Marku 2

Jesu e hanyisa m'thu wa kuoma sihango

(Matewu 9:1-8; Luka 5:17-26)

1Ku ti ngako ma di pindile masiku, Jesu a to tshumela e wulela Kapernawume, se ti txi pfala ti to ene a nyumbani. 2Vathu vavangi va to kuluveta ve sengeletana konaho, ahawa koza ku txi pwateka ni wukhalo ha txikeni. Jesu a ti ti va txhumayela dipswi da Txizimu.

3Konaho a to nehwa kwakwe m'thu wa kuoma sihango, a di rwatwe ngu mune wa vathu. 4Ngako va nga txi tandeka ku mu hokisa ka Jesu, ngu mhaka ya kutala ka vathu, va to kwela va txi ya hasula lyango la nyumba yiya ene a nga ti ka yona, se va di tute ditshoko, va to mu txhikisa a di ha ditahoni hawa va nga ti mu otelisile kona. 5Jesu ngu ku ona kukholwa kwawe, a ti khene ka mlwali:

“Mwanangu, u divaletwe sionho sako.”

6Kambe vabhali vokari va ti zumbile konaho, va txi pimisa timbiluni kwawe, va txi kha vona: 7“A wombisa tiya ngu txani kani? Wa ruka. I mani a sikotako kudivalela sionho hahanze ka Txizimu kani?”

8Jesu kunukunuko a to tiziva ngu moya wakwe ati va nga txi alakanya timbiluni kwawe, se a txi va gela ku khene:

“Mi alakanyela txani toneto timbiluni kwanu kani? 9Ngu tihi ti nga hehuka kuwomba ka wu wa kuoma sihango: Ku khani, ‘sionho sako si divaletwe’, mwendo ku khani, ‘Khukha u txi teka ditaho dako u txi tsimbila kani?’ 10Se kasi mi na tiziva ti to Mwanana wa M'thu ana ni mtamo ha mafuni wa kudivalela sionho.”

A to gela wu wa kuoma sihango, a txi khene:

11“Ni khani kwako, khukha u teka ditaho dako u txi tsula m'tini kwako.”

12Ene a to khukha se kunukunuko e teka ditaho dakwe, a txi tsula, na a txi wonwa ngu votshe vathu, ahawa votshe va nga xamala ve dhumisa Txizimu va txi kha vona:

“Kha hi zivi ku ti wona to nga tiya.”

Jesu e dhana Levhi

(Matewu 9:9-13; Luka 5:27-32)

13Jesu a to engeta e khukha, a txi ya diphambo da digovani, dibutho da vathu votshe veya kwakwe, se e va gondisa. 14Ku ti ngako a txi pinda, a to wona Levhi, mwana Alfewu, a di nyumbani ka mkhupo, a txi khene kwakwe:

“Ni londise.”

Se Levhi a to khukha e mu londisa.

15Ku ti ngako Jesu a di khalahatshile kudyani, nyumbani ka Levhi, vakhupisi vavangi ni vaonhi va to ta khalahatsha kumweko ni Jesu ni vagondiswa vakwe, nguko i ti vathu vavangi va nga txi mu londisa. 16Kambe ngako vabhali va mtxawa wa Vafarisi, ve mu wona a txi dya kumweko ni vakhupisi ni vaonhi, va to kha vona ka vagondiswa vakwe:

“Nji txani a txi dya kumweko ni vakhupisi ni vaonhi kani?”

17Jesu ngako a txi tipfa eto, a to khene kwawe:

“Ava va hanyako kha va lavi ñanga, aniko yi lawa ngu va va lwalako. Ani kha na tela ku ta dhana va vo lulama, aniko ni tete vona vaonhi.”

Jesu ni mhaka ya kutitona sakudya

(Matewu 9:14-17; Luka 5:33-39)

18Vagondiswa va Johani ni Vafarisi va ti ti tona sakudya. Se ve ta ka Jesu, va txi ta kha vona kwakwe:

“Ngu kutxani vagondiswa va Johani ni Vafarisi va ti tonako sakudya, na kuve vagondiswa vako kha va ti toni, kani?”

19Se Jesu a to khene kwawe:

“Tipheleketi ta mteki, ina ti nga sikota kutitona sakudya, na mteki a di ngadi kumweko nato kani? Ka yotshe mbimo yi ti ku ngadi nayo, kha ti na kutitona sakudya. 20Aniko ma nata masiku awa ti nota tekelwa mteki, se ngu kona ti na ku ta ti tona sakudya.

21Kha ku na m'thu wu a rungako txiziva txa nguwo ya yiphya ka txyambalo txa kale, nguko txiziva txa txiphya txi nga namula nguwo ya kale, se kuvharuka ku txi engeteleka. 22Kambe kha ku na m'thu wu a thelako vhinya ya yiphya ka misava#2:22 Msava: Thavangu yo mahwa ngu didhowo da txihari. ya kale, nguko a txi maha eto, vhinya yi na vharula, se ku txi luzeka vhinya ni misava. Aniko vhinya ya yiphya yi thelwa ka misava ya yiphya.”

Jesu ni Sabbata

(Matewu 12:1-8; Luka 6:1-5)

23Ngu ditshiku da Sabbata, ngako Jesu a txi pinda ngu hagari ka tithembwe ta fulaho, vagondiswa vakwe, mbimo yi va nga txi tsimbila ngu nzila, va to khata kufunya maphumbu. 24Vafarisi va to mu gela va txi kha vona: “Hinga wona, va mahela txani ati ti si tumelelwiko kumaha ngu ditshiku da Sabbata, kani?”

25 # Wona ni ka: 1 Sam. 21:1-6. Ene a ti khene kwawe:

“Kha mi nzi kugonda tiya Dhavhidha a nga mahisa tona, mbimo yi a nga khamwa a txi pfa nzala, ene ni vale a nga ti navo kani? 26Ahawa a nga wulela nyumbani ka Txizimu, ka masiku a Abhiyatari, mphaxeli wa hombe, a txi dya mapawu a mphaxo e ninga ni vale a nga ti navo, ayawa ma nga ti fanela kudyiwa ngu vaphaxeli dwe kani?”

27Se a txi khene kwawe:

“Sabbata yi mahetwe m'thu, hi nga m'thu a nga mahelwa Sabbata. 28Ngu konaho, Mwanana wa M'thu Mkoma wa yona Sabbata kambe.”

Currently Selected:

Marku 2: BEC2016

Highlight

Copy