Genesisi 29
29
Kumanana ka Jakobe ni Rakeli
1Sekoko Jakobe a to teka nzila ya kuya ka vathu va Wutxani. 2A to wona txisima libalani, hafuhi ka txona ku di mbambamete mitxhambi yiraru ya tinvuta; i ti ti ka txisima txonetxo va nga ti ti reka mati a kuninga mitxhambi yawe, yi txi sela. Dirigwi di va nga txi fenengeta ngu dona txisima i ti da hombe. 3Yi ti ti manana koneho yotshe mitxhambi, vadyisi va ti ti vhunungula dirigwi, va txi di thavisa ha txisofuni ka txisima, va txi rekelela mati a kuninga mitxhambi, yi sela, se ngu msana ve tshumela va txi di wuyisa ha wukhaloni ka dona. 4Jakobe a va wotisile a txi khene:
“Vanathu, mi huma hani kani?”
Va to xamula va txi kha vona: “Hi va Harani.”
5A to va wotisa kambe, a txi khene:
“Ma m'ziva Labhani, mwana Nahori, kani?”
Va to kha vona: “Ha m'ziva.”
6Jakobe a va wotisile kambe, a txi khene:
“Ene wa hanya kha kwati kani?” Va to xamula kambe va txi kha vona:
“Ina ene, wa hanya kha kwati. Wona, ndiyo Rakeli mwanana wakwe, a tako ni tinvuta.”
7Sekoko Jakobe a to va gela ku khene:
“I ngadi mitshikari, hi nga mbimo yo sengeleta mitxhambi yi txi ya m'tini. Ningani mati sihari si txi sela, mi txi tshumela mi dyisa.” 8Va xamute va txi kha vona:
“Kha hi ti mahi eto, na kusanzi kutshangana yotshe mitxhambi, ngako yi di tshanganile yotshe mitxhambi, ngu kona hi nga sikotako kurindilita dirigwi, hi di thavisa ha txisimani, hi ninga mati tinvuta ti sela.”
9Jakobe a di ngadi a txi bhula navo, Rakeli a to hoka ha txisimani ni mtxambi wa tinvuta ta tate wakwe, nguko ene i ti m'dyisi. 10Ngako Jakobe a di woni Rakeli, mwanana wa tatanyani wakwe Labhani, ni tinvuta ta tatanyani wakwe Labhani, a to tshuketa hafuhi ka txisima, e rindilita dirigwi ngu ha txisofuni ka txisima, e reka mati e ninga mtxhambi wa tinvuta ta tatanyani wakwe Labhani, ti txi sela. 11Jakobe a to pswopswa Rakeli, se a txi kwangula, a txi dila. 12Sekoko Jakobe a to gela Rakeli, a txi khene:
“Ani ni dixaka da tate wako, nguko ni mwanana wa Rebheka.” Sekoko Rakeli a to tutuma eya zivisa tate wakwe.
13Se ngako Labhani a di engisile ti to Jakobe, mwanana wa ndiyakwe, a to tutuma e m'hingeta, e mkhutarela ngu mawoko, a txi mpswopswa, e tsula nayo nyumbani kwakwe. Se Jakobe a to xawutela ka Labhani totshe ti ti nga maheka. 14Sekoko Labhani a to khene kwakwe:
“Kunene awe ni nani hi dirambu dimwedo ni nyama yimweyo.” Se Jakobe a to zumba nayo, mtxima wumwewo wotshe.
Jakobe e tekana ni Leya ni Rakeli
15Se Labhani a to womba ka Jakobe, a txi khene:
“Ina aku u ku dixaka, u nga ni thumela walo kani? Ni gele muholo wu u wu lavako.”
16Labhani a ti ni vanana vambidi vamahorana: “Mkomwakona a txi dhanwa ti to i Leya, ani mnanda i ti Rakeli.” 17“Kambe Leya a ti ni maso#29:17 Mwendo o lwala. o wumela, aniko Rakeli a ti ni txiemo txa txinene ni khohe yo tshura.” 18Jakobe a to randa Rakeli, se e xamula ka Labhani, a txi khene:
“Ani ni na kuthumela mtxhanu wa malembe ni mambidi, ngu mhaka ya Rakeli, mwanana wako wa mnanda.”
19Sekoko Labhani a ti khene:
“Ndinene ku mningela kwako, kupinda ku mningela ka nyamthuyo; awe zumba ni nani.”
20Ngu kumaha keto, Jakobe a to thumela Rakeli mtxhanu wa malembe ni mambidi; malembe awa a ma woni i di masiku amadotho, nguko a ti ti mramda ngutu.
21Se Jakobe a to womba ka Labhani, a txi khene:
“Ni ninge msikati wangu, nguko yi gumile mbimo yi hi nga langana, kasiku ani ni txi tekana nayo.”
22Sekoko Labhani a to ramba vathu va wukhalowo, e va mahela m'buso. 23Aniko ni wusiku Labhani a to teka Leya mwanana wakwe wa mkoma e mu heleketa ka Jakobe, awu a nga mu amukela, e otela nayo. 24Labhani a to mninga Zilpa, txithumi txakwe, kasiku e maha txithumi txa Leya, mwanana wakwe.
25Mangwanani ka kona ni mixo, Jakobe a to wona ti to i Leya a nga ningwa, se Jakobe a to womba ka Labhani, a txi khene:
“Njitxani u nga ni mahela kani? Ina kasi ani kha na thumela Rakeli m'tini kwako kani? Ngu kutxani u txi ni kanganyisa kani?”
26Labhani a to xamula, a txi khene:
“Kha ti maheki mu ditikoni kwathu, kuthanga mnanda e tsula wukati, na mkomwa kona a sanzi kutekwa. 27Awe heta divhiki diya da mtekano, sekoko ni na kuninga kambe mnanda wa kona, u txi mthumela nene mtxhanu wa malembe ni mambidi.”
28Se Jakobe a to maha toneto, e heta divhiki da Leya. Se ngako di di gumile divhiki da Leya; sekoko Labhani a to mninga Rakeli, eva msikati wa Jakobe. 29Labhani a to ningela kambe txithumi txakwe Bhiliha ka Rakeli kasiku e maha txithumi txakwe nene. 30Jakobe a to ziva kambe Rakeli, awu a nga mranda ngutu kupinda Leya; se a txi thuma kambe mamwani malembe a mtxhanu ni mambidi, m'tini ka Labani.
Vanana va Jakobe
31Txizimu ngako txi di woni ti to Leya kha randwi, txi to mninga kuveleka, kasi Rakeli a zumbile i di txifule.
32Leya a to mana txirumbu e veleka mwanana wa mfana, awu a nga mraya ditina daku#29:32 Ti wombako ku Naiyo mwanana. i Rubheni, nguko, ene a wombile ku khene:
“Txizimu txi woni kupandiseka kwangu. Konkuwa, mwamna wangu a na ni randa.” 33Se a to mana kambe txirumbu e veleka mwanana wa mfana, a txi khene:
“Mkoma a engisile ti to ani kha ni randwi, se e ni ninga kambe wuwa. Se a to mraya ditina daku#29:33 Ti wombako ku wa engisa. i Simiyoni.”
34A to engeta kambe e mana txirumbu txa wuraru, e veleka mmwani mwanana, a txi khene:
“Konkuwa mwamna wangu a na namarela kwangu, nguko ni m'velekete mazambi mararu, ngu kumaha keto, a to mraya ditina daku#29:34 wombako ku hotshe. i Levhi.”
35A to engeta kambe e mana txirumbu txa wumune, e veleka mwanana wa mfana, a txi khene:
“Konkuwa ni na dhumisa Mkoma Txizimu.” Ngu mhaka yeto a mrayile ditina daku#29:35 Ti wombako ku kudhumisa. i Judha. Sekoko a to leka kuveleka.
Currently Selected:
Genesisi 29: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
