Genesisi 44

Digombe da Josefa disakani ka Bhenjamini

1Josefa a to gela mxayisi wa m'ti wakwe, a txi khene:

“Theletela sakudya masakani ka vathu vava, ma txi tala madingano ni ti va sikotisako tona kurwala, u txi veka kambe ngu txitimwi male ya mmwani ni mmwani disakani kwakwe. 2U na veka digombe dangu da silivhela disakani ka wu wa mnanda, ngu txitimwi ka fulaho, u txi veka ni male yi a nga ti tile nayo kasi ku ta xava sakudya ngu yona.”

Ene a to mahisa toneto, a nga leletisa tona Josefa. 3Di di txite, va to va leka vathu vale ve tsula ni timbongola tawe. 4Vona i di ngadi kwawe kuhuma didhoropani, kambe va sinzi kuhoka kule, Josefa a to gela mxayisi wa nyumba yakwe, a txi khene:

“Khukha! Tutuma u txi londisa vathu vale; ngako u txi va mana, va gele ku khawe: Ngu kutxani mi txi tshumetela wunene ngu wubihi kani?” 5“Mi pite digombe da nyamne wangu, adi a selako ngu dona ni kuhuta ngu dona, anu mi mahile tawalo ngutu!”

6Ngako a di va mani, a to va gela ona mapswi awa a nga leletwa ona. 7Aniko vona va to xamula va txi kha vona:

“Awe nyamne wangu, ngu kutxani u txi wombiseto kani? Sithumi sako si kule ni kumaha wubihi wo ngeto! 8Wona: Male yi hi nga yi mana masakani kwathu ka fulaho, hi tshumetile hi txi yi wuyisa kwako ngu Kanana, mwani kwathu. Hi nga va hi di mahisile kutxani, kupa nyumbani ka nyamne wako, silivhela mwendo nzalama kani? 9Awule a no manwa hagari kwathu sithumi sako, a di natxo tximahetxo a na dawe, ni nathu hotshethu hi nava hi di tikhumbi tako, mthangeli.”

10Ene a to engeta, a txi khene:

“Ti na maheke nga kuwomba kwako: Awule txi no manwa kwakwe tximahetxo, a na va i di khumbi yangu, ani avale vamwanyani va na va va di txhatxhekile.”

11Se ngu kukuluveta, mmwani ni mmwani a to rula hahatshi disaka dakwe da fulaho a txi di tula. 12Ene a to xola, a txi khata ngu ka disaka da mkomwawe, a txi ya gwitisa ngu ka disaka da mnanda wawe, ahawa digombe di nga ya maneka kona, disakani ka Bhenjamini.

13Sekoko va to vharula syambalo sawe, va txi komba kupandiseka kwawe, va txi sanzeka kambe masaka ha timbongolani kwawe, va txi tshumelela didhoropani.

14Mbimo yi Judha ni vananda vakwe va nga wulela nyumbani ka Josefa, amu va nga ya mmana a sinzi kuhuma, vona va to khizama hahatshi masoni kwakwe.

15Josefa a to wotisa, a txi khene:

“Njitxani atxiya mi nga txi maha kani? Mi si ti zivi to m'thu wo nga ani wa tiziva kuhuta kani?”

16Sekoko Judha a to xamula, a txi khene:

“Hi na womba txani kwako mthangeli, hi nga wombisa kutxani, hi ti basisisa kutxani kani? Txizimu ngu txona txi nga wonekisa kubiha kwathu, athu sithumi sako. Athu hi tikhumbi tako tata, athu hotshethu kumweko ni wule digombe dako di nga ya manekela manzani kwakwe.”

17Aniko Josefa a ti khene:

“Ani ni kule ni kumahisa eto! M'thu wu di nga ya manekela kona digombe, eyo ngene a no va khumbi yangu; aniko anu motshenu, tshumelani ngu kuthutha mi tsula m'tini ka tate wanu.”

Judha e kombela kuvhikelwa ka Bhenjamini

18Sekoko, Judha a to tshuketa hafuhi ka Josefa, a txi khene:

“O! Nyamne wangu, na ku kombela, ni tumelele ani txithumi txako, ni womba dipswi dimwedo tinzeveni kwako nyamne wangu, ti to txiviti txako txi si humeleli txitimwi ka txithumi txako, nguko awe u fana ni Faro, ene apune!” 19Mbimo yi nyamne wangu a nga hi wotisa athu sithumi sakwe, a txi khene: “Ina mi ngadi ni tate mwendo mi na ni mnanda kani?” 20Athu hi xamute hi txi khathu: “Hi ngadi ni tate, awu se a nga kumba, ni mnanda wathu wammweyo, wo gwitisa, awu ene tate a nga m'veleka kukumbani kwakwe; mkomwakwe a fite, wa kuvelekwa nayo ngu mame mmweyo, ku to sala ene ekha mndani ka mame wakwe ni ka tate wathu, awu a mrandako ngutu!” 21Sekoko awe u wombile kwathu sithumi sako u txi khawe: Mi na ya wuya nayo, kasi ni ta mu wona ngu maso angu. 22Athu hi xamute kwako, mthangeli, hi txi khathu: “Mfana wuwa kha sikoti kuhambana ni tate wakwe; nguko ngako a txi khukha ka tate wakwe, tate a na fa.” 23Sekoko u to tamarisa kwathu, athu sithumi sako, u txi khawe: Ngako mi si wuyi ni mnanda wanu wam'dotho, kha mi na mbi ta tiswa hafuhi kwangu.

24Mbimo yi hi nga tshumela hi txi ya m'tini ka txithumi txako, i ku tate wathu, athu hi ti ya mxawutela mapswi ako otshe, awe mthangeli.

25Se mbimo yi tate wathu a nga khene kwathu: Tshumelani mi txi ya hi xavela sakudya sokari, hi na ta hanya nzala, 26athu hi mxamute hi txi khathu: Kha hi na mbi tsula, ngako mnanda wathu asi tsuli ni nathu, nguko kha ti na mbi ya koteka kutumelelwa ku hi txi tshuketa hafuhi ka wamwamna wuleya, hahanze ka kuva hi di ni mnanda wathu wo gwitisa. 27Sekoko txithumi txako, i ku tate wathu, a wombile, a txi khene: “Anu ma tiziva ti to mame wanu a ni velekete vanana vambidi dwe, va majaha.” 28“Mmweyo khaswi a diho, se ani ni pimisa ti to a phatuletwe ngu txihari txa txitinga! Kala ni nyamsi kuwa kha ni mu woni.” 29“Ngako mi txi ni tekela wuwa kambe, mi txi tsula nayo, a txi thuka a txi ya humelwa ngu dikhombo dokari, kuxuphekani kwangu, mi na ni wisisa ni tinvi tangu diphalani ka vafi, ngu kunemelwa ngu txiviti.”

30Konkuwa ngako hi txi ya woneka nyumbani ka txithumi txako, i ku tate wathu, na mfana hi si nga nayo, awu moya wakwe i ku wumwewo ni moya wa tate, 31se ngako kambe a txi wona ti to mfana kha hi nga nayo, a na fa, se athu sithumi sako hi nava hi di reletisile, ngu kupandiseka, tinvi ta msungo wa txithumi txako, tate wathu, diphalani ka vafi, a di ni txiviti. 32Se ani, txithumi txako, ni ti sungile masoni ka tate ngu mhaka ya mfana wuwa, ni txi khani: “Ngako ni si wuyi nayo, ni na va ni mnandu kwako tata, ka otshe masiku a kuhanya kwangu.”

33Konkuwa, ani txithumi txako ni kombela ti to ni txi zumba ni di khumbi yako, mthangeli, ha wukhaloni ka mfana wuwa, kasiku ene a txi tshumela a txi tsula m'tini ka tate ni vakoma vakwe. 34“Ni nga sikotisa kutxani ani kutshumela ni tsula m'tini ka tate, ni si nga nayo mfana wuwa, kani? Kha ni lavi kuya wona dikhombo di, di no ya wela txitimwi ka tate wathu.”

Currently Selected:

Genesisi 44: BEC2016

Highlight

Copy