1 Musa 41
41
Si Josep peterangken nipi raja Mesir
1Enggo kessa lebbih dua tahun nai nola, datang mo nipi raja Mesir, bagè cara cènder ia rupana i biding laè Nil. 2Sintempu mèter rumuar mo pitu lembu nggomok-nggomok janah merèlèng-èlèng i laè i nai, janah menggagat mo i biding laè i. 3Kessa i rumuar nola mo pitu lembu sidèban, mèrung kalohon pellin koling-koling kirakut nai ngo. Cènder mo lembu mèrung i i gembar lembu nggomok i biding laè i. 4Nai ipangan lèmbu mèrung i mo lembu nggomok i. Kessa bagi terengnget mo raja i. 5Nai terpeddem nola mo ia, janah datang dèng ma mo nipina. Idah mo ibas nipina i pitu ngkerohi pagè mebrras janah enggo ntua, tubuh ipas sada tangkè nai. 6Nai tubuh ma mo pitu ngkerohi pagè sidèban, lambang janah pellin apa ibaing angin padang gurun. 7Nai mèter ibendut pagè lambang i mo pagè sipitu ngkerohi simberras i. Nai terengnget nola mo raja i, janah saddar mo ia, datang keppè nipina. 8#Dan. 2:2 Ceggenna i dak bulisah mo raja i, kumarna i ipasulak mo mendiloi karina nagguru dekket simpantas niasè ni Mesir. Isukutken mo nipina taba kalak i, tapi sada kalak poda ndorok magahken lapatna.
9Enggo kessa bagidi, ibagahken simenaku ènumen idi mo taba raja i, “Bagèndari kupertuhu mo kesalahenku. 10Tikala i melaga ngo raja i taba simahan roti dekket taba aku, gabè ikurung mo kami, i bages èkuten penjaga istana. 11Tikan i sada berngin datang mo nipi nami sidua, janah oda ngo dos lapaten nipi nami i. 12Lot mo i sidi anak perana kalak Heber rebbak dekket kami. Ia kin ngo kettoken èkuten penjaga istana i. Kusukutken kami ngo nipi i tabasa, nai ibagahken mo lapaten nipi i. 13Keppè tuhu ngo masa bagè nidokkenna i, imo: Ipebangkit raja i ngo aku mi ulaenku tikala i, tapi ihukum kènè ngo matè simahan roti i.”
14Nai ipasulak raja i mo mengaleng si Josep, mèter ndor mo ia ikaruarken i kurungen nai. Enggo kessa mergonting ia janah mersalin, mèter idahi mo raja i. 15Idokken raja i mo mbangsa, “Lot ngo datang nipingku, tapi isè poda ndorok magahken alamatna. Jadi lot magahken bangku, kono nina ndorok peterangken lapaten nipi.”
16Ialoi si Josep mo, “Oda ngo aku alè Raja nami, tapi Dèbata ngo simerèken alamat nipi situhuna.”
17Nai itoriken raja i mo, “Kuipi, pana cènder aku i biding laè Nil. 18Nai rumuar mo i laè i nai pitu lembu nggomok-nggomok janah merèlèng-èlèng, nai menggagat mo ia i biding laè i. 19Enggo kessa i rumuar mo pitu lembu sidèban murung-murung, koling-koling kirakut nai ngo. Madèng pennah kuidah bagi merroha lembu i suberri Mesir. 20Ipangani lembu rekkus i mo kerri lembu nggomok sipitu ndai. 21Tapi enggo kessa i, tong ngo rekkus lembu simèrung i. Nai terengnget mo aku. 22Kessa bagidi terpeddem nola mo aku keppè datang nola mo nipingku, kuidah mo pana pitu ngkerohi pagè mberras janah enggo ntasak, tubuh ipas sada tangkè nai. 23Nai kuidah ma mo pana tubuh pitu ngkerohi pagè lambang, janah ngkerrah mermpiuken ibaing angin gurun pasir. 24Ibendut rohi lambang i mo rohi pagè mberras i. Enggo ngo nemmu kutoriken dua bagèna nipingku i taba nangguru, tapi sada kalak poda ndorok peterangken lapatenna.”
25Nai nina si Josep mo taba raja i, “Dos ngo lapaten nipi ndènè sidua i alè Raja nami; enggo ibagahken Dèbata taba raja i kadè sinaing baingenna. 26Lembu nggomok sipitu i imo magahken pitu tahun janah pitu rohi pagè mberras, i tong ma magahken pitu tahun; dos alamat sidua i. 27Lembu rekkus sipitu i, siremuar podien, dekket sipitu ngkerohi pagè lambang janah ngkerrah mermpiuken kumarna angin gurun pasir imo magahken masa lèhè pitu tahun. 28Bagè sienggo kudokken bai raja i, enggo ipacidah Dèbata bai raja i kadè sinaing pemasaenna. 29Roh mo tikkina pitu tahun mbellen kiniduma i suberri nagerri Mesir. 30-31Enggo kessa i roh mo tikki lèhè pitu tahun, janah gabè ilupaken mo tikki kiniduma i, kumarna lèhè matè kocing ngo lèhè i, gabè kadè nè poda tubuh i suberri nagerri èn. 32Asa dua kali pè datang nipi raja i, alamat enggo itetahken Dèbata janah ndor mo i masa.
33Kumarna i, selloh mo ipilih raja i sada kalak, kalak mpantas janah bijak janah iberrè bana kuasa lako mengatur nagerri èn. 34-35Bagima kennah ipebangkit raja i ma mo pugabè-pugabè sidèban dèng ma, janah merkuasa lako menjaloi niperlima ipas karina pagè sienggo iperani sidekkah pitu tahun mbellen masa nduma i, nai ipedèmpu mo i gennep kuta ninganna ijagai. 36Nai pagè nipepulung i mo mahan pangaen sidekkah kelèhèen sipitu tahun sinaing roh mi Mesir. Merkitè bagidi oda uè matè melèhè karina jelma ginemgemmu.”
Si Josep ipebangkit gabè gubèrnur i Mesir
37Raja dekket karina pugabèna mengoangken rencana si Josep i. 38Nai idokken raja i mo taba kalak i, “Dok atèngku oda dapet kita nè sidèban mèter sellohen daripada si Josep, kumarna iajari tendi Dèbata ngo ia.” 39Nai idokken raja i mo mbang si Josep, “Enggo ibagahken Dèbata i karina bamu, kumarna i kono nai ngo simpantasna bak sibijakna daripada barang isè nola pè i. 40#Ul. 7:10 Kupebangkit mo ko gabè gubèrnur janah karina ginemgemku kennah menguèi perèntahmu. Aku nai ngo kessa merkuasa i babomu.” 41-42#Dan. 5:29 Enggo kessa bagi mèter italkasi raja i mo cincin i jari-jarina nai, ipakkèken mo bai si Josep ninganna idokken, “Dekket èn, kupebangkit mo kono gabè gubèrnur i suberri Mesir.” Nai iselukken mo bai si Josep sada jubah melèmus kalohon janah ibaing mi kerahongna borgot emmas. 43Nai iberèken mo taba si Josep kerèta kerajaen sipeduaken mahan dalan-dalanna, bagi ma penjaga kesangapen raja merdalan i lebbè kerèta i, ninganna dilo-dilo, “Kènè alè! Berrè kènè dalan i! Berrè kènè dalan!” Bagidi mo carana si Josep mbangkit gabè gubèrnur i Mesir. 44Idokken raja i mo tabasa, “Aku ngo raja – janah enggo kutingtingken, ukum oda ngo ijinmu, isè poda ndorok i suberri Mesir memaing barang kadè pè.” 45-46Ibaing raja i mo gerar Mesir taba si Josep, imo si Zafnat-Paaneah. Iberèken mo sada kalak sinibagesna mergerar si Asnat, berru si Potifera, imo imam i kuta Heliopolis.
Merumur tellupuluh tahun mo si Josep tikan ia mbangkit mengula lako bai raja Mesir. Berkat mo si Josep i istana raja nai lako mengkulilingi suberri nagerri. 47Ibagasen sipitu tahun mbellen nduma i, iberèken tanoh i ngo hasil oda merkerri-kerriin. 48Ipepulung si Josep mo pagè i janah ikebbenken i gennep kuta. I gennep kuta ikebbenken ngo pagè hasil juma sikuliling kuta i nai. 49Kumarna buèna pagè nipepulung i, gabè oda pella nè isukati, kumerna buèna bagè kersik i biding laut.
50Sinderrang madèng masa lèhè i, sinibages si Josep imo si Asnat menubuhken dua anak. 51Idokken si Josep mo, “Enggo ibaing Dèbata aku lupa i karina kinidersangku dekket taba kaum bapangku.” Kerna i ibaing mo gerar anakna situaen i si “Manasye.” 52Idokken dèng ma, “Enggo iberèken Dèbata bangku dukak tikan mpersuk aku,” nai ibaing mo gerar anakna peduaken i “si Efraim”.
53Enggo kessa pitu tahun tikki nduma i iakapi nagerri Mesir, mengadi mo. 54#Ul. 7:11 Nai roh mo tikki kelèhèen pitu tahun ma, tosè bagè sienggo ibagahken si Josep. Masa mo kelèhèen i suberri tanoh èn, tapi ukum i nagerri Mesir lot ngo taha-taha pangaen. 55#Joh. 2:5 Enggo kessa terasa lèhè i taba jelma ginemgem i Mesir, ipido kalak i mo pangaen taba raja i. Nai ipasulak raja i mo kalak i mendahi si Josep janah kennah menguèi karina barang kadè iperèntahken si Josep taba kalak i. 56Enggo kessa makin mpiahna lèhè i selli mi suberri aur, ibuka si Josep mo karina langgih, idèa mo pagè i taba kalak Mesir. 57I suberri dunia èn nai roh ngo kalak i mi Mesir lako menokor pagè bai si Josep nai, ai lèhè matè kocing ngo kelèhèen i barang i dikè sambing pè.
Currently Selected:
1 Musa 41: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
