Matewu 8
8
Jesu e hanyisa wa tshekela
(Marku 1:40-45; Luka 5:12-16)
1Ku ti ngako Jesu a txi relela ngu mmangoni, mabutho a vathu votala ma to mu londisa. 2Sekoko a txi ta kwakwe m'thu wa tshekela,#8:2 Tshekela: Xokonho, wulwati wo wilela titiho, ni kupshwerulela makhalo okari ha mmidi. a txi mu khizamela a txi khene:
Mkoma ngako u txi ti lava, u na ni mtamo wa ku ni basisa.”
3Sekoko Jesu a to nawuluta dianza dakwe a txi mu gwesa, a txi khene:
“Na ti lava, basiswa awe.”
Kunukunuko a to basiswa ka tshekela yakwe. 4Jesu a txi khene kwakwe: “Ti wonele, u nga gele m'thu, aniko tsula u txi ya ti kombisa ka mphaxeli, u txi humisa mningelo wu wu nga emiswa ngu Mosi, kasi ku na maha wufakazi kwawe.”
Jesu e hanyisa txithumi txa mthangeli wa mroma
(Luka 7:1-10)
5Ngako Jesu a di wulete Kapernawume, nduna ya dizana yi to mtshuketela yi txi mkombela, 6yi txi kha yona:
Mkoma txithumi txangu txi otete nyumbani, txi to tsotsowolo kuoma sihango txa xaniseka ngutu.”
7Jesu a to khene kwakwe: “Ni nata ni ta mu hanyisa.”
8Aniko nduna ya dizana yi to xamula yi txi kha yona:
Mkoma kha ni fanelwi ngu ti to awe u txi wulela nyumbani kwangu, aniko womba dipswi dimwedo kugwita, se txithumi txangu txi na hanya. 9Nguko nani ni m'thu wu ni fumwako, na ni di ni masotxhwa, ni ma fumako nani, se ni txi womba ka mmweyo ni txi khani: ‘Tsula’ ene wa tsula; ni txi ka mmwani: ‘Ngono’ ene wata; ni ka txithumi txangu, ni txi khani: ‘Thuma tiya’ ene wa ti thuma.”
10Ngako Jesu a di pfite tiya, a to xamala, a txi khene ka vava va nga txi mu londisa:
“Kha dithuri, na mi gela, ni khani: Kha na mana likholo la hombe lo nga liya, hambi hagari ka va ka Israyeli. 11#Wona ni ka: Luk. 13:29. Aniko na womba kwanu, ni khani; mbavangi va nota ngu wutxani ni mswa-ditambo, va ta zumba ha sakudyani ni Abrahamu ni Isaake ni Jakobe Mfumoni ka nzumani. 12Kambe vanana va Mfumo va na tshotshwa hahanze mtemani, ahawa ku no va ni tihuwa ni kugegeresela ka makwasa.”
13Sekoko Jesu a to khene ka nduna ya dizana:
“Tsula, ti na maheke kwako, nga ti u kholwisako tona.”
Se txithumi txakwe txi to hanyiswa ngu yona yile mbimo.
Jesu e hanyisa vathu votala
(Marku 1:29-34; Luka 4:38-41)
14Se ngako Jesu a di bwakile nyumbani ka Pedro, a to ya mana mkokati wa Pedro a di otete, a txi lwala ngu txindeyandeya. 15Jesu a to mu gwesa diwoko dakwe, se txindeyandeya txi to huma, ene e wuka a txi va thumela.
16Ni minova va to neha kwakwe vavangi, ava va nga ti ni madhimoni, se ene a to ma tovela ngu dipswi dakwe, e hanyisa votshe va va nga ti lwala; 17Kasi kutatiseka ati ti nga wombwa ngu mprofeti Isaya, a txi khene:
“Ene a tekile sikarato sathu,
a txi rwala ni malwati athu.”
Vathu vokari va nga ti lavako kulondisa Jesu
(Luka 9:57-62)
18Ngako Jesu a txi wona dibutho da hombe da vathu, va nga ti mu randete, a to gela vagondiswa ti to va txi pinda va txi ya mtxhatuko ka digova. 19Se m'bhali mmweyo a to ta kwakwe, a ta khene:
“M'gondisi, hayi ni hayi u no ya kona, ni na kulondisa.”
20Jesu a ti khene kwakwe:
“Vanyapwe va ni mikele, ni sinyana sa nzuma si ni sisaka, kambe Mwanana wa M'thu kha na wukhalo wuwa a khigetako ka wona msungo wakwe.”
21Se mmwani wa vagondiswa vakwe a to khene kwakwe:
Mkoma ni tumelele ni thanga ngu kuya tshotsha tate wangu.”
22Aniko Jesu a to khene kwakwe:
“Ni londise, u txi leka vafi va txi tshotsha vafi vawe.”
Jesu e emisa txihuhuri
(Marku 4:35-41; Luka 8:22-25)
23Ngako a di wulete ngalavani, vagondiswa wakwe va to wulela ni vona ngalavani kumweko nayo. 24Se ku to dhuka ku txi huma txihuhuri txa hombe lineneni, ahawa ka kuza mavimbi ma txi lava kukhubhunyeta ngalava; aniko Jesu a ti otete. 25Vagondiswa vakwe va to mtshuketela, va txi mu wusa va txi kha vona:
Mkoma hi hulukise, ha lova.”
26Se Jesu a to khene kwawe: “Anu vathu va kukholwa ka kudotho, mi ni dizowa ngu txani kani?”
Sekoko a to khukha a txi ema, e dhusa txihuhuri ni linene; ngu msana keto, ku to tenga ngutu. 27Se vathu va to xamala va txi kha vona:
“I m'thu muni wuwa wa ku hambi txihuhuri ni linene si txi mu engisa kani?”
Jesu e hanyisa vavamna vambidi vo xaniswa ngu madhimoni
(Marku 5:1-20; Luka 8:26-39)
28Ngako a di hokile mtxhatuko ka digova, ditikoni ka Gadhara, a to hingetwa ngu vathu vambidi, va nga ti ni madhimoni, na va txi huma ngu mayivani; i ti vo thisa ngutu, ti to ni m'thu wammweyo asi tsani kupinda ngu nzila yile. 29Vona va to peka huwa va txi kha vona: “I mhaka muni hi ku nayo ni nawe, Jesu Mwanana wa Txizimu kani? U tile hawa ku ta hi xanisa, yi sinzi kuhoka mbimo kani?”
30Se, kule nyana navo, ku ti ti ho mtxhambi wa hombe wa tikhumba, ti nga ti ti dya. 31Madhimoni ma to mkombela, ma txi kha ona khene:
“Ngako u txi hi tovela hawa, hi rumele hi txi ya wulela mtxhambini ka tikhumba.”
32Jesu a nje khene ka ona: “Tsulani!”
Se ona ma to huma me ya wulela mtxhambini ka tikhumba. Se mtxhambi wotshe wu to tutumela mkovani ka linene, wu so ya vhoma matini wu txi lova.
33Vadyisi va tikhumba va to tutuma ve tsula m'tini veya xawutela totshe, ngutu-ngutu atiya ti nga humelela ka va va nga ti ni madhimoni. 34Se votshe vathu va didhoropa va to huma va txi hingeta Jesu; se ngako va di mu woni, va to mkombela ti to e khukha ditikoni kwawe.
Currently Selected:
Matewu 8: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
