Marku 3

Jesu ni m'thu wa dianza do khwanyela

(Matewu 12:9-14; Luka 6:6-11)

1Jesu a to tshumela e wulela disinagogani. Konemo ku ti ni m'thu wa kukhwanyela dianza. 2Se vona va ti mu wonetela ngu kulava kuziva ti to mwendo a na mu hanyisa, kufela kuve sikota ku mu mangalela. 3Jesu a to khene ka wu wa kukhwanyela dianza:

“Khukha u txi ema hawa hagari.”

4Se a txi khene kwawe:

“Ta tumelelwa ngu ditshiku da Sabbata kumaha ta tinene mwendo kumaha to biha kani? Kuponisa wutomi mwendo ku wu lovisa, kani?”

Vona va to malala. 5Ene a to rumaruma ngu maso, ngu kuhenya na a di pandisekile ngu mhaka ya kubanga ka timbilu tawe, se a txi gela m'thu wule a txi khene:

“Nawuluta dianza dako.”

Ene a to di nawuluta, se dianza dakwe di hanya. 6Ku ti ngako Vafarisi va di humile hahanze, kunukunuko va to maha txikungo ni va ka Herodha, kasi kuwona ti va no m'dayisa tona.

Jesu e hanyisa vamwani valwati

7Kambe Jesu a to khukha ni vagondiswa vakwe veya phuho, hafuhi ni digova, se dibutho da hombe da vathu ve mlondisa, va txi huma Galileya. Vamwani va kuhuma Judheya, 8ni Jerusalema, ni Idhumeya ni kheya mtxhatuko ka Jordhani, ni matikoni ka Tiro ni Sidhoni, va to gudhuka ve ta kwakwe, i di vavangi ngutu, ngu kupfa totshe ti ene a nga ti maha. 9#Wona ni ka: Mar. 4:1; Luk. 5:1-3. Se e gela vagondiswa vakwe ti to ve m'vekela ngalava, kasiku dibutho di si mu kamareti. 10Nguko a di hanyisile vathu votala, votshe va va nga ti ni wulwati, va ti ti rinza kwakwe, kufela ku mu gwesa. 11Ni mimoya ya nzambwa, ngako yi txi mu wona, yi ti ti khizama masoni kwakwe, yi huwelela yi txi kha yona:

“Awe u Mwanana wa Txizimu.”

12Kambe ene a to yi gela ngu kutsanisa ti to yi si thuki yi mu nuwela.

Jesu e sawula vapostoli va digumi ni vambidi

(Matewu 10:1-4; Luka 6:12-16)

13Se ene a to kwela mmangoni, a txi va dhana kwakwe ava a nga va lava, se vona ve tsula kwakwe. 14A to veka digumi ni vambidi ti to ve zumba nayo, ni ku va ruma kuya txhumayela; 15va di ni mtamo wa kutovela madhimoni. 16A vekile ava va digumi ni vambidi: Simoni, awu a nga raywa ditina daku i Pedro; 17ni Jakobe, mwana Zebhedhewu, ni Johani, mwanawe Jakobe; vonavo a va rayile ditina da Bhowanergesi, ati ti wombako ku “Vanana va Txingwalangwanda”; 18ni Andreya, ni Filipi, ni Bhartolomewu, ni Matewu, ni Tomasi, ni Jakobe mwana Alfewu, ni Tadhewu, ni Simoni Mukanana, 19ni Judha Iskariyoti, i ku ene wu a nga mu ningela.

Mtamo wa Jesu wo tovela madhimoni

(Matewu 12:22-32; Luka 11:14-23; 12:10)

20Jesu a to wuya m'tini, se dibutho di tshumela di ta sengeletana konaho, ahawa ka kuza ve tandeka ni kudya sakudya. 21Va ka kwawe, ngako va txi pfa toneto, va to ta ku ta mñola, nguko va ti ti kha vona: “A hambanekile msungo.” 22#Wona ni ka: Mat. 9:34; 10:25. Kambe vabhali va va nga ti relete va txi ta ngu Jerusalema, va to womba va txi kha vona:

“Ana ni Bhelzebhule, se a tovela madhimoni ngu mkoma wa madhimoni.”

23Ku ti ngako ene a di va dhani kwakwe, a to va gela ngu txifaniso a txi khene:

“Sathani a nga sikotisa kutxani kutovela Sathani kani? 24Ngako mfumo wu txi ti abanisa ngu hagari, ewo mfumo kha wu na kutsana. 25Mwaya ni wona, ngako wu txi ti abanisa ngu hagari, ewo mwaya kha wu na kutsana. 26Sathani nene, ngako a txi ti lwisa, a ti abanisile ngu hagari, kha na kutsana: Ku nava kuguma kwakwe.

27Kha ku na m'thu wu a sikotako kuwulela nyumbani ka ndena eya handa txuma txa yona, a sa thanga ngu ku yi sunga. Ngu kona a no handa nyumbani ka yona.

28Kha ditshuri na mi gela ku khani: Vanana va vathu va na divalelwa sionho sotshe ni siruko sotshe si va no si womba. 29Aniko awu a rukako Moya wo Sawuleka, txima kha na mbi divalelwa. Ana ni txionho txo mbi na magwito.”

30Jesu a wombile tiya nguko va ti ti kha vona: “Ana ni moya wa nzambwa.”

Mame wa Jesu ni vanawe

(Matewu 12:46-50; Luka 8:19-21)

31Se mame wa Jesu ni vanawe va to bwaka ve ema ngu hahanze, ve rumela ku m'dhana. 32Kambe dibutho da vathu, va ti khalahatshile ve mu ranganyeta. Se va to mu gela ku kha vona:

“Wona, mame wako ni vananu vaho hahanze kheya, va kulava.”

33Ene a va xamute a txi khene:

“Mame wangu ni vanathu, ngu vamani kani?”

34Se e wonetela va va nga ti mu randete, a txi khene:

“Wonani, mame wangu ni vanathu ngu vava. 35Nguko awu a mahako kuranda ka Txizimu, ngene i ku mwanathu ni ndiyangu ni mame wangu.”

Currently Selected:

Marku 3: BEC2016

Highlight

Copy