Genesisi 16

Hagari ni Ismayeli

1Sarayi, msikati wa Abramu, a ti sa nga m'velekela mwanana. Aniko a ti ni txithumi txa Muegipta, txi nga ti dhanwa ku i Hagari. 2Sarayi a to womba ka Abramu, a txi khene:

“Wona, Mkoma kha ni ninga ti to ni kuvelekela vanana. Ngu mhaka yeto, teka txithumi txiya txangu txa wamsikati; mwendo#16:2 Mwendo: ni na wuswa ngu ngene. ni na mana mwanana ngu ka txona. Se Abramu a to tumela dipswi da Sarayi.” 3Sekoko Sarayi msikati wa Abramu, a to teka Hagari, txithumi txakwe txa Muegipta, e txi ningela ka mwamna wakwe Abramu, eva msikati wakwe. 4Abramu a to amukela Hagari e zivana nayo, se Hagari e mana txirumbu. Mbimo yi Hagari a nga wona ti to ana ni txirumbu, a to khata kuwona nyamne wakwe Sarayi ngu maso a txieyiso. 5Sekoko Sarayi a to khene ka Abramu:

“Awe ngawe u fanelako kuwona mhaka ya kuruketelwa kwangu. Ni vekile txithumi txangu mawokoni kwako, se kukhukhela kuwa a nga wona ti to ana ni txirumbu, ani kha ni nga wa txilo masoni kwakwe. Txizimu txi na hi lamule ka mhaka yangu ni nawe!”

6Abramu a to womba ka Sarayi, a txi khene:

“Wona, txithumi txako txi manzani kwako. Maha ka txona nga ti u ti lavisako tona.” Sarayi a to khata ku mahela tshofu Hagari, ahawa ka kuza Hagari e thava masoni kwakwe. 7Ngelozi ya Mkoma yi to mana Hagari a di hafuhi ni txisima txi txi ku txiwulani, txisima txi txi ku hafuhi ni nzila ya kuya Suri, 8ngelozi yi to womba ka Hagari, yi txi kha yona:

“Hagari, txithumi txa Sarayi, u ta ngu hani, na u txi ya hani kani?” Ene a xamute, a txi khene: “No thava masoni ka nyamne wangu Sarayi.”

9Sekoko Ngelozi ya Mkoma yi m'gete yi txi kha yona:

“Tshumela u txi ya ka nyamne wako, u txi ya mthumela ngu kutiveka hahatshi.”

10Ngelozi ya Mkoma yi m'gete kambe yi txi kha yona:

“Ani ni na andisa ngutu vanana

va liveleko lako,

ti to kuwalo ni wammweyo

a no sikota ku va bala.”

11Ngelozi ya Mkoma, yi to kha yona kambe kwakwe: “U ni txirumbu, se u na veleka mwanana wa mfana,

u mraya ditina#16:11 Ti wombako ku Txizimu (txa) engisa. daku i Ismayeli,

nguko Mkoma a engisile kuxupheka kwako.

12Se ene a na#16:12 Vaheb. fana ni mbongola yo karata. fana ni mangwa,

a na zumba a txi lwisa votshe,

se votshe va na zumba va txi mlwisa;

a na humelela masoni ka votshe

vaakelani vakwe.”

13Se Hagari a to raya Mkoma wule a nga ti womba-womba nayo, ditina do khene:#16:13 mwenso Awe u Txizimu txi txi ni wonako. “Awe u Txizimu txo wonwa,” nguko u ti khawe: “Ina kha na wona Txizimu txi txi ni wonako kani?” 14Ngu mhaka yeto txisima txiya txi dhanwi ku#16:14 Ti wombako ku awule a hanyako a ni wonako. “Njisima txa Lahayi-Royi,” txona txi maneka hagari ka Kadhesi ni Bheredhi.

15Hagari a to velekela Abramu, mwanana wa mfana, se Abramu a rayile mwanana wakwe a nga velekwa ngu Hagari ditina daku i Ismayeli. 16Abramu a ti ni mtxhanu wa magumi ni magumi mararu a malembe, ni mtxhanu wa malembe ni dimwedo, mbimo yi Hagari a nga veleka mwanana wakwe Ismayeli.

Currently Selected:

Genesisi 16: BEC2016

Highlight

Copy