Genesisi 43

Vanawe va Josefa va txi tshumelela Egipta

1Nzala yi to xanisa ngutu ditikoni. 2Se mbimo yi va nga heta sakudya si va nga ti wuyile naso ngu Egipta, tate wawe Jakobe a va gete, a txi khene:

“Tshumelani mi tsula Egipta, mi txi ya hi xavela kambe sakudya sokari.”

3Aniko Judha a mxamute, a txi khene:

“M'thu wule a hi gete ngu kutsanisa, a txi khene: Kha mi na mbi ta wona khohe yangu, ngako mi si nga ni mnanda wanu.” 4Ngako u txi tumela ku hi tsula ni mwanathu Bhenjamini, hi na relela hi ya ku xavela sakudya; 5aniko, ngako u si mtumeleli, kha hi na mbi relela, nguko awule wa wamwamna a hi gete ku khene: “Kha mi na mbi ta yi wona khohe yangu, ngako mi si nga ni mnanda wanu.”

6Se Israyeli a to khene:

“Ngu kutxani mi nga maha ta walo, mi womba ka wamwamneyo mi txi khanu, mi na ni mmwani mnanda kani?”

7Se vona va xamute va txi kha vona:

“Wamwamna wuleya, a hi wotisete madingano ni dihanyo dathu ni maxaka athu, a txi khene: Tate wanu a ngadi a txi hanya kani? Mi na ni mmwani mnanda kani?” Se hi to mxamula ngu mapswi oneyo amamwewo. Nga hi di ti zivisile kutxani ati to a na khene: “Wuyani ni mnanda wanu, kani?”

8Sekoko Judha a to khene ka tate wakwe Israyeli:

“Veka mfana wuwa mtamoni kwangu, hi na khukha hi txi tsula hi ya xava sa ku ta hanya nzala ngu sona, kasiku hi si fi athu ni nawe ni vanana vathu.” 9Ani na ti ningela kumxayisa; u txi ta mlava, u na mmanela kwangu; ngako ni si wuyi nayo ni ta m'veka masoni kwako, ni na va ni mnandu masoni kwako, ngu ha ku si gwitiko. 10“Se i tiku kha ha swela, akuwa nga i di kuwuya ka wumbidi!”

11Sekoko tate wawe Israyeli, a to va gela, a txi khene:

“Ngako ti di ngeto, mahani toneto! Thelani sa lisima ngutu sa ditiko dathu, mi na ya maha siningo ka mamoyo: Mafura amadotho o bhumula, ni wulombe wa wudotho, ni makha, ni mira, ni mapistasi, ni#43:11 Mwendo: mihando ya mpistase. tifula. 12Se tekani male manzani kwanu yi di petilwe; ni male yile mi nga yi mana masakani kwanu; ñolani ni yona manzani kwanu; va nga thuka va di yi lekile ngu kulunduma. 13Tekani mnanda wanu mi tsula nayo, mi txi ya ka ene mamoyo. 14Se Txizimu txa Mtamo-wotshe, txi na mi katekise masoni ka ene mamoyo, kasiku e mi leka mi wuya ni mmwani mnanda wanu, kumweko ni Bhenjamini. I di ani, ngako ti txi laveka ti to ni mwalalelwa ngu vanana, ni na mwalalelwe ngu vona!”

15Se vavamna va to teka txiningo txile, ni male yo khata ni ya wumbidi, kumweko ni Bhenjamini; ve khukha ve relela Egipta, veya ti kombekisa masoni ka Josefa. 16Mbimo yi Josefa a nga va wona va di ni Bhenjamini, a to gela mxayisi wa m'ti wakwe, a txi khene:

“Heleketa vavamna vava m'tini kwangu, u na ya daya txihari tximwetxo u txi txi lulamisela sotshe; nguko vavamna vava, va na dya ni nani ngu dhina.”

17Se wamwamna wule a to maha ti Josefa a nga mruma, kambe ene wamwamna wule, a to heleketa vavamna vale m'tini ka Josefa. 18Sekoko vavamna vale va to dhuka, ngako va txi heleketwa m'tini ka Josefa, va txi kha vona:

“Mwendo i nga va mhaka ya male yile hi nga tshumela nayo dile do khata masakani kwathu, akuwa va hi tisako hawa; va lava ku hi ñola, va txi hi xanisa, va txi hi maha tikhumbi tawe, ni timbongola tathu.”

19Ngu mhaka yeto, va to tshuketa hafuhi ka mxayisi wa nyumba ya Josefa, va txi ya womba-womba nayo ha txikeni ka nyumba.

20“Se va to kha vona: Yowe! Awe nyamne wathu, hi relete do khata, hi ta xava sakudya; 21se ku to maheka taku, hi di hokile ha wukhaloni hawa hi nga ya gova, mbimo yi hi nga tula masaka athu, mmwani ni mmwani wa ka kwathu, a to mana male yakwe ha txisofuni ka disaka dakwe, yona male yathu ngu mtengo wa yona; se hi wuyile nayo kambe ngu manza athu. 22Kambe manzani kwathu hi ni yimwani male, ya ku ta xava sakudya; kha hi ti zivi to i mani a nga veka male yathu masakani kwathu.”

23Ene a to khene:

“Kuthutha ku nave ni nanu, mi nga thaveni; Txizimu txanu, i ku Txizimu txa tate wanu, ngu txona txi nga mi vekela thomba masakani kwanu; male yanu yi hokile kwangu.”

Se a to humisa Simiyoni a txi mtisa kwawe. 24Msana keto, wamwamna wule a to heleketa vavamna vale m'tini ka Josefa, a txi ya va ninga mati ve samba mikondo yawe; kambe a ningile sakudya ka timbongola tawe. 25Vona va to lulamisa siningo sawe, sa ku ta ninga Josefa, a nga ti fanela kubwaka ni mitshikari, nguko va ti zivile ti to va na mahelwa konaho sakudya sa dhina.

26Mbimo yi Josefa a nga wulela nyumbani, va to mninga siningo si va nga ti naso, se va to khizama hahatshi, masoni kwakwe. 27Aniko ene a to va khambisa thenga ngu lirando, a txi va wotisa ku khene:

“Wa hanya tate wanu, txona txikhovana txi mi nga womba-womba ni nani ngu txona kani? Ene i ngadi mtomi kani?”

28Vona va to xamula va txi kha vona:

“Txithumi txako, ene tate wathu, a ngadi ho, ene a ngadi a txi hanya.” Se vona va to nama, va txi mkhizamela.

29A di gute maso, Josefa a to wona Bhenjamini mnanda wakwe, mwanana wa mame wakwe, a txi wotisa, a txi khene:

“Ngene wuwa mnanda wanu wo gwitisa, mi nga ni bhulela ngu ngene, kani?” Sekoko a to tshuketa hafuhi kwakwe, a txi khene: “Txizimu txi na ku katekise, mwanangu!”

30Josefa a to kuluveta a txi huma nguko a ti hefemuteka, ngu mhaka ya mnanda wakwe, ni mirongo yi to khata kuhuma, se a to wulela txibhiyani kwakwe a txi ya dilela kona. 31A di sambile khoheni, a to huma e ti ñola, a txi khene:

“Nehani sakudya.”

32Va to phamela sakudya ve ninga Josefa ha mezani kwakwe, ve phamela sa kuninga vanawe ha mezani kwakwe ni vona, ve phamela kambe Vaegipta va nga ti ti ho ha mezani kwakwe ni vona: Nguko Vaegipta kha va dyi kumweko ni Vahebheru, nguko eto ta yila ka Vaegipta. 33Vanawe Josefa va ti folisilwe masoni kwakwe, mmwani ni mmwani e khalahatshiswa ka wukhalo wakwe, madingano ni tanga yakwe, kukhukhela ka wa matiwula, kala ka mnanda wa tshole; se vona va to khata kuwonana, va di tate ngu kuxamala. 34Aniko ene a to phamela vanawe sakudya sakwe sa ha mezani kwakwe, a txi phamela Bhenjamini sakudya sa kupinda mtxhanu wa kona asi a nga phamela mmweyo ni mmweyo ka votshe vamwanyani vanawe. Se vona ve sela, va txi busa nayo.

Currently Selected:

Genesisi 43: BEC2016

Highlight

Copy