Mateus 4
4
Jesus iunjuni
(Mrk. 1:12-13; Luk. 4:1-13)
teks 1#Heb. 2:18, 4:15 Enggo kessa i, iarahken Tendi Simbadia mo Jesus mi kelongoon asa iunjuni sibolis. 2Oda mangan Jesus empatpuluh ari empatpuluh berngin dekkahna. Nai melèhè mo iakap. 3Roh mo sibolis mengunjunisa, “Mula Anak Dèbata ngo kono, dokken mo batu-batu èn gabè roti.”
4 #
5 Ms. 8:3
Ialoi Jesus mo, lot ngo tersurat ibas bukku, “Oda ngo ndorok ngelluh jelma i ibaing roti sambing, tapi kumarna kata ni Dèbata ngo.”
5Enggo kessa bagidi, iarahken sibolis i mo Jesus mi Jerusalem mi babo bungkulen Bages Dèbata. 6#Ps. 91:11-12 Nai idokken sibolis i mo tabaSa, “Mula Anak Dèbata ngo kono, dabuhken mo dirimu mi terruh; ai tersurat ngo i bukku simabadia i bagèen,
‘Ipasulak Dèbata ngo malaèkat-malaèkatNa menjaga Kono,
janah itatang ngo Kono asa ulang tertuktuk nèhèmu mi batu.’ ”
7 #
5 Ms. 6:16
Ialoi Jesus mo, “Tersurat ngo ibas Bukku Simbadia idi bagèen, ‘Ulang iunjuni kono Tuhan Dèbatamu.’ ”
8Nai iarahken Sibolis i nola ma mo Jesus mi sada delleng ndates kalohon, ituduhken Sibolis i mo i sidi karinana kerajaen dunia èn dekket karina kinibèakna. 9Nai idokken Sibolis i mo mbang Jesus, “Karinana idi kuberrèken baMu, mula isembah kono aku.”
10 #
5 Ms. 6:13
Ialoi Jesus mo, “Laus mo ko Bolis, tersurat ngo ibas Bukku Simbadia i: Tuhan Dèbatamu ngo sisembahenmu, pellinSa ngo kessa siuèenmu.”
11Ujungna laus mo Sibolis idi, nai roh mo Malaèkat-malaèkat mendahisa.
Itebenai Jesus bahanna i Galilea
(Mrk. 1:14-15; Luk. 4:14-15)
12 #
Mat. 14:3; Mrk. 6:17; Luk. 3:19-20 Tikan idengkoh Jesus beritana, enggo ikurung si Johanes i Galilea.
13 #
Joh. 2:12
Itadingken mo Nazaret, lako merrian i Kapernaum. Imo i biding tao Galilea i nageri Zebulon dekket Naptali.
14Kumarna bagidi, saut mo sinidokken Nabi Jesaya bagèen:
15 #
Jes. 9:1-2
“Tanoh Zebulon dekket Naptali,
dalan lako mi laut, i kèparen Laè Jordan,
Galilea siso masuk tanoh Jahudi,
16kalak sinibagessen kegellapen,
mengidah cuhaya mbellen
enggo mbincar mataniari
taba kalak sinilenggemmen kematèen!”
17 #
Mat. 3:2
Mungkah i sidi nai mo Jesus menjamitaken, “Tobat mo ibas dosa-dosa ndènè nai, ai memerèntah nèngè mo Dèbata bagè Raja.”
Idiloi Jesus empat kalak perikan
(Mrk. 1:16-20; Luk. 5:1-11)
18Tikan merdalan-dalan Jesus i biding Tao Galilea, iidah mo dua kalak sibeltek perikan, imo si Simon (igerari ma Petrus) dekket anggina si Andreas. Tupung menjala ngo kalak idi, ai perikan ngo kalak i.
19Idokken Jesus mo taba kalak i, “Ekutken mo Aku, asa Kuajari kènè menjala jelma.” 20Nai mènter itadingken kalak i sidua mo jalana idi janah ièkutken mo Jesus.
21Iterusken Jesus mo merdalan, nai iidah nola ma mo dua kalak sibeltek sidèbanna, imo si Jakobus dekket si Johanes, imo dukak-dukak si Zebedeus ibagessen bungkina ngo kalak i rebbak dekket bapana peliasken jala. Idiloi Jesus nola ma mo kalak idi. 22Mènter itadingken kalak i mo bungkina dekket bapana lako mengèkutken Jesus.
Jesus mengajari, merjamita dekket pemalumken simersakit
(Luk. 6:17-19)
23 #
Mat. 9:35; Mrk. 1:39 Ikulilingi Jesus mo nageri Galilea i. Mengajari mo Ia i bages perguruen janah memagahken Sukuten Keluahen, imo Kerajaen Dèbata. Ipemalum ngo simersakit dekket simertikas. 24Tersaar ngo berita Jesus terèngèt Jesus idi i suberri nageri Siria, sanga ngo nterrem kalak merrohen mendahiSa. Iembah kalak idi ngo kalak simenggong matcam bagè sakit, dekket simenggong mermatcam bagè kesusahen; kalak sinisellapen tendi jahat, si solpetten, bagi ma dekket nitempuk sigading, ipemalum Jesus ngo karinana. 25Soh mo buèna kalak simengèkutken Jesus tikanna i, lot mo i dèba i Galilea nai, dèba i Sipuluh Kuta nai, dèba i Jerusalem nai, bagi ma i Juda nai, janah lot ma ngo dèba i kèparen laè Jordan nai.
Currently Selected:
Mateus 4: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
