Genesisi 26

Isaake ditikoni ka Vafilista

1Ku to humelela yimwani nzala ditikoni, hahanze ka nzala yo khata, yi nga humelela ka mbimo ya Abrahama, se Isaake a to tsula Gerara ka Abhimeleki, mfumeli wa Vafilista. 2Mkoma Txizimu a ti wonekisile ka Isaake, a txi m'gela tiya:

“U nga relele u txi ya Egipta; zumba ka ditiko di ni no kukomba dona. 3U nga sikota kuaka ka ditiko diya, ani ni na va ni nawe, kambe ni na kukatekisa. Nguko otshe matiko awa ni na kuninga awe ni liveleko lako, ni txi hetisa txixambanyo txi ni nga txi maha ka Abrahamu, tate wako. 4#Wona ni ka: Gen. 22:16-18. Ani ni na maha ti to liveleko lako li txi tala ha mafuni nga tinyeleti ta nzumani, otshe matiko awa ni na ninga vatukulu vako, se ngu mhaka yawe, mifumo yotshe ya ha mafuni yi na katekiswa, 5nguko Abrahamu a engisile dipswi dangu, kambe a veketile milayo yangu, sirumo sangu, ni sileleto sangu, ni mithetho yangu.”

6Ti di ngeto, Isaake a to zumba Gerara. 7#Wona ni ka: Gen. 12:13; 20:2. Se vavamna va wukhalo wule, va to mu wotisa madingano ni msikati wakwe, ene a to khene: I ndiyangu, ene a ti ti thava kuwomba tito: “Msikati wangu,” ngu kupimisa ti to vathu va wukhalowo, va nga m'daya ngu mhaka ya Rebheka, nguko ene a ti tshurile ngutu.

8Ku di pindile mbimo ya hombe koneyo, ngu txikhati txokari, Abhimeleki, mfumeli wa ditiko da Vafilista, ngako a txi solela hahanze ngu ha difasitelani, a to wona Isaake a txi khutarela Rebheka msikati wakwe. 9Sekoko Abhimeleki a to dhana Isaake a txi khene:

“Kha ditshuri, ene msikati wako; ngu kutxani u txi khawe: I ndiyangu, kani?” Isaake a xamute a txi khene: “Ni ti ko thava kudawa ngu mhaka yakwe.”

10Abhimeleki a to engeta, a txi khene:

“U hi mahete txani toneto kani? Kudotho nga m'thu wokari wa ka kwathu a di otete ni msikati wako, se konaho u ndi nava u di hi wuyisete mnandu.”

11Se Abhimeleki a to veka mthetho ka vathu vakwe votshe, a txi khene: “Awule a no gwesa Isaake ni msikati wakwe a na dawa.”

12Isaake a dimile e phaya ka ditiko dile, se a txi elula ka dona dilembe dile,#26:12 Mwendo: ka dizana. so pinda ngu 100 ka sile a nga phaya, nguko Mkoma a mkatekisile. 13Ene a to khata kuhumelela e simama a txi kula kala kuza e maha nyatithombe wa hombe. 14Ene a ti ni mitxhambi ya tinvuta, tihomu to tala ni sithumi sasingi. Ngu mhaka ya toneto, Vafilista va to khata ku m'bavela. 15Sisima sotshe si si nga ti ketwe ngu sithumi sa Abrahamu, tate wakwe, Vafilista va to si kuletela, ve si tata ngu mafu. 16Abhimeleki a to womba ka Isaake, a txi khene:

“Khukha ditikoni kwathu, nguko se u ni mtamo ngutu kupinda athu.”

17Sekoko Isaake a to khukha konaho, eya zima matenda akwe mkovani ka Gerara, e zumba kona. 18Isaake a to kuha sisima si si nga ti ketwe ngu sithumi sa Abrahamu tate wakwe, asi Vafilista va nga ti si kuletete, msana ka kufa ka Abrahamu, se va to si ninga kambe ona matina ale tate wakwe a nga ti si ningile.

19Sithumi sa Isaake si to kela mu mkovani, se si tumbula txisima txa mati o khulunga. 20Vadyisi va niya Gerara, va to khata kuphikizana ni vadyisi va sifuyo sa Isaake, va txi kha vona: “Aawa mati athu!” Ti di ngeto, a to raya txisima txile#26:20 Ti wombako ku kulwisana. ditina daku i Eseki “Kuphikizana”: Nguko va phikizanile ni vadyisi ngu mhaka ya txisimetxo.

21Sekoko va to kela tximwani txisima, aho nikona, ku mahekile diguwa da kuphikizana ngu mhaka ya txisima; Isaake a txi rayile ditina daku,#26:21 Ti wombako ku kuvengana. i Sitina.

22Ti di ngeto, Isaake a to khukha hale, eya kela tximwani txisima, aha ku nga mbi va ni kuphikizana, se e txi dhana ku i Rehobhoti,#26:22 Ti wombako ku kuanamisa. a txi khene:

“Nguko Mkoma a hi ningile wukhalo wo thandawuka, se hi na velekela ditikoni muwa.”

23Koneyo, Isaake a to khukha a txi ya Bherisebha. 24Se Mkoma a to woneka kwakwe ka wona wusiku wule, e m'gela tiya:

“Ani ngani Txizimu txa Abrahamu, tate wako; u nga thave txilo, nguko ani nipune ni ni nawe. Ani ni na kukatekisa, ni na andisa liveleko lako, ngu mhaka ya Abrahamu txithumi txangu.”

25Sekoko Isaake a to aka txiluvelo koneho, e dhumisa ditina da Mkoma, a txi zima ditenda dakwe; se sithumi sa Isaake, si to kela txisima kona hale.

Isaake ni Abhimeleki ve maha txitumelelano

26 # Wona ni ka: Gen. 21:22. Abhimeleki a txi ta ngu Gerara a to wona Isaake, a di ni Okozati, mndoni wakwe, ni Fikoli, mthangeli yakwe ya dibutho da yimbi. 27Isaake a to va wotisa, a txi khene:

“Mi tela txani kwangu, anu mi ni vengako, na kambe mi ni tutumisile hagari kwanu, kani?”

28Vona va to xamula, va txi kha vona:

“Ha ti wona ngu ditshuri ti to Mkoma Txizimu, a ni nawe, se hi khathu: Ta laveka ti to athu ni nawe hi txi xambanyelana, hi txi maha txitumelelano hagari kwathu. 29Hi thembise ti to khu na mbi hi mahela kubiha ni ka kudotho, nga ti nathu hi nga mbi kukaratisa, hi kuleka u khukha ngu kuthutha. Se u katekisilwe ngu Mkoma Txizimu.”

30Sekoko Isaake a to va lulamisela m'buso, se vona ve dya, ve sela. 31Va to wuka ni mixo, ve mahelana txixambanyo. Ngu msana Isaake a to salisana navo, se vona va to khukha m'tini kwakwe ve msiya ngu kudikha.

32Ngu ka donedo ditshiku, sithumi sa Isaake si to mu wuyisela m'biko wa txisima txi va nga kela, va txi kha vona: “Hi mani mati.” 33Se txisimetxo,#26:33 Ti wombako ku txixambanyo. Isaake a txi dhani ku i Sebha. Ngu konaho di khukhelako kona ditina da didhoropa,#26:33 Vaheb. Bheyeri-Sebha, ti wombako ku txisima txa txixambanyo. daku i Bherisebha, kala ka ditshiku da nyamsi.

Vasikati va Esawu

34Mbimo yi Esawu a nga va ni tanga ya mune wa magumi a malembe, a to teka vasikati vambidi, i ku Judhite, mwana Bheyeri, Muheti, ni Bhasemate, mwana Eloni, Muheti. 35Vona va to va nga sikarato mbiluni ka Isaake ni ka Rebheka.

Currently Selected:

Genesisi 26: BEC2016

Highlight

Copy