Genesisi 49

Jakobe a txi katekisa vanana vakwe va digumi ni vambidi

1Jakobe a dhani vanana vakwe e va gela tiya:

Tshanganani nguko ni lava ku mi gela ti ti no mi humelela ka mbimo yi yitako,

2tshanganani mi txi engisisa,

anu vanana va Jakobe;

engisani Israyeli tate wanu.

3Rubheni, awe u matiwula angu,

mtamo wangu ni makhato a mtamo wangu,

u wo khata amu ka fanelo,

u wo khata amu ka mtamo.

4Wo khulunga nga mati,

Awe khu na mbi guletwa,

nguko u tsani u txi kwela ha m'bhedhuni ka tate wako.

Sekoko u wu nyenyezisile m'bhedhu wangu!

5Simiyoni ni Levhi mkoma ni mnanda,

matxhari awe ma thuma kumaha tshofu.

6Moya wangu wu nga wulele

sikungoni kwawe,

nduma yangu yi nga wuletiswe misengeletanoni kwakwe,

nguko kuhenyani kwawe va dayete vavamna,

ve sakana ngu kulimata misiha ya tihomu.

7Yi na va wuyisele dikhombo

tshofu yawe ya kwa mbi dinganiswa,

txi na mahe dikhombo txiviti txa wurena wawe.

Ani ni na va hangalasa hagari ka ditiko da Israyeli.

8Awe Judha, vananu va na kudhumisa,

dianza dako di na khozisa tithamo ta valala vako;

ni vanana va tate wako

va na khizama masoni kwako.

9 # Wona ni ka: Mit. 24:9; Mtu. 5:5. Judha njingonyamwana;

u txi wuya mwanangu ngu kuxotani!

Wa bukhwama a txi humula nga ngonyamo ya matune,

nga ngonyamo ya matune yo kale.

I mani a no mu wusa kani?

10Ndonga kha yi na mbi khukha ka Judha,

hambi mlayeli mikondoni kwakwe,

kala kuza ku txi ta Silo;

awule#49:10 Mwendo: va na engisa. vathu va no sengeletana kwakwe.

11Ene a na sunga tximbongolana

txakwe ka m'vhinya,

ni mwanana wa mbongola

ka m'vhinya wo tshura ngutu;

a na kuwula syambalo sakwe amu ka m'vhinya wale wa txhuko,

a txi kuwula didhamba dakwe

amu ka mauvha o nga mnoha.

12Maso akwe ma bhilivite

ngu vhinya,

makwasa akwe ma basile

ngu mhaka ya masi.

13Zebhuloni a na aka ha likasani ka linene,

i ku txithoni ka sitimela sa mati,

se muhingano wakwe

wu na gwitela Sidhoni.

14Isakari i mbongola ya marambu a mtamo,#49:14 Mwendo: yo zumba hagari ka sibala.

yi nga otela hagari ka tithundu timbidi.

15Se ene a pfa kutshamba ka kuhumula,

ni ti to ditiko da tsakisa,

se a to releta dikata dakwe

kasi kupakata thundu

a txi ti maha khumbi.

16Dhani a na lamula timhaka ta vathu vakwe,

nguko mmweyo wa tihunzu ta ka Israyeli.

17Dhani a na va mnyoka

hafuhi ni nzila,

xaru hafuhi ni dipfhela

yi lumako txizenende txa dihantxhi,

se m'gadhi wa dona

a txi wa ngu nyatxisane!

18 Mkoma, ni verela kutirulwa ngu ngawe!

19Gadhi a na lwiswa

ngu sigevenga;

kambe ene a na si lwisa a txi si hambanisa.

20Aseri, sakudya sakwe

nza kunona,

sona nzo tshamba sa wukoma.

21Naftali i mhoti yo tutuma;

a womba mapswi o tshura ngutua.

22Josefa didhavi do veleka ngutu

didhavi do veleka ngutu hafuhi ni mlonga;

madhavi a dona ma navako

txitimwi ka diguma.

23Vafuli va mpfisile kupanda,

ngu ku mfuletela#49:23 Mwendo: Va mtutumisile. ngu tingove,

ngu ku m'venga kwawe.

24Aniko wulaho wakwe wu zumbile wu di tsani,

ni misiha ya mawoko akwe yi tsanisilwe,

ngu manza a Ndena ya Jakobe

(eho i ku M'dyisi ni Dirigwi da Israyeli.)

25Txizimu txa tate wako txi na kuvhuna,

ni wu wa Mtamo-wotshe awu a no ku katekise:

Ngu makatekwa a kuta ngu txitimwi nzumani,

ni makatekwa a kuhokomani, ma ku hahatshi

ni makatekwa a titshumbu, ni mrumbuni.

26Makatekwa a tate wako ma na pinda

makateko a vatate vangu,

kala titshokani ka mimango ya kale ngutu;

ona ma nava txitimwi

ka msungo wa Josefa,

ni txitimwi ka msungo wa wule a nga sawulwa

hagari ka vanawe.

27Bhenjamini i dixolwa di di phatulako;

ni mixo didya txile di nga xota,

se ni minova di phaka sa kuhonyola.

28Votshe vava va tshanganisa digumi da tihunzu ni timbidi ta Israyeli, atiya timhaka ngu tona ti tate wawe a nga va gela. Ene a va katekisile, mmweyo ni mmweyo madingano ni fanelo yakwe.

Kufa ni kutshotshwa ka Jakobe

29Ngu msana a to va ninga sileleto, a txi khene:

Ani na tsula ni txi ya tshangana ni va ka kwathu. Ni tshotsheni kumweko ni vatate vangu, ka diphala di di ku thembweni ka Efroni, Muheti, 30#Wona ni ka: Gen. 23:3-20. ka diphala di ku diya di ku thembweni ka Makipela, masoni ka Mambre, ditikoni ka Kanana, ahale Abrahamu a nga xava ka Efroni, Muheti, kasi kumaha mathithani ko mlumba. 31#Wona ni ka: Gen. 25:9-10. Ngu koneyo a nga tshotshwa kona Abrahamu ni msikati wakwe Sara; ngu koneyo a nga tshotshwa kona Isaake ni Rebeka, msikati wakwe, ngu koneyo ani ni nga tshotsha kona Leya. 32Thembwe yiya ni diphala diya di ku ka yona, si xavilwe ka vanana va Heti.

33 # Wona ni ka: Mith. 7:15. Ngako Jakobe a di gwitile kuninga sileleto ka vanana vakwe, a to peta minenge yakwe ha m'bhedhuni, efa eya tshangana ni va ka kwawe.

Currently Selected:

Genesisi 49: BEC2016

Highlight

Copy