Genesisi 17

Txitumelelano ni wukwera

1Mbimo yi Abramu a nga va ni tanga ya mtxhanu ni mune wa magumi ni mtxhanu ni mune a malembe, Mkoma a to humelela masoni kwakwe, a txi khene:

“Ani ni Txizimu txa Mtamo-Wotshe, u fanete kuhanya masoni kwangu, u txi ni engisa ngu kuhetiseka. 2Ani ni na maha Txitumelelano hagari kwangu ni nawe, kambe ni na andisa ngutu liveleko lako.”

3Sekoko Abramu a to wa hahatshi ngu mbanza; Txizimu txi to womba kwakwe txi txi kha txona:

4“Ngu didhawa dangu, nditxe txitumelelano txi ni txi mahako ni nawe, u na va tate wa matiko o tala. 5#Wona ni ka: Var. 4:17. Kambe khu na mbiswa u txi dhanwa ku u Abramu, aniko ditina dako u na va u di Abrahamu, nguko ani ni na kumaha tate wa matiko o tala. 6Ani ni na andisa ngutu liveleko lako, ngu ngawe ni na tumbulukisa mifumo yo tala, hambi vafumeli va na humela kwako. 7#Wona ni ka: Luk. 1:55. Ni na tsanisa Txitumelelano txangu ni nawe, ni lihunzu lako msana kwako, Txitumelelano txiya, txi na va txo mbi guma, se ani ni na va Txizimu txako ni txa lihunzu lako, msana kwako. 8#Wona ni ka: Mith. 7:5. Ni na kuninga awe, ni lihunzu lako, msana kwako, ditiko diya u zumbako ka dona, dotshe ditiko da Kanana di na va ditiko danu, ngu hale ku si gwitiko, kambe ni na va Txizimu txanu.”

9Txizimu txi wombile ka Abrahamu, txi txi kha txona:

“Awe u na vekisa Txitumelelano txangu, awe ni lihunzu lako, msana kwako, kala kupinduka. 10#Wona ni ka: Mith. 7:8; Var. 4:11. Txitumelelano txangu atxiya mi fanelako ku txi xayisa hagari kwangu ni nawe, awe ni lihunzu lako, msana kwako, ngu txiya: Otshe mazambi anu ma fanete kuyiswa wukwerani. 11Mi na yisa wukwerani m'thu, ngu kuwila didhowo da magwito ka nyama yakwe, etxo txi na va txikombiso txa Txitumelelano txangu ni nanu. 12Msana ka mtxhanu wa masiku ni mararu a kuvelekwa, votshe vanana va vafana va na yiswa wukwerani, kukhukhela ka wule a velekwako m'tini kwako, kala ka wule a xawako ngu male ka vamatiko, awule i ku si nga wa lihunzu lako. 13Va fanete kuyiswa wukwerani avale va nga velekwa nyumbani, ni vale va nga xawa ngu male. Atxiya ngu txona Txitumelelano txangu txo mbi na magwito, ha mmidi kwanu. 14M'thu wuhi ni wuhi wa wamwamna, awule a nga mbi yiswa wukwerani, awule a nga mbi wilwa didhowo da magwito ka nyama yakwe, a na tutumiswe hagari ka m'ti wa lihunzu la ka kwawe, nguko a eyisile Txitumelelano txangu.”

15Txizimu txi to kha txona kambe ka Abrahamu:

“Msikati wako Sarayi, khu na mbiswa u txi m'dhana ku i Sarayi, aniko#17:15 Ti wombako ku mthangeli wa txisikati. i nave Sara ditina dakwe. 16Ani ni na mkatekisa, kambe ngu ngene ni na kuninga mwanana wa dizambi, ani ni na mkatekisa ene a na va mame wa mifumo, ngu kwakwe ku na huma vafumeli va vathu.”

17Sekoko Abrahamu a to ti wisa hahatshi ngu mbanza na a txi seka, nguko a txi ti wotisa mbiluni kwakwe, a txi khene: “Ina wamwamna wu a ku ni 100 wa malembe a nga ngadi e veleka mwanana kani? Ni Sara wu a ku ni mtxhanu ni mune wa magumi a malembe, a nga ngadi e veleka mwanana kambe kani?” 18Abrahamu a to khene ka Txizimu:

“Ayiwe! A na hanye Ismayeli masoni kwako!”

19Txizimu txi to mxamula txi txi kha tona:

“Ahim-him msikati wako Sara ngene a no kuvelekela mwanana wa mfana, se awe u na mraya ditina daku#17:19 Ti wombako ku kuseka. i Isaake, ni na emisa Txitumelelano nayo, atxi txi no va Txitumelelano txo mbi guma, kasiku ni va Txizimu txakwe, ni txa lotshe liveleko lakwe, msana kwakwe.” 20Ngu didhawa da Ismayeli nene, ni engisile txikombelo txako, ni na mkatekisa, ni andisa ngutu liveleko lakwe, a na veleka digumi da vakoma ni vambidi, ani liveleko lakwe li na maha mfumo wa hombe. 21Aniko Txitumelelano txangu ni na txi maha ni Isaake, awu a no velekwa ngu Sara dilembe di di tako, ka yona yiya mbimo. 22Ngako Txizimu txi di gwitile kuwombawomba ni Abrahamu, txi to khukha txi msiya, txi guleka. 23Sekoko Abrahamu a to teka Ismayeli, mwanana wakwe, ni votshe vavamna vale va nga velekwa m'tini kwakwe, ni votshe vale va nga xawa ngu male, votshe va mazambi, ava va kuho m'tini kwakwe, a to va yisa wukwera, ka donedo tshiku, nga ti Txizimu txi nga mleletisa tona.

24Abrahamu a ti ni malembe ya mtxhanu ni mune wa magumi ni mtxhanu ni mune a malembe, ni mtxhanu ni mune a tanga, mbimo yi a nga yiswa wukwerani 25se Ismayeli, mwanana wakwe, a ti ni tanga ya digumi da malembe ni mararu, mbimo yi a nga yiswa wukwera. 26Ka donedo ditshiku, Abrahamu ni mwanana wakwe Ismayeli, va to yiswa wukwera 27ni otshe mazambi a nyumbani kwakwe, vanana va nyumbani, mwendo vale va nga xawa ngu male ka vamatiko, va to yiswa wukwera kumweko nayo.

Currently Selected:

Genesisi 17: BEC2016

Highlight

Copy