YESAYA 7

Séuwa paseng untu' Arung Ahas

1Arung Ahas iyanaritu ana' worowanéna Yotam sibawa eppona Uzia. Wettunna naparénta Yéhuda, kajajiyanni musué. Rézin arung Siria, sibawa Pékah ana' worowanéna Rémalya arunna Israélié, lao gasai Yérusalém. Iyakiya dé' naulléi sittaiwi kotaéro.

2Wettunna naéngkalinga arung Yéhuda makkedaé muttama'ni pasukanna Siria ri daérana Israélié selaku sellao, métau senna'ni sibawa bangsana, angkanna ténré mennang pada-pada aju iya nagottangngé anging.

3Makkedai Puwangnge lao ri Yésaya, “Tiwii ana'mu Syéar Yasyub#Syéar Yasyub: Iyaé asengngé ri laleng basa Ibrani bettuwanna: Siyagangngaré lisu matu. namulao méwai sita Arung Ahas. Mupoléiwi matu ri cappa sépe-sépe kolang bagiyang yasé'é, onronna sining tukang ménatué majjama. 4Powadangngi arungngé makkedaé harusu'i sadiya-sadiya iyakiya tette'i tennang. Dé' naparellu métau iyaré'ga malippu. Caina Arung Pékah sibawa Arung Rézin silaong tentarana sining tau Siriaéro dé' nalebbi mabbahaya polé ri duwa appulu aju api iya maddumpué. 5Sikongkolo'ni Siria sibawa Israélié nenniya arunna. 6Maéloi mennang gasai Yéhuda sibawa péttau-péttauriwi pabbanuwana kuwammengngi naccowé ri mennang, nainappa naakka ana' worowanéna Tabeel mancaji arung.

7Iyakiya Iyya, Puwang, pannessai makkedaé iyaro gau'é dé' nakajajiyang, 8nasaba Siria dé' nalebbi watang naiya Damsyik ibukotana, sibawa Damsyik dé' nalebbi watang naiya Arung Rézin. Na ri laleng enneng pulona lima taung, tassiya-siyai matu Israélié angkanna dé' naulléi mattahang selaku bangsa. 9Dé' nalebbi watang Israélié naiya Samaria, ibukotana, na Samaria dé' nalebbi watang naiya Arung Pékah.

Rékko dé' mutonget-tongeng mateppe ri alé-Ku, pasti dé' mulléi tahang.”

Tanrang Imanuél

10Palettu'i Puwangnge paseng laing lao ri Ahas: 11“Ellauno kuwammengngi nabbéré Puwang Allataalamu séuwa tanrang ri alému, poléga ri linona tau maté ri yawa iyaré'ga polé ri langié ri yasé.”

12Nappébali Ahas, “Dé' umaélo méllau tanrang. Dé' umaélo cobaiwi Puwangnge.”

13Namakkeda Nabi Yésaya, “Rékko makkuwaitu, éngkalingai éh wijanna Arung Daud! Dé'ga nagenne muwoji asabbarakenna tolinoé, angkanna muwoji towi asabbarakenna Puwang Allataala? 14Makkekkuwangngé, Aléna Puwangnge mabbéré matu tanrang lao ri iko: Séddi ana'dara#Ada Ibrani iya ribettuwangiyé kuwaé sibawa ‘ana'dara’ bettuwanna makkunrai malolo iya genne'énna umuru'na untu' kawing, sibawa dé' nappunnai bettuwang ‘parawang’. Ripakéna ada ‘parawang’ ri laleng Mat. 1:23 majjello'i lao ri bettuwanna Assijancing Malaungngé ri laleng basa Yunani iya riyébbué kira-kira 500 taung purana Yésaya. iya mattampu'é jajiyangngi matu séddi ana' worowané iya nasengngé Imanuél.#Imanuél: Iyaé asengngé ri laleng basa Ibrani bettuwanna “Allataala sibawakki”. 15Wettunna cuku'ni loppona untu' wedding mala apettung ri alé, iyaro wanuwaé madécéngngi matu.#madécéng matu: Manuru basa Ibrani: Ménungngi matu susu sibawa cani. Iyaro inanré ripasisumpungngi sibawa pammulanna sejarana Israélié. 16Saba' ri wettu dé'napa narapii iyaro wettué, iya duwa manuwa iya naparéntaé arung-ngarung iya muwétauriyéro risalaiwi matu lobbang.

17Napapoléi matu Puwangnge arung Asyur, nainappa iko sibawa sininna kaluwargamu enrengngé ra'ya'mu napéneddingiwi matu esso-esso pennoé aperiseng iya lebbi maseroé naiya aga iya puraé mupéneddingi sipongenna tabbagé akkarungeng Israélié sibawa Yéhuda.

18-19Iyaro wettué naobbii matu Puwangnge tau Maséré'é sibawa tau Asyur-é, nainappa poléi matu iya duwa bangsaéro pada-pada lale makkonrongngé sibawa wani iya katulungngéngngi lompo-lompo mappeppingngé sibawa elle-elle batu karangngé. Natongkoi matu tungke alekale maddorié sibawa tungke onrong mabbellaé.

20Naséwai matu Puwangnge arung Asyur untu' gaukengngi Israélié pada-pada séddié tukang cukkuru iya cukkuru manengngéngngi gemme'é sibawa bulu-bulué ri watakkalé.

21Iyaro wettué, rékko séddié tau mappiyara sikaju saping lolo sibawa duwakkaju bémbé bawang, 22dadi iya napowassélé'é iyaro olokolo'é lebbi polé ri apparelluwanna untu' sining tau iya nasésaé ri wanuwaéro. Tongeng, ménungngi matu mennang dadi sibawa cani.

23Iyaro wettué sining palla anggoro iya ritanengiyé tungke-tungke sisebbu pong anggoro sibawa iya ellinnaé sisebbu dowi péra', natuwoiwi matu alekale maddori. 24Tau iya laowé kuwaro harusu'i tiwi uso sibawa pana, saba' sininna wanuwaéro pennoi alekale maddori. 25Sibawa daéra buluna iya biyasaé rijama sibawa ritanengi, penno towi alekale maddori, angkanna dé' nabarani tauwé lao kuwaro. Iyaro tanaé banna makkégunai selaku onrong mabbella untu' sapingngé sibawa bimbala'é.”

Currently Selected:

YESAYA 7: LAIBUG

Highlight

Copy