Genesisi 39

Josefa nyumbani ka Potifari

1Se Josefa a to tekwa e yiswa ditikoni ka Egipta. Potifari,#39:1 Mwendo: didhota. mthenwa wa Faro, mthangeli wa vawoneleli, wamwamna wa Muegipta, a to xava Josefa, ka va ka Ismayeli, vale va nga mteka veya mningela kwakwe. 2#Wona ni ka: Mith. 7:9. Mkoma a ti ti ni Josefa, ngu mhaka yeto, totshe takwe ti ti tsimbila kha kwati, e zumba a txi thumela nyumbani ka nyamne wakwe wa Muegipta.

3Nyamne wakwe a to khata ku ti wona ti to Mkoma a ti ti kumweko ni Josefa, ni ti to wa mninga mathomo ka totshe ti a ti mahako. 4Josefa a to mana kusizeka masoni ka Potifari, se e mahwa txithumi txa kuthumela ene. Potifari a mmahile mthangeli wa nyumba yakwe, ni wa sotshe si si nga ti mlumba. 5Kukhukhela ka txikhati txi Josefa a nga vekwa ha wukhaloni ko xayisa m'ti wa Potifari ni sotshe si si nga ti mlumba, Mkoma a to katekisa nyumba ya Muegipta, ngu mhaka ya mathomo a Josefa. Kateko ya Mkoma yi to hokela sotshe si a nga ti naso ha m'tini kwakwe, ni thembweni kwakwe. 6Konaho Potifari a to ningela manzani ka Josefa, sotshe si a nga ti naso, kambe a siswi a txi khatala ngu txilo, hahanze ka si a nga ti fanela kudya. Josefa a ti ti ni txiemo txo khaleka, kambe a ti ni khohe yo tshura. 7Msana ka totshe tiya, msikati wa Potifari, nyamne wakwe, a to khata kuwonetela Josefa ngu ku mnavela, e m'gela tiya:

“Otela ni nani!”

8Kambe Josefa a to lamba, a txi gela wule wamsikati wa kata nyamne wakwe, a txi khene:

“Ngako ni diho hawa, nyamne wangu kha vileli txilo ka totshe ti ti mahekako m'tini hawa kwakwe, asi vekile manzani kwangu sotshe asi si mlumbako. 9Kha nga ho mmwani i ku wa hombe ha m'tini kwakwe, hahanze kwangu: Kha txi nga ho txi a ni tsimbako ku txi gwesa, hahanze kwako awe dwe, nguko u msikati wakwe. Ni nga sikotisa kutxani kumaha to biha ta hombe to ngeto ni kuonhela Txizimu kani?”

10Hambiko ene a nga ti wuyelela, ku m'dhana ditshiku ni ditshiku, kambe Josefa kha nga tumela kuotela nayo. 11Ngu dimwani ditshiku, Josefa a to wulela nyumbani kasi kuthuma mthumo wakwe wa txiheno, kambe ku ti si nga ho mmwani m'thu ha m'tini. 12Msikati wa Potifari a to ñola Josefa ngu dibhaji dakwe, a txi khene:

“Otela ni nani!” Aniko Josefa a to leka dibhaji dakwe manzani ka msikati wa Potifari, e thava a txi huma hahanze. 13A di woni ti to Josefa a lekile dibhaji dakwe manzani kwakwe, a to thava, 14e dhana vathu va ha m'tini kwakwe a txi va gela tiya:

“Wonani! Potifari a hi wuyisete Muhebheru wuwa, se wa maha tawalo. Ene a tile kwangu e lava kuotela ni nani, aniko ni pekile huwa ya hombe, 15se ngako a di ni engisile ni txi peka huwa, a to siya dibhaji diya dakwe manzani kwangu a txi huma, e thava ngu kututuma.”

16A to veketa dibhaji da Josefa kala kuza e wuya mwamna wakwe ha m'tini. 17Sekoko a to m'geletela ona mapswi ale, a txi khene:

“Txithumi txiya txa Muhebheru u nga ni wuyisela hawa ha m'tini, txi tile kwangu, txi ta ni ruketela. 18Se ngako ni di kwangute ni txi peka huwa, txona txi to leka dibhaji da txona kwangu, txi txi thava.”

19Mbimo yi Potifari a nga engisa ti mkatakwe a nga m'geletela, ta ku khene:

“Wona ati txithumi txiya txako txi nga maha kwangu,” a to henya ngutu. 20Nyamne wa Josefa a to rumela ti to e ñolwa a txi khotelwa, amu ku nga ti ni sibotxhwa sa mfumeli, eya khotelwa naso kona, 21#Wona ni ka: Mith. 7:9. Mkoma a ti ti kumweko ni Josefa, a txi telwa ngu wumbilu ngu ngene, a txi maha ti to e mana mathomo, masoni ka mxayisi wa mkora. 22Mxayisi wa mkora a to khata kuthemba Josefa, e mninga mtamo txitimwi ka sibotxhwa sotshe, asi si nga ti mkorani mule, ni totshe ati ti nga txi fanela kuthumwa mkoranimo. 23Mxayisi wa mkora a ti si karateki ngu txilo, totshe ti ti manzani ka Josefa, nguko Mkoma a ti ti kumweko nayo, a txi katekisa mithumo yotshe yile a nga ti yi maha.

Currently Selected:

Genesisi 39: BEC2016

Highlight

Copy