YESAYA 8

Ana'na Yésaya selaku tanrang untu' bangsaéro

1Makkedai Puwangnge lao ri iyya, “Alako séddi pépeng batu loppo, nainappa muwoki sibawa hurupu-hurupu iya manessaé:#manessaé iyaré'ga: maloppo iyaré'ga iya naullé baca tungke tau. ‘Arrampasakeng iya Mapecci'é, Arrampokeng iya Masitta'é.’#Arrampasakeng iya Mapecci'é, Arrampokeng iya Masitta'é: Ri laleng basa Ibrani: Mahér-Syalai sibawa Hasy-Bas. 2Obbii duwa tau sabbi iya weddingngé riyatepperi, iyanaritu Imang Uria sibawa Zakharia, ana' Yébérékhya.”

3Siyagangngaré wettu ri munrinna mattampu'ni bainéku. Wettunna jaji ana'ta, makkedai Puwangnge lao ri iyya, “Asengngi ‘Arrappangeng iya Mapecci'é, Arrampokeng iya Masitta'é.’ 4Saba' ri wettu dé'napa nagenne loppona iyaro ana'é untu' makkeda ‘Ambo'’ sibawa ‘Indo'’, sininna asugirenna Damsyik sibawa sininna barang rappana Samaria ritiwii matu lao ri arung Asyur.”

Poléna arung Asyur

5Mabbicarai Puwangnge lao ri iyya, 6adan-Na, “Iyaé bangsaé nasampéyangngi uwai iya tennangngé polé ri ana' Salo Syiloah,#ana' Salo Syiloah: Ana' salo iya massolo'é polé ri séddié mata uwai battowa ri seddé alauna Yérusalém. sibawa masennangngi#masennangngi: Siyagangngaré bettuwang laing: makawa atinna iyaré'ga: métau iyaré'ga: ténré. sibawa Arung Rézin sibawa Arung Pékah. 7Rimakkuwannanaro Iyya, Puwang, papoléi matu arung Asyur sibawa sininna tentarana untu' gasai Yéhuda. Mallurui matu pada-pada Salo Efrat iya sapué sibawa malle'i sining peppinna. 8Nappo'i matu mennang Yéhuda pada-pada lémpe gangka ellongngé tanréna sibawa malle'i sini-sininnaé.”

Allataala sibawakki!#Allataala sibawakki, iyaré'ga: Napallebba'i matu sining pannina ri yasé'na sininna wanuwaé. Tennapodo Allataala sibawakki. Panni-Na iya mallebba'é linrungiwi wanuwatta.

9Addeppungenno sibawa métau, éh sininna bangsaé! Engkalingai éh cappa-cappa linoé! Sadiyano untu' mammusu, iyakiya sibawa ati iya métaué! Ya, sadiya-sadiyano, iyakiya sibawa pappénedding métau! 10Ebbuno rancana, iyakiya iya manenna dé'gaga kajajiyang matu. Alano apettung, iyakiya dé'gaga akkégunana, saba' Allataala sibawakki.

Mabbéréna Puwangnge papparéngngerang lao ri Yésaya

11Rikuwasaina ri Puwangnge sibawa riparéngngerangi kuwammengngi aja' uwaccowériwi laleng iya naolaé bangsaéro. Adan-Na, 12“Aja' muwangga'i assikongkolokeng aga iya naangga'é mennang assikongkolokeng, sibawa aja' mumétau ri gau'-gau' iya naétauriyé mennang. 13Engngerangngi makkedaé Iyya, Puwang Iya Pommakuwasaé iyanaritu mapaccingngi. Banna Iyya ritu harusu muwétauri. 14Nasaba mapaccing senna'-Ka, mancaji batu tabbutturek-Ka untu' ra'ya' Yéhudaé sibawa Israélié, sibawa siyo-siyo iya malaéngngi pabbanuwana Yérusalém. 15Maéga tau menrung matu tabbuttu sibawa malo. Tappasollai matu mennang ri laleng siyo-siyoéro.”

Pappésangka untu' méllau panunju polé ri sanroé

16Iko, ana'-ana' gurukku harusu'ko taroi sibawa piyarai sining paseng iya nabbéréyangngé Allataala lao ri iyya. 17Purani nasubbu Aléna Puwangnge polé ri wija-wijanna Yakub, umma'-Na, iyakiya mateppe'ka sibawa mamménasa lao ri Aléna.

18Iyya'naé sibawa ana'-ana' iya nawéréngngékka Puwangnge. Puwang Iya Pommakuwasaé iya mapparéntaé ri Bulu Sion, suroki mancaji tanrang untu' umma Israélié.

19Iyakiya sining tauwé nasuroko matu méllau panunju polé ri sanro-sanroé iya mabbici-bici'é sibawa mamek-kamengngé témunna. Iyaro sining tauwé makkedai matu, “Dé'ga tasipato méllau panunju polé ri waliyala-waliyalaé nasaba apentingenna tau tuwoé?”

20Baliwi makkuwaé, “Engkalingai pappagguruwanna Puwangnge! Tau iya dé'é nabbicara situru sibawa pappagguruwangngéro, dé' nappunnai amménasang.”

Wettu pennoé aperiseng

21Sining tau iya macilakaé sibawa malupué mallamparengngi matu ri wanuwaéro. Nasaba akkadérengngé, maccai-cayii mennang angkanna natanroi arunna sibawa Allatalana. Muwi kégi mennang makkita, ri yasé 22iyaré'ga ri yawa, dé' aga-aga naita matu ri lainnaé aperiseng sibawa apettangeng enrengngé akalemmengeng iya mappakatau-taué. Ribuwangngi matu lao ri onrong iya mapettangngéro.

23Iyakiya dé' na untu' mannennungeng iyaro wanuwaé péneddingiwi aperisengngé.

Arung iya maéloé polé

Daéra iya naonroiyé suku-suku Zébulon sibawa Naftali engka naengka nariyangga mariyawa ri Puwangnge. Iyakiya ri wettu iya mangoloé, Nawéréngngi matu alebbireng lao ri sininna daéraé polé ri Tasi Tengngaé lao ri alau lettu ri liwenna Salo Yordan, mala lettu ri Galiléa iya naonroiyé tau laingngé.

Currently Selected:

YESAYA 8: LAIBUG

Highlight

Copy