Genesisi 18
18
Txizimu txi thembisa mwanana ka Abrahama
1Ngu msana Mkoma a to woneka ka Abrahamu mikusuni ka Mambre, mbimo yi a nga ti khalahatshile ha txikeni ka ditenda dakwe, ni mitshikari,#18:1 Mwendo: ka lisani la hombe la ditshiku. na ditambo di txi hisa ngutu. 2Se a to gula maso, e wona majaha mararu ma di emile, hafuhi kwakwe, neti a nga va wona, a to khukha ha txikeni ka ditenda dakwe e va hingeta, se a to ti wisa hahatshi masoni kwawe 3a txi khene:
“Awe nyamne wangu, na ku kombela, ngako ni di mani kukateka masoni kwako, u nga pinde ngu ha m'tini ka txithumi txako, u sa nga ema. 4Ni na tisa mati amadotho, kasi mi nata samba mikondo, mi txi humula, mtsudini ka mndonga wuwa. 5Ngako mi nga pinda ngu hawa ka txithumi txanu, ani ni na khata ngu ku mi tisela txikhwemu txa dipawu, kasi mi nata malata mnyoka, se ngu msana mi txi longoloka ni dipfhumba danu.” Vona va to kha vona:
“Maha tona eto u ti wombako.”
6Abrahamu a to tsula ngu kukuluveta ditendani a txi ya gela Sara, a txi khene:
“Kuluveta u txi teka tipimo tiraru ta mpupu wa wunene, u txi vhuva, u bhika simbwanda!”
7Se Abrahamu a to tutuma eya txibalani, eya ñola dirole da dinene do nona, e di ningela ka txithumi, txi to kuluveta ku di lulamisela. 8Se Abrahamu a to teka kambe mafura, ni masi, ni nyama ya dirole. Ayi yi nga lulamiswa, eya si veka hafuhi kwawe, mtsudini mule ka mndonga, ene e zumba a di emile, na vona va txi dya.
9Se va to kha vona kwakwe:
“Ahani msikati wako Sara kani?”
Ene a to khene: “A ditendani mule.”
10 # Wona ni ka: Var. 9:9. Mmweyo wawe a to khene:
“Ni na wuya kambe kwako dilembe di di tako, ngu yona yiya mbimo, se msikati wako Sara a na va a di ni mwanana wa dizambi.” Sara a ti ti engisela a di ha txikeni ka ditenda, ngu msana ka Abrahamu. 11Ka yoneyo mbimo, Abrahamu ni Sara va ti kumbile ngutu, Sara a ti pindetwe ngu mbimo ya kuveleka vanana. 12#Wona ni ka: 1 Ped. 3:6. Ti di ngeto, Sara a to seka mbiluni kwakwe, a txi khene:
“Akuwa ni nga kumba, ni mwamna wangu nene, i ku txikhovana, ina ni nga ngadi ni txi pfa litsako lonelo kani?”
13Aniko Mkoma a wombile ka Abrahamu, a txi khene:
Ngu kutxani Sara a sekako, a txi khene: Ina ngu ditshuri ni nga veleka mwanana, konkuwa ni nga kumba kani? 14#Wona ni ka: Luk. 1:37. Ina txi ho txo tandeka ka Mkoma kani? Ka dilembe di di tako, ngu yona yiya mbimo, ni na wuya kambe kwako, se Sara a na va a di ni mwanana wa dizambi. 15Sara ngu kuthava, a kanetile, a txi khene:
“Ani kha na seka.” Aniko Mkoma a engetile, a txi khene:
“Ngu ditshuri, awe u sekile.”
Abrahamu a kombela kutsetswa ka Sodhoma
16Va di khukhile vavamna vale, va to komba kuya Sodhoma, Abrahamu a ti ti tsimbila navo, kasi ku va heleketa. 17Se Mkoma a to khene: “Ina ni nga sisela Abrahamu ati ni lavako ku ti maha, kani? 18Kambe nguko Abrahamu a na va i di nyampanze wa mfumo wa hombe ni wa mtamo, kambe ngu mhaka yakwe, yotshe mifumo ya ha mafuni, yi na katekiswa. 19Nguko ani ni msawute kasi ku a txi gondisa vanana vakwe, ni votshe va ka kwawe msana kwakwe, kasiku ve maha kuranda ka Mkoma, ni kumaha kululama ni wunene, se ngu mhaka yeto, ani Mkoma, ni na maha ka Abrahamu ati ni nga mthembisa.”
20 Mkoma a to khene kambe ka Abrahamu:
“Huwa ya kumangalela Sodhoma ni Gomora nja hombe ngutu, txionho txawe txa thisa ngutu. 21Ni na relela kasi kuya wona tito, ina ngu ditshuri va ti mahile ti ti mangalwako ngu tihuwa ti ti nga kwangula, ti txi hoka tinzeveni kwangu, kani? Ngako i di tona, ni na zumba ni txi tiziva.”
22Sekoko vathuvo va to khukha konaho va txi ya Sodhoma, Abrahamu a to sala a di emile masoni ka Mkoma. 23Se Abrahamu a to tshuketa hafuhi, a txi khene:
“Ina u na lovisa valulami kumweko ni vabihi kani? 24Idiku vo maneka mu didhoropani mtxhanu wa magumi a vathu vo lulama. Ina u nga lovisa dotshe didhoropa, u txi lamba kudivalela ngu mhaka ya valulami va mtxhanu wa magumi kani? 25Lambi, ti nave kule ni nawe eto ta kufuvisa valulami kumweko ni vabihi, u txi teka mlulami ni m'bihi u txi va maha vamwevo. Eyo mapimo ma nave kule ni nawe. Mlamuli wa ditiko dotshe, kha na mbi lamula ngu kululama kani?”
26Sekoko Mkoma a to khene:
“Ngako ni txi ya mana didhoropani ka Sodhoma mtxhanu wa magumi a vathu vo lulama ni na divalela dotshe didhoropa ngu mhaka yawe.”
27Abrahamu a wombile kambe, a txi khene:
“Ani na tsana ni txi womba kambe ka Mkoma wangu, ani ni ku lithulu ni dikhuma. 28Ngako ku txi pwateka mtxhanu wa vathu ka vale va mtxhanu wa magumi vo lulama, ina u nga lovisa dotshe didhoropa ngu mhaka ya vale va mtxhanu va pwatekako kani?”
Mkoma a to xamula, a txi khene:
“Ahim-him, kha ni na mbi va lovisa, ngako ni txi mana mune wa magumi ni mtxhanu wa vathu vo lulama.”
29Abrahamu a m'gete kambe a txi khene:
“Se ku txi maneka mune wa magumi a vathu ko?” Se Mkoma a to khene:
“Kha ni na mbi mahela kubiha didhoropa, ngu mhaka ya vale va mune wa magumi.”
30Abrahamu a ti khene:
“Mkoma wangu a nga henye, ngako ni txi tshumela ni womba-womba: Se ku txi maneka magumi mararu ko?”
Mkoma a to xamula a txi khene:
“Kha ni na mbi ti maha eto, ngako ni txi mana magumi mararu a vathu vo lulama.”
31A to simama kambe Abrahamu a txi khene:
“Na tsana ni womba ka Mkoma wangu: Se ku txi maneka magumi mambidi ko?”
Mkoma a xamute a txi khene: “Kha ni na mbi lovisa didhoropa, ngu mhaka ya vona vale va magumi mambidi.”
32Abrahamu a to khene kambe:
“Mkoma wangu a nga henye, ngako ni txi womba kambe ngu txikhati txo gwitisa. Idiku ko maneka digumi ko?” Mkoma a xamute a txi khene:
“Kha ni na mbi lovisa didhoropa, ngu mhaka ya vona vale va digumi.”
33 Mkoma, ngako a di gwitile kuwombawomba ni Abrahamu, a to khukha e tsula, se Abrahamu a tshumete a txi wuya m'tini kwakwe.
Currently Selected:
Genesisi 18: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
