Matewu 9
9
Jesu e hanyisa m'thu wa kuoma sihango
(Marku 2:1-12; Luka 5:17-26)
1Se ngako Jesu a txi wulela ngalavani, a to tshumela e txhatuka mnambo, a txi wuya didhoropani kwawe. 2Se va to mu nehela m'thu wa kuoma sihango, a di otete ha didhandoni. Jesu a txi wona kutumela kwawe, a to khene ka m'thu wule wa kuoma sihango:
“Mwanangu, tsanisa mbilu! Sionho sako si divaletwe.”
3Konaho, vamwani vabhali va to alakanya timbiluni kwawe va txi kha vona:
“Awu m'thu wa ruka.”
4Se ngako Jesu a di woni mialakanyo yawe, a to khene:
“Njani mi pimisa kubiha timbiluni kwanu kani? 5Kasi ngu tihi ti nga hehuka: Kuwomba ku ‘sionho sako si divaletwe’ mwendo ku ‘khukha u txi tsula kani?’ 6Sekoko, ani ni na mi kombisa ti to Mwanana wa M'thu ana ni mtamo ha mafuni wa kudivalela sionho.”
Sekoko a to khene ka wu wa kuoma sihango:
“Khukha u teka m'bhedhu wako, u tsula m'tini kwako.” 7Ene a to khukha e tsula m'tini kwakwe. 8Mabutho a vathu, ngako ma txi wona tiya ma to telwa ngu kuthava, me dhumisa Txizimu atxiya txi nga ninga vathu mtamo wo maha eto.
Jesu e dhana Matewu
(Marku 2:13-17; Luka 5:27-32)
9Ngako Jesu a txi ya masoni, a to wona m'thu a nga ti dhanwa ku i Matewu, awu a nga ti khalahatshile ha wukhaloni ka kukhupisa, se a txi khene kwakwe: “Ni londise!” Se ene a to khukha e mu londisa.
10 # Wona ni ka: Luk. 15:1-2. Ahawa Jesu a nga maneka a di khalahatshile ha mezani ka sakudya, nyumbani ka Matewu, vakhupisi vavangi ni vaonhi va tile va ta khalahatsha kumweko ni Jesu ni vagondiswa vakwe. 11Vafarisi va di woni toneto, va to womba ka vagondiswa, va txi kha vona:
“Ti mahisa kutxani M'gondisi wanu e dya ni vakhupisi ni vaonhi kani?”
12Jesu a to va engisa, se e va xamula a txi khene:
“Hi nga vale va ku ni wutomi ava va lavako ñanga, aniko ngu vale va lwalako. 13Tsulani mi ya gonda ti to ti txhamusa txani ati taku: ‘Ni dhunda ngutu wumbilu kupinda timhamba!’ Nguko kha na tela ku ta dhana valulami, aniko ni tete vaonhi.”
Jesu ni kutitona sakudya
(Marku 2:18-22; Luka 5:33-39)
14Sekoko ka yoneyo mbimo, vagondiswa va Johani va to tshuketela Jesu va txi kha vona:
“Ngu kutxani athu ni Vafarisi hi ti tonako sakudya masiku o tala, na kasiko vagondiswa vako kha va ti toni, kani?”
15Jesu a ti khene kwawe:
“Tipheleketi ta wu a tekako, ina ti nga sikota kudila, na awu e tekako a di ngadi nato kani? Kambe ku nata masiku, aawa va na ku ta tekelwa mteki, se ngu kona va nota ti tona sakudya.
16Kha ku nga ni m'thu awu a rungako txiziva txa txiphya ka nguwo ya kale, nguko txiziva txiya txi nga namula nguwo, se nguwo yi txi engeteleka kuvharuka. 17Hambi vathu kha va theli vhinya ya yiphya ka misava ya kale, nguko misava yi nga vharuka, ni vhinya yi txi thekela, misava ni yona yi txi luza. Aniko vhinya ya yiphya yi thelwa misavani kakuphya; se sona ngu wumbidi wa sona si na xayiseka.”
Jesu e hanyisa wamsikati ni muhorana
(Marku 5:21-43; Luka 8:40-56)
18Ngako Jesu a txi txhumayela tiya, nganakana yokari, yi to tshuketa yi txi mu khizamela, yi txi kha yona:
Mkoma mwanana wangu wa muhorana i ngadi kwakwe kufa konakwa, kambe ngono u ta sanzeka dianza txitimwi kwakwe, kasiku a na hanya.”
19Se Jesu na a di khukhile, a to mlondisa ni vagondiswa vakwe.
20Sekoko, mmweyo wamsikati a nga ti xupheka ngu malwati a lingolengole, ngu txipimo txa digumi da malembe ni mambidi, a to mtshuketela ngu msana, e gwesa wuziva wa nguwo yakwe. 21Nguko a txi pimisa tiya mbiluni kwakwe: “Ni txi nga za ni gwesa hambi nguwo yakwe dwe, ni na hanyiswa.”
22Jesu a txi tshembereka e mu wona, a to khene kwakwe:
“Tsanisa mbilu, mwanangu, likholo lako li ku hanyisile.”
Se wamsikati a to hanyiswa ka malwati akwe ka yona yile mbimo.
23Ngako Jesu a di hokile m'tini ka nganakana yile, a di woni vaveti va titshodi ni vathu votala, va nga ti va nga diguwa da hombe ngutu, a to khene: 24“Khukhani mi tsula, nguko awu wa txihoranana kha fa, a to otela.”
Se vona va nje ku mu seka. 25Ngako a di humile, ene a to wulela e ñola mwanana wule ngu diwoko. Se awule wa txihoranana a to wuka. 26Konako, nduma ya tiya ti nga maheka, yi to hangalaka ni dotshe ditiko dile.
Jesu e hanyisa mabhofu mambidi
27Ngako Jesu a di khukhile konaho, mabhofu mambidi ma to mlondisa, ma txi kwangula ma txi khene:
“Mwanana wa Dhavhidha, hi pfele wusiwana!”
28Ngako a di hokile nyumbani, mabhofu ma to mu tshuketela. Se Jesu a txi khene kwawe:
“Ma tumela ti to ni nga sikota kumaha eto kani?”
Vona va txi kha vona kwakwe: “Ina, Mkoma!”
29Konaho a to gwesa maso awe, a txi khene:
“Ti na maheke kwanu, nga ti mi kholwisako tona.”
30Se maso awe me tuleka. Jesu a to va laya ngutu a txi khene:
“Ti woneleni ti to mhaka yiya yi si ziwi ngu m'thu ni wammweyo.”
31Aniko vona, va txi huma, va to nuwela nduma yakwe ka dotshe ditiko dile.
Kuhanyiswa ka txiduma
32Na a di humile, va to mu tisela m'thu wa txiduma, a nga ti ni didhimoni. 33Ngako didhimoni di di tovetwe, txiduma txi to womba-womba, se dibutho di to xamala, di txi kha dona:
“Txima kha ti zivi ka nga wonwa to nga tiya ka Israyeli.”
34Aniko Vafarisi va txi kha vona:
“Ene a tovela madhimoni ngu mtamo wa mkoma wa madhimoni.”
Jesu wa pfela wusiwana vathu
35 # Wona ni ka: Mat. 4:23; Mar. 1:39; Luk. 11:15. Jesu a txi tsimbilatsimbila sidhoropanani ni mikhokholani, a txi gondisa masinagogani, e txhumayela Evhangeli ya Mfumo, ni kuhanyisa vathu ka otshe malwati ni ka totshe tixaka ta mipando. 36Ngako Jesu a di woni dibutho da vathu, a to va pfela wusiwana, nguko va ti ti karate ni kurereka, nga tinvuta to mbi na m'dyisi. 37Sekoko a to womba ka vagondiswa vakwe, a txi khene:
“Kuelula nga hombe, aniko sithumi nzidotho. 38Ngu kota yeto, kombelani ka Nyamne wa kuelula, ti to e rumela sithumi kuelulani kwakwe.”
Currently Selected:
Matewu 9: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
