Mithumo 4

Pedro ni Johani masoni ka Dibanza da Hombe

1Ngako Pedro ni Johani va di ngadi va txi womba-womba ni vathu, ku to bwaka vaphaxeli ni nduna ya Dithepele ni Vasadhusi; 2ve va henyela ngu kuwona ti to va gondisa vathu ni kunuwela kuwuka ka vafi ngu mhaka ya kuwuka ka Jesu kufani. 3Se va to va ñola ve va khotela mkorani kala mangwanani ka kona, nguko se di ti swite. 4Hambi keto, vathu votala va nga engisa dipswi, va to kholwa. Mtengo wa vavamna wu ti lava kuva wa 5.000.

5Ka ditshiku di di gametako, vafumeli va Vajudha ni madhota ni vabhali, va to sengeletana Jerusalema. 6Ku ti ni Anasi, mphaxeli wa hombe, ni Kayifasi, Johani ni Alexandre, ni votshe va lixaka la vaphaxeli va hombe. 7Ku ti ngako va di va dhani masoni kwawe, va to va wotisa, va txi kha vona: “Mi mahile eto ngu mtamo muni, mwendo ngu ditina da mani kani?”

8Sekoko Pedro, a di tate ngu Moya wo Sawuleka, a wombile kwawe, a txi khene:

“Vafumeli va ditiko ni nanu madhota a ka Israyeli: 9Nga kuwa nyamsi hi wotiswako ngu mhaka ya kuhanyisa m'thu wa txilima, ti to a hanyisilwe ngu mtamo wa mani, 10ti na ziwe ngu nganu motshenu ni votshe vathu va ka Israyeli, ti to ngu ditina da Jesu Kristu, wa Nazareta, awule anu mi nga mu bethela, awule Txizimu txi nga mu wusa ngu ka vo fa, ni ti to ngu ditina deyo, m'thu wu a ku masoni kwanu a hanyile. 11Ene ngene dirigwi di di nga nyenywa ngu nganu vaaki, adiya se di nga mahwa msungo wa dikhona.

12Ku walo mmwani a sikotako kuhanyisa, kha di nga ho dimwani ditina, hahatshi ka nzuma, adiya vathu va nga ningwa, kasiku va txi hanyiswa ngu dona.”

13Sekoko ku ti ngako va txi wona kutsana ka Pedro ni Johani, kuve va ti va ziva ti to mbathu va va nga mbi gonda ni ti to vo va i di vathu dwe, va to tala ngu kuxamala; kambe va ti va ziva ti to mbalondeteli va Jesu. 14Se ngako va txi wona m'thu wu a nga hanyiswa, a di emile navo, va to pwata to kaneta. 15Se ku ti ngako va di leletile ti to ve huma nyumbani ka wukoma, va to wotisana ngu txawe, 16va txi kha vona:

“Hi na va maha txani vathu vava kani? Nguko i mhaka yi yi ziwako ngu votshe va va nga aka Jerusalema, ti to txixamaliso txa hombe txi mahilwe ngu vona; ti ha kubasani, kha hi sikoti kukaneta. 17Kambe kufela ku timhaka tiya ti si thuki ti ya masoni ngu kuhangalaka hagari ka vathu, he va layeni ni ku va dhukisa, ti to va si nga ngadi ve gondisa m'thu, wuhi ni wuhi, ngu ditinedo.”

18Se va to va dhana ve va leleta ngutu, ti taku va si thuki ve womba-womba, hambi i di kugondisa ngu ditina da Jesu. 19Kambe Pedro ni Johani va to xamula, va txi kha vona:

“Ati ti nga lulama masoni ka Txizimu ngu tihi kani: Kuengisa anu mwendo kuengisa Txizimu kani? 20Athu kha hi na kusikota kumalala ni ti hi nga ti wona, ni ti hi nga tiengisa.”

21Se va to va thusa, msana ka kuva dhukisa da wumbidi, ve pwata nzila ya ku va peka ngu yona, ngu kuthava vathu, nguko votshe va ti dhumisa Txizimu ngu mhaka ya ti ti nga mahwa. 22Nguko m'thu wu a nga hanyiswa ngu txixamalisotxo i ti wa malembe awa ma pindako mune wa magumi.

Mkombelo wa valondeteli va Jesu

23Ku ti ngako va di thusilwe, va to tshumelela ka va ka kwawe, se ve xawutela totshe ti ti nga wombwa ngu vaphaxeli va hombe ni madhota a ditiko. 24Vona ngako va di engisile toneto, va to guleta mapswi awe ka Txizimu ngu mbilu yimweyo va txi kha vona: “Mkoma, ngawe u nga maha nzuma ni mafu ni linene ni sotshe si si ku ka sona; 25#Wona ni ka: Mas. 2:1-2 (LXX). ngawe u nga veka mapswi awa, ngu Moya wo Sawuleka, ka txisofu txa tate wathu Dhavhidha, txithumi txako, u txi khawe:

‘Ngu kutxani vamatiko va mahako vhilinganya kani?

Ni vathu va sungela txani sikungo sa walo kani?

26Vafumeli va mafu va xomile

ni tinduna ti buthanile,

kasi kulwa ni Mkoma ni Kristu wakwe.’ ”

27 # Wona ni ka: Mat. 27:1-2; Mar. 15:1; Luk. 23:1,7-11; Joh. 18:28-29. “Kha ditshuri va buthanile ka didhoropa diya Herodha ni Ponsio Pilato, ni vamatiko ni tixaka ta Israyeli, ve wukela txithumi txako txo sawuleka, awu u nga mu maha Mesiya. 28Ngu konaho vona va mahile totshe ti u nga ti emisa ngu kale ngu diwoko dako ni kuranda kwako, ti to ti na maheka. 29Se konkuwa, Mkoma, wona kudhukisa kwawe, u txi ninga sithumi sako kuwomba dipswi dako, na va si thavi txilo. 30Nawuluta diwoko dako, ti to ku na mahwa kuhanyiswa ni sikombiso ni sidiwukiso ngu ditina da Jesu, txithumi txako txa kusawuleka.”

31Ku ti ngako va di khongete, wukhalo wu va nga ti sengeletani ka wona, wu to dekadekiswa, se votshe ve tala ngu Moya wo Sawuleka, ve womba dipswi da Txizimu ngu kutsana.

Sotshe i di sa votshe

32 # Wona ni ka: Mas. 2:44-45. Msengeletano wa makholwa wu ti ni mbilu yimweyo ni moya wumwewo. Ku ti si nga ho ni wammweyo wa kupimisa ti to si lumba ene ekha, asi a nga ti naso; aniko hagari kwawe, sotshe i ti sa votshelele. 33Vapostoli va txi fakazela kuwuka ka Mkoma Jesu ngu mtamo wa hombe, ka votshe ku ti ti ni kateko ya hombe. 34Hagari kwawe, ku ti si nga ho wo pwata txilo, nguko votshe vathu va ti ti xavisa asi va nga ti naso, tithembwe mwendo tinyumba, ve teka male ya kona, 35va txi ningela ka Vapostoli se vona va txi avela mmweyo ni mmweyo, kota nga ti a nga txi si pwatisa tona.

36Sekoko Josefa, awu vapostoli va nga txi m'dhana ku i Bharnabhasi, ti ti wombako ku mwanana wu i ku Mthaveleli, Mulevhi wa kuvelekelwa Kipra, 37nene a ti ni thembwe, a nga yi xavisa, a txi teka male ya kona a txi yi ningela ka Vapostoli.

Currently Selected:

Mithumo 4: BEC2016

Highlight

Copy