Marku 1

Gondo ya Johani Mubhabhatisi

(Matewu 3:1-12; Luka 3:1-18; Johani 1:19-28)

1Makhato a Evhangeli ya Jesu Kristu, Mwanana wa Txizimu.#1:1 Yimwani Mibhalo kha yi wombi ku “Mwanana wa Txizimu”.

2Nga ti ti nga bhalwa ngu mprofeti Isaya, a nga khene:

“Wona, na ruma masoni kwako mtumi wangu,

awu wu no longisa nzila yako.”

3Nga ti ti nga bhaliswa tona dibhukuni ka Mprofeti Isaya, a nga khene:

“Dipswi da wule a kwangulako txiwulani di kha dona:

‘Longisani nzila ya Mkoma, lulametani maphango akwe.’ ”

4Se ene a to tsimbila ka dotshe ditiko da Jordhani, a txi txhumayela txibhabhatiso txa kuhunduluka, kasiku ve mana divalelo ya sionho.

5Dotshe ditiko da Judheya ni votshe vathu va Jerusalema va ti ti ya kwakwe, veya bhabhatiswa votshe mnamboni ka Jordhani, va txi ti tshanza sionho sawe. 6Johani a ti ambate didhowo da dikamelu, e ti sunga txiwunu ngu libhande la didhowo, a txi dya humbi ni wulombe wa txitinga.

7A ti txhumayela a txi khene:

“Msana kwangu, wata mmwani, awu a ku ni mtamo kupinda ani, awu ani ni si nga ni fanelo hambi ya kunama masoni kwakwe ni thukunyula tingoti ta tikathula takwe. 8Ani ni mi bhabhatisa ngu mati, aniko ene a nata mi bhabhatisa ngu Moya wo Sawuleka.”

Kubhabhatiswa ka Jesu

(Matewu 3:13-17; Luka 3:21-22)

9Ka oneyo masiku, Jesu a tile ngu Nazareta ka Galileya, a ta bhabhatiswa ngu Johani, mnamboni ka Jordhani. 10Mbimo yi a nga txi huma ngu matini, a to wona nzuma yi txi tuleka, se Moya wo Sawuleka wu txi txhika nga txituvani txitimwi kwakwe. 11Ku to huma dipswi da kuta ngu nzumani, di txi kha dona:

“Awe u Mwanana wangu wo randeka ngutu, awu ni mu tsakelako.”

Kudukwa ka Jesu

(Matewu 4:1-11; Luka 4:1-13)

12Se konako Moya wo Sawuleka wu to yisa Jesu txiwulani. 13Ene a ti ya fungala mune wa magumi a masiku txiwulani, a txi dukwa ngu Sathani. A ti ti hanya hagari ka sihari sa txitinga, se tingelozi ti txi mthumela.

Jesu e khata mthumo wakwe kona Galileya

(Matewu 4:12-22; Luka 4:14-15; 5:1-11)

14Ku ti ngako Johani a di khotetwe mkorani, Jesu a to ya Galileya, eya txhumayela Evhangeli ya Txizimu, a txi khene: 15#Wona ni ka: Mat. 3:2. “Mbimo yi tatisekile, se Mfumo wa Txizimu wu hafuhi. Hundulukani mi txi kholwa ka Evhangeli!”

16Ngako a txi tsimbila hafuhi ni Linene la Galileya, a to wona Simoni ni mwanawe Andreya, va txi beta tikoka tawe lineneni, nguko i ti vadoti va sihaka. 17Jesu a to va gela a txi khene:

“Ni londiseni, ni na mi maha vadoti va vathu.”

18Kunukunuko, vona va to leka tikoka tawe, ve mu londisa.

19Se ngako a txi ya masoni, a to wona Jakobe, mwana Zebhedhewu, ni Johani, mwanawe, va di mu ngalavani, va txi rungetela tikoka tawe. 20Kunukunuko ene a to va dhana. Vona va to siya tate wawe Zebhedhewu kumweko ni sithumi mu ngalavani ve mu londisa.

M'thu wo wulelelwa ngu moya wo biha

(Luka 4:31-37)

21Se va to wulela Kapernawume. Ngu ditshiku da Sabbata, Jesu a to wulela disinagogani, a txi gondisa. 22#Wona ni ka: Mat. 7:28-29. Kambe va ti xamala ngu gondo yakwe, nguko a ti va gondisa nga wu a ku ni mtamo, asi fanani ni vabhali. 23Sekoko, a ti ti ho, kona disinagogani mule kwawe, m'thu wu a nga ti wuleletwe ngu moya wa nzambwa, awu a nga kwangula a txi khene:

24“Nji txani u ku natxo ni nathu, Jesu wa Nazareta kani? U tela ku ta hi lovisa kani? Ani na kuziva ti to ngawe mani: U Msawuleki wa Txizimu.”

25Aniko Jesu a to wu dhusa a txi khene:

“Malala, u txi huma keyo m'thu!”

26Sekoko moya wa nzambwa, msana ka ku mu zuzazuza, wu to peka huwa wu txi huma ka m'thu wule. 27Se votshe va txi diwuka ngutu, va txi wotisana va txi kha vona:

“Nji txani txiya kani? I gondo ya yiphya! Hambi mimoya ya nzambwa ene a yi dhusa ngu mtamo, yi txi mu engisa!”

28Kunukunuko nduma yakwe yi to hangalaka ka otshe makhalo a Galileya.

Jesu e hanyisa mkokati wa Pedro

(Matewu 8:14-15; Luka 4:38-39)

29Mbimo yi Jesu a nga huma ngu disinagogani, a to tsula kumweko ni Jakobe ni Johani nyumbani ka Simoni ni Andreya. 30Mkokati wa Simoni a ti otete ha ditahoni, ngu kulwala ngu txindeyandeya, se ve kuluveta ve mu wombela ka Jesu. 31Sekoko ene a to tshuketa a txi mñola ngu diwoko a txi mu wusa; txindeyandeya txi to mu leka, se ene e khata ku va thumela. 32Minovani ka kona, mbimo yi di nga swa ditambo, va to tisa ka Jesu votshe valwali ni va va nga ti ni madhimoni. 33Vathu va dotshe didhoropa va ti ta sengeletana ha txikeni. 34A hanyisile valwali va nga txi karatwa ngu mipando yo hambana, a txi tovela madhimoni amangi. Kambe asi tumeli ti to madhimoni me womba-womba, nguko ona ma ti m'ziva.

Jesu e txhumayela Evhangeli Galileya

(Luka 4:42-44)

35Ni mixo, ku di ngadi phum, a to huma nyumbani eya ka wukhalo wa ekhalela, a txi ya khongela kona. 36Kambe Simoni ni va a nga ti navo va to mu londisa. 37Mbimo yi va nga mu mana, va mgete va txi kha vona:

“Votshe va kulava.”

38Ene a to va xamula a txi khene:

“He tsuleni ka wumwani wukhalo, he tsuleni ka miti yile ya hafuhi, hi txi ya txhumayela kona, nguko ni tete toneto.”

39 # Wona ni ka: Mat. 4:23; 9:35. Ene a to tsimbila ngu dotshe da Galileya, a txi txhumayela masinagogani, a txi tovela madhimoni.

Jesu e hanyisa m'thu wa tshekela

(Matewu 8:1-4; Luka 5:12-16)

40M'thu wa tshekela a to ta kwakwe, e ta khizama a txi mkombela, a txi khene:

“Ngako u txi ti lava, u nga ni basisa.”

41Jesu, ngu kutalelwa ngu wumbilu a to nawuluta diwoko a txi m'gwesa, a txi khene kwakwe:

“Na ti lava. Basiswa.”

42Kunukunuko tshekela yi to mu leka, ene a txi sala a di basile.

43Jesu a to tekela ku mlaya ngutu, a txi mtsutisa ngu kukuluveta, 44a txi khene kwakwe: “U nga thuke u txi womba txilo ka m'thu, aniko tsula u txi ya ti kombekisa ka mphaxeli, u txi maha mningelo wa kubasiswa kwako, kota nga kuruma ka mlayo wu wu nga leletwa ngu Mosi, kasi kumaha wufakazi kwawe.” 45Kambe ene, neti a nga huma, a to khata kuhuwelela, asi malali, e hangalasa mahungu ale, se Jesu e tandeka ni kuwulela ka m'ti wuhi ni wuhi, na ti txi ziwa; aniko a ti zumbela hahanze, ekhalela, se vathu ve huma ngu ka otshe makhalo ve ta kwakwe.

Currently Selected:

Marku 1: BEC2016

Highlight

Copy