Genesisi 40

Josefa e txhamusela miloro yimbidi

1Ngu msana ka totshelele tiya, ku mahekile ti to mtheleli wa so sela sa mfumeli, wa Egipta ni m'bhikeli wakwe wa mapawu, va manekile va di onhete nyamne wawe, mfumeli wa Egipta. 2Se Faro a to henyela ngutu mithenwa yakwe ya yimbidi, ni mthangeli wa vatheleli va so sela, ni mthangeli wa vabhiki va mapawu. 3A to rumela ti to veya khotelwa amu nyumbani ka vawoneleti, mkorani mule Josefa a nga ti khotetwe kona. 4Se mthangeli wa vawoneleti a to ruma Josefa ati to e va woneleta, a txi va thumela, aha va nga zumba masiku amangi va di seketwe.

5Sekoko, ka wusiku wawumwewo, mtheleli wa so sela, ni m'bhiki wa mapawu a mfumeli wa Egipta, avale va nga ti seketwe mkorani, mmweyo ni mmweyo wawe a to lora mloro wakwe, wu ku ni txhamuselo ya wona yo hambana. 6Ni mixo ya kona, Josefa a to tshuketa hafuhi kwawe, a to va wona va si tsaki tikhoheni kwawe. 7Sekoko a to wotisa ka mithenwa ya Faro a nga ti seketwe nayo, amu nyumbani ka nyamne wa yona, a txi khene:

“Ngu kutxani nyamsi mi ku ni tikhohe to wuna, kani?”

8Se vona va mxamute va txi kha vona:

“Hi to lora miloro, aniko kha nga ho awu a sikotako ku hi txhamusela.” Josefa a to va wotisa a txi khene:

“Ina kutxhamusela kha ku lumbi Txizimu kani? Ni xawuteleni ti mi nga lora!”

9Sekoko mthangeli wa vatheleli va so sela sa mfumeli, a xamute ka Josefa a txi khene:

“Ni lorile ni txi wona masoni kwangu mndonga wa m'vhinya.” 10Se aha ka m'vhinya ku ti ni madhavi mararu: Madhavi ma nga thunga linyempfu, ma txi humisa siluva, si si nga veleka sizangwa sa mauvha o vitwa. 11Se ni ti ñote kopo ya Faro manzani; ni teka sizangwa sa mauvha ni kamela mu ka kopo ya Faro, se ni ningela kopo manzani ka Faro.

12Sekoko Josefa a to khene kwakwe:

“Txhamuselo ya mloro wuwa ngu yiya: Madhavi a mararu ma kombisa masiku mararu; 13kambe mndani ka masiku mararu, Faro a na kuguleta u txi tshumelela mthumoni kwako, se u na ya veka kopo manzani ka Faro, madingano ni tolovelo ya kale, mbimo yi u nga ti mtheleli wakwe. 14Kambe ni alakanye, ngako u txi humelela ngu nzila ya yinene; siza u txi ni mahela wuxinji, u ni kombelela ka Faro, kasiku e ni humisa ka yiya nyumba; 15nguko, ni to pfhukulwa ditikoni ka Vahebheru; hambi ni kona hawa kha na maha txilo txo biha, txa kuza ni ta wuletwa diphalani muwa.”

16Sekoko awule wa mthangeli wa vabhiki va mapawu, a di woni ti to txhamuselo yiya nja yinene, a to khene ka Josefa:

“Nani ni lorile, ni di rwate sirundu siraru#40:16 Mwendo: tithavangu ta mapawu o basa. sa mapawu ha msungo kwangu; 17se amu ka txirundu txi txi nga ti txitimwi, ku ti ti ni sakudya sa totshe tixaka si a bhikelwako Faro ngu m'bhiki wakwe wa mapawu; se sinyana si to ta jokotela si si nga ti txirunduni, ha msungo kwangu.”

18Sekoko Josefa a to xamula a txi khene:

“Txhamuselo ya mloro wuwa ngu yiya: Sirundu siraru si kombisa masiku mararu; 19mndani ka masiku mararu, Faro a na kuwila msungo wako, a txi kuhayeka txitimwi ka mndonga, se sinyana si txi ta jokotela nyama yako.”

20Kha ditshuri, ka ditshiku da wuraru, i nga ti ditshiku da kutshanganisa malembe a kuvelekwa ka Faro, ene a to maha m'buso wo mahela vathangeli vakwe votshe, kumweko ni vathangeli va vatheleli vakwe va so sela, ni mthangeli wa vabhiki va mapawu akwe, hagari ka vathangeli vakwe votshe. 21Ene a to tshumela e amukela mthangeli wa vatheleli va vhinya mthumoni ka yona ka kuthumela m'zinda, yi txi teka kopo yi txi veka manzani ka Faro, 22kasi ngu didhawa da mthangeli wa vabhiki va mapawu, Faro a to rumela ti to e txikitwa, nga ti Josefa a nga txhamuselisa tona, mloro wa yona. 23Aniko mthangeli wa vatheleli va so sela, kha mkhumbula Josefa, yi to m'divala.

Currently Selected:

Genesisi 40: BEC2016

Highlight

Copy