa maso ako, u wona ti to nji txani txi txi humako.
6Ani ni to khani: Njitxani txiya kani?
Se ngelozi yi to kha yona:
Eyo i efa yi humako. Yi to kha yona kambe: Aawa mazumbelo a votshe va ku ha mafuni.
7Se wona taku ku to guletwa txidhingizelo txo nemela ngutu, se ni wamsikati a ti khalahatshile mndani ka efa. 8Se ngelozi yi to kha yona:
Awuwa mbubihi.
Se ngelozi yi to retha wamsikati mndani ka efa, yi vhala ngu txidhingizelo txo nemela ngutu.
9Se ni to guleta maso angu ni wona, ku to huma vavasikati vambidi, ve wusa moya ngu tibhapi tawe, nguko va ti ti ni tibhapi to nga ta nyawukolwe; se va to guleta efa hagari ka mafu ni nzuma. 10Sekoko ani ni to khani ka ngelozi yi yi nga ti ti womba-womba ni nani:
Va yi yisa hayi efa yile kani?
11Se ngelozi yi to ni gela tiya:
Vo ya yi akela nyumba ditikoni ka Sinari, aha yi no gwita kuakwa, efa yi na vekwa ka wukhalo wa yona.
Currently Selected:
Zakariya 5: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
