ELONG MARAJA 2
2
1Bannaka bunga mawar polé ri Saron,
bunga bakung ri lompo-lompo'é.
Worowané
2Pada-pada bunga bakungngé ri tengngana alekale maddorié,
makkuwaniro canrikku ri yelle'na sining ana'daraé.
Makkunraié
3Pada-pada pong apél-é ri tengngana ajukajungngé ri ale'é,
makkuwaniro canrikku ri yelle'na worowané.
Masennakka maccinaung ri yawana,
sining buwana macenning rasana.
4Natiwika ri bili péstaé,
pakkitanna lao ri iyya pennoi pappoji.
5Péwatangika sibawa buwa anggoro macenningngé,
pétakkarika sibawa buwa apel, saba' malasa cintaka.
6Lima abéyona tula'i ulukku,
lima ataunna kaddaoka.
7Akkélonno, éh ana'-ana'dara Yérusalém,
nasaba sining jonga ri padangngé,
makkedaé dé' mumaélo ganggui cintaé,
gangka cau.
Elong Maduwaé
Makkunraié
8-9Engkalingai! Poléni canrikku!
Pada-padai ana' jongaé.
Luppe-luppe ri sining bulué,
kanja-kanja ri sining bulu-bulué.
Itai, tettongngi ri munrinna témbo'é,
massappa sibawa matanna;
célléng polé ri sebbo-sebbo'na tellongengngé.
10Engkalingai, mabbicarai canrikku lao ri iyya.
Worowané
Laono mai macennikku, laono mai magelloku!
11Itai, labe'ni wettu keccé'é,
labe'ni wettu bosié.
12Ri dare'é tabbakka bunga-bungaé;
narapini wettu allébongengngé;
riyéngkalingani oni bekkué ri tanata.
13Mammulani mabbuwa pong araé,
lellang baunna bunga pong anggoro'é.
Laono mai macennikku, laono mai magelloku.
14Oh jangang-jangakku ri yelle-elle batué,
ri assubbuwanna ri émpeng-ngémpeng iya mappeppingngé,
leppessanni uwita tappamu, sibawa méngkalingai saddammu,
saba' magelloi tappamu, macennoi saddammu.
15Tikkengngi iyaro sining asu ale'é,
asu-asu ale baiccu'é iya solangiyéngngi palla anggoro'é,
saba' mattengngangngi mabbunga palla anggoro'ta.
Makkunraié
16Appunnangekkui canrikku, sibawa iyya appunnangennai;
naampii sining bimbala'na
ri yelle'na bunga-bunga bakungngé
17narapi mangiri anging éléé
iya paleppe'éngngi anging wennié.
Lisuno, canrikku, pada-pada jongaé,
pada-pada ana' jongaé ri buluna Béter.
Currently Selected:
ELONG MARAJA 2: LAIBUG
Highlight
Share
Copy
Want to have your highlights saved across all your devices? Sign up or sign in
