Luka 7
7
Jesu ngako a txi hanyisa txithumi txa nduna
(Matewu 8:5-13)
1Ngako Jesu a di hetile kuwomba otshe mapswi akwe ka dibutho, a to wulela Kapernawume. 2Mmweyo wa nduna ya dizana, a ti ni txithumi, a nga ti txi dhunda ngutu, atxiya txi nga ti lwala, txi di hafuhi ni kufa. 3Ngako nduna yile yi di pfite kuwombawomba ngu Jesu, yi to rumela kwakwe madhota a Vajudha, kasi kuya kombela ti to a nate, a ta hanyisa txithumi txa yona. 4Mbimo yi vona va nga hoka ka Jesu, va to ya mkombela ngutu va txi kha vona: “Ana ni fanelo ya kumahelwa eto, 5nguko wa dhunda va ka kwathu, kambe ngene a nga hi akela disinagoga.” 6Se Jesu a to tsula navo. Ngako a di hafuhi ni kuhoka m'tini ka nduna, yona nduna yi to rumela vangana kuya womba, va txi kha vona: “Mkoma, u nga ti xuphe u hoka kheno, nguko kha ni nga ni fanelo ya kuva u txi ta wulela nyumbani kwangu; 7se kha na tipfa ni di ni fanelo ya ku ku tela, aniko womba dipswi dimwedo dwe, kasiku txithumi txangu txi na hanya. 8Nguko ani ni ku m'thu wo fumwa ngu vamwani, nina ni masotxhwa, aawa nani ni ma fumako. Ngako ni txi gela dimwedo ka ona, ni txi khani: ‘Tsula’, dona da tsula; ka dimwani, ni txi khani: ‘Ngono kheno’, da ta, ka txithumi txangu, ni txi khani: ‘Thuma tiya’ txa ti maha.” 9Ngako Jesu a txi pfa mapswi awa, a to xamala, a txi tshembereka a txi wonetela vathu vale va nga txi mu londetela, a txi khene kwawe: “Na mi gela ni khani: Kha ni nzi kumana likholo la hombe lo nga liya, hambi ka vathu va Israyeli.” 10Mbimo yi avale va nga ti rumilwe va nga tshumela va txi ya m'tini, va to ya mana txithumi se txi txi hanya wutomi wa ditshuri.
Jesu ngako a txi wusa mwanana wa noni
11Msana keto, ene a to tsula ka didhoropa di dhanwako ku i Nayimi. Vagondiswa vakwe ni vathu vavangi, va to tsula nayo. 12Mbimo yi a nga hoka ha diphangoni ka didhoropa, a to manana ni vathu, va nga txi huma, va txi heleketa m'thu wa kufa, awu i nga ti mwanana wammweyo ekha wa mame wakwe wa noni; vavangi va kuhuma didhoropani va ti kumweko nayo mame wule wa noni. 13Mkoma, mbimo yi a nga mu wona, a to mpfela wusiwana, a txi khene kwakwe: “U nga dile!” 14Sekoko, a txi tshuketa hafuhi, a txi gwesa dibhokiso da txirumbi, se avale va nga ti txi rwala va to ema. Konako, Ene a to womba a txi khene: “Dijaha, ni khani: Wuka!” 15Konako, mufi a to khalahatsha a txi khata kuwombawomba. Se Jesu a to mningela ka mame wakwe. 16Votshe va to telwa ngu kuthava ngutu, va txi dhumisa Txizimu, va txi kha vona: “Mprofeti wa hombe a humelete hagari kwathu, Txizimu txi endete vathu va txona.” 17Se mahungu awa ma to hangalaka ni dotshe ditiko da Judheya ni ka otshe maphambo a hafuhi.
Mitumi ya Johani Mubhabhatisi ka Jesu
(Matewu 11:2-19)
18Vagondiswa va Johani va to xawutela totshe timhaka tiya. 19Se Johani a to dhana vagondiswa vakwe va vambidi, e va ruma ka Jesu, kuya wotisa va txi kha vona: “Ngawe awu a tako mwendo hi ngadi hi verela mmwani kani?” 20Vathu vava, ngako va di hokile kwakwe, va to ya kha vona: “Johani Mubhabhatisi a hi rumile kwako, a txi khene: Ngawe awu a tako mwendo hi ngadi hi verela mmwani kani?”
21Ka txonetxo txikhati, Jesu a txi hanyisa votala ka malwati ni ka mipando ni ka mimoya yo biha, e ninga kuwona ka mabhofu. 22Se Jesu a to va xamula a txi khene:
“Tsulani mi ya gela Johani ati mi nga ti wona ni ti mi nga tipfa; mabhofu ma wona, silima sa tsimbila, va tshekela va basiswa, maphanzeve ma engisa, vafi va wuswa, sisiwana sa txhumayelwa Evhangeli. 23Kambe a katekile awu a no mbi mana txikhuvekiso ngu mhaka yangu.”
24Ava va nga ti rumilwe ngu Johani, ngako va di khukhile, Jesu a to khata kuwombawomba ngu ta Johani ka vathu, a txi khene:
“Mi ti ya wona txani txiwulani kani? I ti litshava li li nga txi dekadekiswa ngu moya kani? 25Kasi mi ti ya wona txani kani? I ti m'thu wu a nga bomba kani? Wonani, ava va ambalako tinguwo ta wubombi ni va va dyako so tshamba, va zumba tinyumbani ka vakoma. 26Se mi ti ya wona txani kani? I ti mprofeti kani? Ina! Ani na mi gela: Ngu wu a palako mprofeti. 27Ngene wu, ku nga bhalwa timhaka takwe, va txi kha vona: ‘Wona, ni ruma mtumi wangu masoni kwako; wu na kulongisela tinzila.’ 28Se ani ni khani, hagari ka va va nga velekwa ngu vavasikati, kha nga ho wa hombe kupinda Johani; kambe awu i ku wam'dotho Mfumoni ka Txizimu mbwa hombe kupinda ene.” 29#Wona ni ka: Mat. 21:32; Luk. 3:12. Votshe va nga ti mu engisa, hambi vakhupisi ni vona va dhumisile kululama ka Txizimu, ve bhabhatiswa ngu txibhabhatiso txa Johani. 30Kambe Vafarisi ni vagondisi va mlayo va nyenyile makungo awa Txizimu txi nga ti nawo kwawe, nguko va nga lamba kubhabhatiswa ngu ngene.
31Jesu a to engeta a txi khene: “Vathu va liveleko liya ni na va fananisa ni txani kani? Va fana ni txani kani? 32Va fana ni vanana va va zumbako mtendelani, va dhananako va txi kha vona: ‘Hi mi vetete titshodi, kambe kha ma sinya, hi salukile aniko kha ma dila.’ 33Nguko Johani Mubhabhatisi a tile, asi dyi sakudya, asi seli vhinya, kambe mi txi khanu: ‘Ana ni didhimoni.’ 34Mwanana wa M'thu, ene a tile, wa dya ni kusela, mi txi khanu: ‘Hi nga wonani: Nyalimito ni didevi, mndoni wa vakhupisi ni vaonhi.’ 35Aniko wuzivi wu lulamilel masoni ka vanana va va wu amukelako.”
Jesu a di nyumbani ka mfarisi Simoni
36Mfarisi wokari a to dhana Jesu kutadya nayo sakudya. Ene a to wulela nyumbani ka wule wa mfarisi, a txi khalahatsha ha mezani ka sakudya. 37#Wona ni ka: Mat. 26:7; Mar. 14:3; Joh. 12:3. Konaho ku to bwaka wamsikati wa kona didhoropani mule, awu i nga ti txionhi. A tile ngu kupfa ti to Jesu a ha sakudyani nyumbani ka mfarisi; a to neha txikadyana txa kuwumbwa ngu mraka wo basa, txi di ni mafura o bhumula. 38Se a di zumbile ngu msana kwakwe, a txi dila, a to khata ku nakanisa mikondo ya Jesu ngu mirongo, a txi yi bahulela ngu misisi, a txi yi pswopswa, ngu msana a txi yi totela mafura ale o bhumula. 39Ngako a txi ti wona, mfarisi wu a nga mu dhanela sakudya, a to pimisa mbiluni kwakwe, a txi khene: “Idiku mamowa wo va mprofeti, a ndi na m'ziva wu wamsikati a m'gwesako, ti to i mani, nguko ene njionhi.”
40Aniko Jesu a to angula a txi khene:
“Simoni, ni na ni dipswi ni nawe.”
Ene a ti khene: “Womba, M'gondisi.”
41Jesu a ti khene: “Mtxenekisi wa male a ti ti ni vathu vambidi, va nga ti ni sikweneti kwakwe: Mmweyo a ti ti ni txikweneti txa 500 wa madhenari, se mmwani a ti ni txikweneti txa mtxhanu wa magumi. 42Ngako va nga ti si nga ni so diha ngu sona, a to va divalela sikweneti sawe votshe vavambidi. Se ngu wuhi ka va vavambidi, a no va ni lirando ngutu kwakwe kani?”
43Simoni a nje khene: “Ani ni pimisa ti to ngu wule a nga divalelwa ngutu kupinda mmwani.”
Se Jesu a txi khene kwakwe: “U xamute ditshuri.”
44Se a txi tshembereka, a txi wonetela awule wamsikati, a txi gela Simoni ku khene:
“Wa mu wona wu wamsikati, kani? Ni wulete nyumbani kwako, khwa ni ha mati a kusamba mikondo, aniko ene a nakanisile mikondo yangu ngu mirongo yakwe, a txi yi bahulela ngu misisi yakwe. 45Awe khwa ni pswopswa, kambe ene, kukhukhela ni wulela hawa, kha leki ku ni pswopswa mikondo. 46Awe khwa ni tota msungo ngu mafura, aniko ene a ni totile mikondo yangu ngu mafura o bhumula. 47Ngu mhaka ya toneto, na kugela ku khani: A divaletwe sionho sakwe sasingi, nguko a kombile lirando la hombe ngutu. Aniko awule a nga divalelwa sa sidotho, wo va ni lirando la lidotho.”
48Msana keto, a to gela wule wamsikati a txi khene:
“U divaletwe sionho sako.”
49Kunukunuko, ava a nga ti navo ha mezani ka sakudya va to womba timbiluni kwawe va txi kha vona:
“I mani ene wu a sikotako ni kudivalela vathu sionho sawe kani?”
50Aniko ene a to gela wu wamsikati, a txi khene:
“Likholo lako li ku hanyisile; tsula ngu kudikha.”
Currently Selected:
Luka 7: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
