Mithumo 5

Ananiya ni Safira

1Wamwamna wokari, a nga ti dhanwa ku i Ananiya, a xavisile thembwe ngu kuengisana ni msikati wakwe Safira. 2Ku ti ngako a di hungulete male ya kona, ngu kutumelelana ni msikati wakwe, a to teka yi yi nga sala, eya yi veka minengeni ka vapostoli. 3Aniko Pedro a txi khene kwakwe:

“Ananiya, u mlekisile kutxani Sathani e fuma mbilu yako kani? U hembete Moya wo Sawuleka, u txi ti hungulela male ya thembwe ngu phuho. 4Thembwe yi sinzi kuxaviswa ina i ti si nga yako kani? Mhaka yiya yi wulelisile kutxani mbiluni kwako kani? Khwa hembela vathu, aniko u hembete Txizimu.”

5Ngako Ananiya a di engisile mapswiyo, a to wa hahatshi efa. Se votshe va va nga tiengisa, va to tala ngu kuthava ngutu. 6Se mazambi ma to ta mata mu phutela, me mu rwala, me ya mu tshotsha.

7Ngako yi di pindile mbimo yo lava kudingana sikhati siraru, msikati wakwe, a to wulela, na asi ti zivi ti ti nga humelela. 8Se Pedro e mu wotisa, a txi khene:

“Hi ngani gela, thembwe mi yi xavisile ngu sona siya kani?”

Ene a nje khene: “Ina, ngu sona siya.”

9Sekoko Pedro a txi khene kwakwe:

“Mi tumelelanisile kutxani kuduka Moya wa Mkoma kani? Wona mikondo ya va va nga tshotsha mwamna wako, ndiye ha txikeni hawa; na nawe va na kuteka.”

10Se konaho a to wela minengeni kwakwe efa. Ngako mazambi ale ma di wulete, ma to ta mu mana a di fite, se veya mu tshotsha hafuhi ni mwamna wakwe. 11Se dibanza dotshe di to tala ngu kuthava ngutu, ni votshe vathu va va nga wona mhaka yiya.

Sidiwukiso ni sixamaliso

12Ku ti mahwa sikombiso ni sidiwukiso sasingi hagari ka vathu ngu manza a vapostoli. Otshe makholwa ma ti tshangana m'hubheni ka Solomoni, ngu mpatano wa lirando. 13Hagari ka vamwanyani ku ti si nga ho wo tsana ku ti patanisa navo, kambe mtalo wa vathu va ti va dhumisa ngutu. 14Avale va nga kukholwa ka Mkoma va ti engeteleka ngutu, dibutho da vavamna ni vavasikati. 15Ahawa va nga txi tisa valwali ve ta va veka tinzilani, va di va otelisile ha matahoni ni ha madhandoni, kasiku Pedro, mbimo yi a pindako, a na fenengeta vamwani ka vona hambi ngu mtsudi wakwe. 16Se hambi va madhoropa a vaakelani votala va ti tiya Jerusalema.

Kuxaniswa ka Vapostoli

17Se mphaxeli wa hombe a to ema ni votshe valondeteli vakwe, ava i nga ti va mtxawa wa Vasadhusi, va di tate ngu livengo, 18ve ñola vapostoli ve va khotela mkorani ka didhoropa dile. 19Kambe Ngelozi ya Mkoma yi to tula matimba mkorani ni wusiku, yi va humisa hahanze, yi txi kha yona:

20“Tsulani Dithepeleni, mi txi ya gela vathu timhaka tiya totshe ta wutomi wa wuphya.” 21Ku ti ngako va di engisile toneto, va to wulela Dithepeleni ni mabimbi-kutxa, ve gondisa kona. Kambe mphaxeli wa hombe ni va va nga ti nayo, ngako va txi hoka, va to ramba dibanza ni madhota otshe a vanana va ka Israyeli, se ve rumela vathu mkorani kuya teka vapostoli, 22Kambe sirumwa, ngako si di hokile mkorani, si to ya pwata Vapostoli, se si to tshumela si ya womba si txi kha sona: 23“Hi ti ya mana mkora wu di sekilwe ta tinene, ni vawoneleti va di emile ha txikeni; aniko ngako hi di tute, hi mani ku si nga ni m'thu kona.”

24Sekoko mthangeli wa vawoneleti va Dithepele ni vaphaxeli va hombe, ngako va txi pfa mahungu awa, va to dhuka ngu ona, va txi kha vona: “Mhaka yiya yi na gumela hani?” 25Se ku to bwaka mmwani e va gela ku khene:

“Vathu va mi nga ti va khotete ndivaleya va emile Dithepeleni, va gondisa vathu.”

26Sekoko mthangeli wa vawoneleti va Dithepele ni sithumi sa dibanza, va to tsula veya va teka, kambe va si va mahi ngu mtamo, nguko va ti thava kubaliselwa ngu marigwi ngu vathu.

27Ngako va di va wuyisile, va to va emisa hagari ka dibanza. Se mphaxeli wa hombe a va wotisile, a txi khene:

28 # Wona ni ka: Mat. 27:25. “Hi mi tsimbile ngu mthetho wa kupfala, ti to mi si gondisi ngu ditinedo. Aniko anu mi tatile Jerusalema ngu kugondisa kwanu; mi lava ti to mnoha wa m'thu wuwa wu txi thekelela txitimwi kwathu.”

29Aniko Pedro ni vamwani Vapostoli va to xamula, va txi kha vona:

“Ti ni fanelo ngutu kuengisa Txizimu kupinda kuengisa vathu. 30Txizimu txa vatate vathu txi wusile Jesu, awule anu mi nga m'daya, ngu ku mu hayeka ha phandeni. 31Txizimu txi mu guletile ngu dianza da txona da txinene txi txi mu maha Mkoma ni Muhanyisi, kasi ku ta tulela Israyeli nzila ya kuhunduluka, ni kudivalelwa ka sionho. 32Athu hi tifakazi ta timhaka tiya kumweko ni Moya wo Sawuleka, awu Txizimu txi wu rumelako ka vale va txi engisako.”

33Ngako va dibanza va txi engisa mapswi awa, va to henya ngutu, se ve langana makungo a ku va daya. 34Kambe mfarisi wokari, awu va ku i Gamaliyeli, m'gondisi wa mlayo, awu kambe a dhumiswako ngu dotshe ditiko, a to khukha a txi ema hagari ka dibanza e rumela ku Vapostoli va na humiswe hahanze ngu mbimoanyana. 35Se a txi khene kwawe:

“Vavamna va ka Israyeli, ti woneleni ka ti mi lavako ku ti maha ka vathu vava; 36Nguko hi nga kale ngutu a nga humelela Tewudhasi, awu a nga txi ti maha nombwe wokari, awu a nga ndinda vathu vo lava kudingana mune wa mazana; aniko a datwe, se ava va nga ti ema nayo va hangalakile votshe, ve fuva. 37Msana kwakwe ku humelete Judha wa Galileya ngu mbimo ya bhalela, se e ndinda vathu votala ve mu londetela, kambe nene a lovile, ni va va nga txi ema nayo va hangalasilwe votshe. 38Konkuwa na mi gela: Mi nga karatekeni ngu vathu vava: Va lekeni, nguko makungo awa ni mthumo wuwa, ngako si txi ta ngu ka vathu, si na guma; 39aniko, ngako si txi ta ngu ka Txizimu, kha mi na kusikota ku si fuvisa.

Ti woneleni mi si thuki mi manwa mi txi lwa ni Txizimu.” Se vona va to mu engisa.

40Ti di mahile eto, va to dhana vapostoli, ve rumela ku va na kwapelwe ngu timhika. Se va di va gelisisile ta tinene, ti to va si ngadi ve txhumayela ngu ditina da Jesu, va to va leka ve tsula. 41Vona va to huma ngu banzani ka wukoma, na va txi tsaka ngu kumaneka va di ha mtengoni ka vale va ku ni fanelo yo xupheka ngu mhaka ya ditina da Jesu. 42Kambe ditshiku ni ditshiku va ti si humuli kugondisa Dithepeleni ni mu mitini, ve nuwela mahungu a maphya a Jesu Kristu.

Currently Selected:

Mithumo 5: BEC2016

Highlight

Copy