Genesisi 47
47
1Sekoko Josefa a to tsula ka Faro a txi ya m'gela ku khene:
“Tate wangu ni vanathu, va bwakile na va txi ta ngu ditikoni ka Kanana, ni tinvuta tawe, tihomu tawe, ni sotshe si si va lumbako; se vona va maneka ka ditiko da Goxeni.”
2Ene a to teka vanawe va mtxhanu eya va kombisa ka Faro. 3Sekoko Faro a to khene ka vanawe:
“Ngu wuhi mthumo wanu kani?”
Vona va to xamula va txi kha vona:
“Athu sithumi sako hi vadyisi va tinvuta, athu hotshethu ni vatate vathu.” 4Vona va to womba kambe ka Faro, va txi kha vona: “Hi tela ku ta aka ditikoni muwa kwako, nguko Kanana, mwani kwathu, kha kuswi ku di ni wudyiselo wa mitxhambi yathu, athu sithumi sako, ngu mhaka ya paya i ku ya hombe. Ha kombela ti to athu sithumi sako hi txi zumba ditikoni ka Goxeni.”
5Sekoko Faro a to womba ka Josefa, a txi khene:
“Tate wako ni vananu va wuyile kheno kwako. 6Ditiko da Egipta di mtamoni kwako: Akisa tate wako ni vananu, ka wukhalo wa wunene. Va na ake ditikoni ka Goxeni. Se ngako, u txi ziva ti to hagari kwawe ku ni vavamna#47:6 Mwendo: va nga ti emisela. va mtamo, u na va veka ve maha vahombe va mitxhambi ya sifuyo sangu.”
7Se Josefa a to tisa tate wakwe, e ta mkombekisa ka Faro, Jakobe a to losa Faro. 8Faro a wotisile ka Jakobe a txi Khene:
“Malembe a tanga yako ma ngani, kani?”
9Jakobe a to xamula ka Faro, a txi khene:
“Malembe a ku pepeseka kwangu ha mafuni, 130 wa malembe awa, ona madotho, aniko ma tate ngu sixaniso, kha ninzi kuhoka ka mtengo wa malembe awa vatate vangu va nga hanya ha mafuni.”
10Jakobe a to salisa ka Faro, a txi khukha e tsula. 11Josefa a to veka tate wakwe ni vanawe, ka wukhalo wa wunene ngutu ka otshe makhalo a ditikoni ka Egipta, ka wukhalo wa Ramesesi, madingano ni ti Faro a nga wombisa tona. 12Josefa a to xayisa tate wakwe, ni vanawe ni totshe timwaya tawe, ngu ku vaninga sakudya so enela, ka mtengo wa mwaya ni mwaya.
Josefa mthangeli wa Egipta
13Ka mafu otshe ku ti si nga ni sakudya, nguko paya i ti ya hombe ngutu, ditikoni ka Egipta ni ditikoni ka Kanana. Vathu votala va ti ti xupheka ngu nzala. 14Sekoko Josefa a to sengeleta male yotshe ayi yi nga ti ti ho ditikoni ka Egipta ni ditikoni ka Kanana, yi va nga ti xava ngu fulaho, se maleyo a ti ti yi veka nyumbani ka Faro. 15Mbimo yi male yi nga guma ditikoni ka Egipta ni ditikoni ka Kanana, votshe Vaegipta va tile ka Josefa va txi ta kha vona:
“Hi he sakudya! Ina u na hi leka hi txi fa ngu nzala masoni kwako nguko hi ku si nga ni male, kani?”
16Konako Josefa a ti khene:
“Tisani sifuyo sanu mi txi ta xava ngu sona sakudya, ngako male yi di gumile.”
17Sekoko va to tisa mitxhambi yawe ka Josefa, kasi ku ta xava ngu yona sakudya kwakwe! Josefa a amukete mahantxhi ni tinvuta, ni tihomu ni timbongola tawe, se ene a va hanyisile ka dilembe donedo ngu kuvaninga fulaho, se vona ve mninga sifuyo sawe. 18Ngako di di pindile dilembe va to wuya kambe ka Josefa mwakani ka kona ve ta kha vona: “Kha hi sikoti ku kusisela txilo awe nyamne wathu: Male yathu yi gumile, sihari sathu ni sona sotshe si lumba awe nyamne wathu, ku to sala mimidi yathu ni tithembwe tathu dwe.
19Ina u na hi leka hi txi fa kona hawa masoni kwako, ni tithembwe tathu ti txi luza kani? Hi xave athu ni tithembwe tathu u txi hi ninga sakudya, hi na maha tikhumbi ta Faro. Aniko hi he mbewu kasi hi na hanya, hi si fi, ni ditiko di si mahi txiwula.”
20Ngu mhaka yeto Josefa a to xava ditiko dotshe da Egipta, di txi maha da Faro, nguko Vaegipta va ti ti xavisile tithembwe tawe, ngu mhaka ya paya, yi yi nga ti xanisa vathu, se ditiko dotshe di to lumba Faro. 21Ngu didhawa da vathu va ditiko, ene a va xavile votshe e va maha sithumi, kukhukhela ka mihingano ya makhato, kala ka mihingano ya magwito ka ditiko da Egipta.
22Aniko tithembwe ta vaphaxeli kha ti xava, nguko vaphaxeli va ti ni txyavelo txawe va nga txi ningwa ngu Faro, ngu mhaka yeto, vona kha va kurumetwa kuxavisa tithembwe tawe.
23Sekoko Josefa a to khene ka vathu:
Wonani taku nyamsi ni mi xavile anu ni mafu anu, mi na lumba Faro; wonani taku mi ni mbewu, mi na phaya tithembweni kwanu. 24Aniko ngu mbimo ya kuelula, ka mtxhanu wa tipimo ta si mi nga elula, mi fanete kuninga Faro mpimo wumwewo, anu mi txi mana kudya, anu ni timwaya tanu, ni vanana vanu.
25Vona va xamute va txi kha vona:
Awe u hi hanyisile! Hi na mane mathomo masoni kwako tata, hi zumba hi di sithumi sa Faro.
26Josefa a to veka mthetho ngu mhakeyo, awu wu thumako kala ni nyamsi ka ditiko dotshe da Egipta: Ka mtxhanu wa tipimo ta sotshe si si elulwako mu tithembweni, mpimo wumwewo wu lumba Faro. Tshambi tithembwe ta vaphaxeli kha ta tekwa ti txi maha ta Faro.
Txikombelo txo gwitisa txa Jakobe
27Ngu toneto, Israyeli a zumbile ditikoni ka Egipta, ka wukhalo wa Goxeni. Koneyo vona va to mana mipeto, va txi velekela, ve anda ngutu. 28Jakobe a hanyile digumi da malembe ni mtxhanu ni mambidi ditikoni ka Egipta, kambe otshe malembe a tanga yakwe i ti 147. 29Mbimo yi Israyeli a nga ti hafuhi ni kufa, a to dhana Josefa mwanakwe, e m'gela tiya:
Ngako u txi ni dhunda ngu ditshuri, veka dianza dako hahatshi ka dithumbi dangu, u txi ni thembisa ngu lirando ni wunene ti to u si ni tshotshi ditikoni muwa ka Egipta! 30Ngako ni txi fa ni teke u ni humisa ditikoni muwa ka Egipta u txi ya ni tshotsha wukhaloni ka vatate vangu, kasiku ni txi otela kumweko navo.
Ene a to womba, a txi khene:
Ina ni na maha ti u ti wombako.
31Aniko tate wakwe a to engeta, a txi khene: Xambanya masoni kwangu. Josefa a xambanyile. Se Israyeli a to nama misungoni ka m'bhedhu.
Currently Selected:
Genesisi 47: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
