Genesisi 28

1Se Isaake a to dhana Jakobe, e mkatekisa a txi mninga mthetho wa ku khene:

“U nga lowole msikati hagari ka vanana va Vakanana. 2Khukha u txi tsula Padhani-Aramu, nyumbani ka Bhetuweli, tate wa mame wako, u na ya langa kona msikati, hagari ka vanana va Labhani, ndiyakwe mame wako. 3Txizimu txa mtamo wotshe txi na ku katekise, txi txi kuninga liveleko lo tala, u txi anda, u txi maha tate wa tihunzu to mbi balwa. 4#Wona ni ka: Gen. 17:4-8. Txizimu txi na ku ninge awe ni liveleko lako, kateko ya Abrahamu, kasiku u txi teka ditiko di u nga zumba ka dona, di maha dako, adi Txizimu txi nga ninga Abrahamu.”

5Isaake a to salisana ni Jakobe, se Jakobe a to teka nzila ya kuya Padhani-Aramu, m'tini ka Labhani, mwana Bhetuweli,#28:5 Mwendo: siro. muaramu, ndiya ya Rebheka, mame wa Jakobe ni Esawu.

Esawu e tekana ni mwanana wa muhorana wa Ismayeli

6Esawu a to tiziva ti to Isaake a katekisile Jakobe, ni tito, a mrumete ditikoni ka Padhani-Aramu, kasi ku eya teka kona msikati. Se ngako a di mkatekisile, a mningile kambe mthetho wa ku khene: “U nga teke msikati hagari ka vanana vo velekwa Kanana.” 7Jakobe a to engisa milayo ya tate wakwe ni ya mame wakwe, se e khukha a txi ya Padhani-Aramu. 8Esawu a ti zivile kambe ti to mahorana a Kanana kha ma tsakisi tate wakwe Isaake. 9A to tsula ka Ismayeli, eya teka Mahalati, mwanana wa muhorana wa Ismayeli, mwana Abrahamu, i ku ndiya ya Nabhayoti, a txi maha msikati wakwe, hahanze ka vale a nga ti navo ngu kale.

Mloro wa Jakobe ditikoni ka Bheteli

10Jakobe a to khukha Bherisebha e tsula Harani. 11Se ngako a di hokile ka wukhalo wokari, a to navela kuhumula konaho, nguko se ditambo di ti swite. A to teka dirigwi dimwedo ka wona wukhalowo, e di maha txikhigelo txa msungo wakwe, a txi otela. 12#Wona ni ka: Joh. 1:51. Se a to lora a txi wona dinera di nga emiswa ha mafuni, di txi ya khigetela nzumani, ngu tshokani ka dona, se tingelozi ta Txizimu ti txi kwela ni kutxhika ngu dona. 13#Wona ni ka: Gen. 13:14. Ngu txitimwi ka dinera Mkoma a ti emile, se, a txi khene:

“Ani ngani Mkoma, Txizimu txa Abrahamu, tate wako, ni Txizimu txa Isaake. Ditiko di u nga otela ka dona, ani ni na di ningela kwako ni ka liveleko lako. 14#Wona ni ka: Gen. 12:3; 22:18. Liveleko lako li na tala nga lithulu la mafu, u na anda kala mswa-ditambo, ni wutxani, kala wuphemba ni wulambwe, ni tixaka totshe ta ha mafuni ti na katekiswa ngu mhaka yako ni mhaka ya liveleko lako. 15Ani ni ni nawe, kambe ni na kuxayisa hani ni hani u no maneka u di kona, ni na ku wuyisa ka ditiko diya, nguko kha ni na mbi kuleka na ni sinzi kumaha ati ni nga kugela.”

16Jakobe a to wuka ngu ha wukoheni kwakwe e womba tiya: “Kha ditshuri Mkoma a ho ka wukhalo wuwa, aniko ani ni si ti zivi.” 17A to talelwa ngu kuthava, a txi khene: “Wukhalo wuwa wa thisa ngutu! Ayiya ngu yona Nyumba ya Txizimu ni ditimba da nzumani.”

18Sekoko Jakobe a di wukile ni mixo, a to teka dirigwi di a nga ti di mahile txikhigelo, e di emisa di maha txialakanyiso, e thela mtona tximwi ka dona. 19Se wukhalo wuwa a wu rayile ditina daku#28:19 Ti wombako ku “Nyumba ya Txizimu”. i Bheteli; kambe ditina da didhoropa dile, kale di ti dhanwa ku i Luzi. 20Sekoko Jakobe a mahile txixambanyo txiya: Ngako Txizimu txi di ni nani, txi txi ni xayisa ka nzila yi ni ku ka yona, ngako txi txi ni ha sakudya sa kudingana, ni simaha sa kuambala; 21ngako ni txi tshumelela m'tini ka tate wangu ni di mtomi, konaho Mkoma a na va i di Txizimu txangu; 22ni dirigwi diya ni ngadi emisa di txi maha txialakanyiso, di na va i di Nyumba ya Txizimu, sotshe si u no ni ninga, ni na ku humisela sa wugumi ka sona.

Currently Selected:

Genesisi 28: BEC2016

Highlight

Copy