Mithumo 7

Sitefani, ngako a txi ti angulela

1Mphaxeli wa hombe a to mu wotisa, a txi khene: “Timhaketo ngu tona kani?”

2Sitefani a to xamula, a txi khene:

“Anu vanathu ni nanu vatata, ni engiseni! Txizimu txa wudhumo txi ti kombisile ka tate wathu Abrahamu, na a di ngadi Mesopotamiya, na a sinzi kuaka Harani, 3txi txi mu gela ku: ‘Rura ditikoni kwanu ni ka lixaka lako, u txi ya ka ditiko di ni no kukomba dona.’ 4Sekoko ene a to khukha ditikoni ka Vakaldheya, eya aka Karani. Kambe ngako tate wakwe a di fite, Txizimu txi mu rurisile txi mu tisa ka ditiko di anu mi nga aka ka dona konkuwa. 5#Wona ni ka: Gen. 12:7; 13:15; 15:18; 17:8. Aniko kha txa mninga thembwe kona hambi wukhaloanyana wu wu dinganako ku kandwa ngu mkondo; txi to mu thembisa dwe ti to txi na mninga dona, di maha thomba yakwe ni ya vatukulu vakwe msana kwakwe, hambiko a nga ti sanzi kuva ni mwanana. 6Txizimu txi mgete, txi txi kha txona: ‘Vatukulu vako va na ya luvela ditikoni ka vane, ve mahwa tikhumbi, ve xaniswa mndani ka mune wa mazana a malembe.

7Aniko ditiko di di nga va maha tikhumbi ni na di abanisa, kha Txizimu; se msana keto, va na huma va ta ni khozela ka wukhalo wuwa.’ 8Se Txizimu txi to mninga txitumelelano txa wukwera. Ngu konaho, Abrahamu, a di velekile Isaake a mu yisile wukwerani ngu ditshiku da wutxhanu ni mararu. Isaake a mahisile toneto ka Jakobe, se Jakobe nene e mahisa toneto ka vanana vakwe i ku vanyampande va tihunzu ta digumi ni timbidi ta Israyeli.”

9“Se vanana vava va Jakobe i ku vanyampande vathu va to va ni wukwele ka Josefa, ve mu xavisa, e yiswa Egipta, kambe Txizimu txi ti ni nene. 10Txi to m'hulukisa ka otshe makhombo akwe, txi mninga kateko ni wuzivi masoni ka Faro, mfumeli wa Egipta; se ene mfumeli a mmahile mfumeli wa Egipta ni wa yotshe nyumba yakwe. 11Se ku to humelela paya ni kuxaniseka ka hombe ditikoni ka Egipta ni Kanana, se vatate vathu ve pwata sakudya. 12Kambe, ku ti ngako Jakobe a di engisile ti to fulaho yiho Egipta, a to rumela kona vatate vathu do khata. 13Se ngako va di yite da wumbidi, Josefa a ti zivisile ka vanawe, se li txi zivaneka ka Faro lixaka lakwe. 14Se Josefa a to rumela vathu veya teka Jakobe, tate wakwe, ni otshe maxaka akwe, mtengo wawe i nga ti mtxhanu wa magumi ni magumi mambidi, ni mtxhanu wa vathu. 15Se Jakobe a to kwitima eya Egipta, eya fela kona, ene ni vatate vathu. 16Kambe sirumbi sawe si rwatwe si yiswa Sikemi, si ya tshotshwa diyivani ka Abrahamu, adiya a nga ti di xavile ngu male ya silivhela ka vanana va Hemori, tate wa Sikemi.”

17“Ngako yi nga ti hafuhi mbimo ya kutatiseka ka txithembiso txi Txizimu txi nga xambanyela Abrahamu, lixaka lathu li to kula ni kuanda Egipta, 18kala kuza kuhumelela mmwani mfumeli a nga ti sa m'ziva Josefa. 19Mkomeyo a xanisile lixaka lathu ngu wurindi: Tshofu yakwe yi mahile ti to vatate vathu ve tshotsha vanana vawe vapune kasiku va si ngadi ve hanya. 20Ngu yoneyo mbimo a to velekwa Mosi; ene i ti mwanana wo tshura masoni ka Txizimu. Se a wunjilwe mitxima yiraru nyumbani ka tate wakwe. 21Msana ka kuva a di tshotshilwe, mwanana wa muhorana wa Faro, a to mu rola eya mu wunja kasiku e maha mwanana wakwe. 22Mosi a gondisilwe wotshe wuzivi wa Vaegipta. Se i ti m'thu wa mtamo amu ka mapswi ni mu ka mithumo.”

23“Se mbimo yi a nga tshanganisa tanga ya mune wa magumi a malembe, a to pimisa mbiluni kwakwe kuendela vanawe, vanana va ka Israyeli. 24Se ngako a txi wona mmweyo wawe a txi xaniswa, a to muemela, e pharela ngu kudaya Muegipta. 25Se a ti ti alakanya ti to vanawe va na ti pfisisa ti to Txizimu txi na va hulukisa ngu dianza dakwe; aniko vona kha va ti pfisisa. 26Se ngu ditshiku di di londetako, a to mana vamwani vavambidi va txi lwa, se e va khongotela ngu ku va kamba, a txi khene: ‘Vavamna, mi va lixaka limwelo! Mi lwela txani kani?’

27Se awu a nga ti xanisa mkwawe a to retha Mosi, a txi khene: ‘I mani wu a nga kumaha mfumeli ni mlamuli txitimwi kwathu kani? 28U lava ku ni daya nga ku u nga daya Muegipta nyamnova kani?’ ” 29Se ka dona dipswi diya, Mosi a to thava eya maha muwuyi ditikoni ka Midhiyani; koneyo a ti ya veleka vanana vambidi va sizambiana.

30 # Wona ni ka: Eks. 3:1-10. “utingako ku di pindile mune wa magumi a malembe, ngelozi yi to ti wonekisa kwakwe txiwulani, mmangoni ka Sinayi, yi di mdhikilani ka txipopo txi nga ti tura. 31Sekoko Mosi ngako a txi wona tiya, a to xamala; se ngako a di tshuketile hafuhi kasiku e wonisisa, ku to pfala dipswi da Mkoma, di txi kha dona: 32‘Ngani Txizimu txa vatate vako, Txizimu txa Abrahamu ni txa Isaake ni txa Jakobe’. Mosi a to dhudhumela, asi tsani ni kuwona. 33Se Mkoma a txi khene kwakwe: ‘Thavisa masandazi mikondoni kwako, nguko wukhalo wu u nga ema ka wona, mafu o sawuleka. 34Ni woni kuxaniseka ka vathu vangu Egipta, ni kuketa kwawe ni ku pfite, se ni txhikile ku tela ku ta va hulukisa, se konkuwa ngono ni ta kuruma Egipta.’ ”

35“Mosi wuwa ngene wu va nga mkanyisa, va txi kha vona: ‘I mani wu a nga kumaha mfumeli ni mlamuli wathu kani?’ ” Ngene wu a nga rumwa ngu Txizimu kumaha mfumeli ni mtiruli wawe, ngu mtamo wa ngelozi yi yi nga mu humela txipoponi. 36Ngene a nga va humisa ngu kumaha sidiwukiso ni sikombiso ditikoni ka Egipta, ni Lineneni ko Bhilivila, ni txiwulani, mndani ka mune wa magumi a malembe. 37I ngadi ene Mosi awu a nga womba ka vanana va ka Israyeli, a txi khene: Txizimu txi na wusa hagari ka vananu mprofeti wo nga ani. 38#Wona ni ka: Eks. 19:1--20:17; Dhewut. 5:1-33. Ngu mbimo ya kusengeletana ka va ka Israyeli txiwulani, ngene Mosi a nga ema ni ngelozi, ayi yi nga womba-womba nayo mmangoni ka Sinayi, kumweko ni vatate vathu; ngene a nga amukela mapswi a wutomi, kasi ku ta hi ninga ona.

39Awule vatate vathu va nga lamba ku mu engisa, senikoko va to mu rethela kule, ve tshumelela Egipta ngu mialakanyo yawe, 40va txi kha vona ka Aroni: “Hi mahele sizimu si si no hi thangelela masoni nguko Mosi wu a nga hi humisa ditikoni ka Egipta kha hi ti zivi ti ti nga mu humelela.” 41Se ka ona ale masiku, va to wumba dirole ve phaxa mhamba masoni ka txithombe, ve khozela ngu kutsaka mthumo wa manza awe. 42Aniko Txizimu txi to va tshuralela txi va ningeta kukhozelani ka sikwata sa tiyimbi sa nzuma, nga ti ti nga bhalwa dibhukuni ka Vaprofeti, va txi khene:

Anu va nyumba ya ka Israyeli,

ina mi ni mahete magandelo ni timhamba txiwulani,

mndani ka malembe a mune wa magumi kani?

43Kambe mi rwate m'dhuti wa Moloke

ni nyeleti ya txikwembu txanu Refani.

I ku sithombe si mi nga si maha kasi ku si khizamela.

Ngu konaho ni na mi payula ni mi yisa ka kupinda Bhabhilona.

44“Vatate vathu va ti ti ni Ditenda da Wufakazi, txiwulani amuwa va nga ti veka kona sileti sa Mlayo. Ditenda diya, di mahilwe madingano ni ti txi nga leletisa tona Txizimu, ngako txi txi womba-womba ni Mosi, txi mleleta kambe kumaha nga txifananiso txi Mosi a nga txi wona, 45ditenda diya, ngako vatate vathu va di di amukete, va to wulela nado, na va txi thangelwa ngu Joxuwa, ka ditiko da vamatiko, avava Txizimu txi nga ti va tovete, masoni ka vatate vathu; dona di zumbile konaho kala kuhoka masiku a Dhavhidha, 46ene Dhavhidha a mani kukateka masoni ka Txizimu, se e kombela dithomo do akela nyumba Txizimu txa Jakobe. 47Se Solomoni ngene a nga akela nyumba Txizimu;”

48“aniko Nyatxitimwi kha zumbi ka tinyumba to mahwa ngu manza a vathu, madingano ni kuwomba ka Mprofeti, a nga khene:

49‘Nzuma njikhalo txangu txa wukoma,

mafu njikhigelo txa mikondo yangu.

I nyumba muni mi no ni akela kani, kha Mkoma,

ni wukhalo wa kuhumula kwangu i nga va wuhi kani?

50Ina hi nga dianza dangu di nga maha sotshe siya kani?’ ”

51“Anu va tithamo to banga, makhutu a timbilu ni a tinzeve, anu ma kanyisa yotshe mbimo Moya wo Sawuleka: Mi tekelela vatate vanu. 52Ngu wuhi mprofeti wu vatate vanu va nga mbi mxanisa kani? Va date ni vava kukhatani va nga zivisa kuta ka Mlulami, awu anu konkuwa mi nga mningela ni ku m'daya; 53anu mi nga amukela mlayo manzani ka tingelozi, kambe kha ma wu xayisa.”

Kudawa ka Sitefani

54Ku ti ngako va di pfite timhaketo ta Sitefani, va to henya ngutu timbiluni kwawe, se ve gegeresela makwasa, ngu txiviti nayo. 55Aniko Sitefani, a di tate ngu Moya wo Sawuleka, a to gula maso e wona nzumani, e wona kuphatima ka Txizimu ni Jesu a nga ti emile txineneni ka txona; 56Se a ti khene:

“Ma ti wona, ani ni wona nzuma yi di tulekile, ni Mwanana wa M'thu a di emile txineneni ka Txizimu.”

57Aniko va to maha diguwa da hombe, ve ti tsiva tinzeve, veya mpfinya. 58Se va to mruruvisa ve mu yisa hahanze ka didhoropa, veya mu balisela ngu marigwi. Tifakazi ti ti vekile tinguwo ta tona minengeni ka dijaha di di dhanwako ku i Sawule. 59Se va to balisela Sitefani ngu marigwi, na ene a txi khongela, a txi khene:

“Mkoma Jesu, amukela moya wangu!”

60Se e khizama a txi kwangula ngu dipswi da hombe, a txi khene:

“Mkoma u nga va alakanyele txionho txiya.”

Ngako a di wombile tiya, a to fa.

Currently Selected:

Mithumo 7: BEC2016

Highlight

Copy