1 Musa 40
40
Ipeterrang si Josep arti nipi kalak ni kurungen
1Daoh-daoh arien nola, lot mo dua kalak perkebbas raja Mesir imo simemakin enumen dekket simahan rotina, mersalah mendahi raja. 2Nai melaga mo raja i taba kalak i sidua, 3nai ikurung mo kalak i i bages èkuten penjaga istana, imo bekkas si Josep kurungen. 4Narih ndekkah ngo kalak i i kurungen i, janah idokken èkuten penjaga istana i mo si Josep memperdimataken kalak i.
5Tikan i sada berngin, datang mo nipi simenaku ènumen bak simahan roti. Ukum lapaten nipi kalak idi oda ngo dos. 6Sibarembenkenna tikan roh si Josep ceggenna i mendahi kalak i, bonek ngo idah kalak i. 7Nai ikusoken mo, “Kasa kènè bonek ari èn?”
8Ialoi kalak i mo, “Berngin ndai datang ngo nipi nami, tapi oda lot kubettoh kami kadè artina.”
Nina si Josep mo, “Pellin Dèbata ngo kessa memaing jelma ndorok mengartiken janah peterangken nipi. Tapi bagi pè, sukutken mo lebbè nipimu i.”
9Nai nina simenaku ènumen i mo, “Kuipi mo pana lot kayu anggur i lebbèngku. 10Tellu pana dahanna. Idèng naing merbulung dahanna i, mèter merbunga mo, nai mèter ntasak mo buahna. 11Tikan bagidi pana, kujèmak ngo galas daberru raja i, nai mèter kuhidangken mo bana.”
12Idokken si Josep mo, “Bagèen ngo alamat nipimu i: Dahan sitellu imo tellu ari. 13Ibagasen tellu ari èn ipaluah raja i mo ko, iampuni ngo ko janah tong ngo ko ibaing mi ulaenmu kin. Tong mo ko menghidangken galas perènumen taba raja i bagè dekkah ari. 14Tapi kupido bamu, èngèt mo aku mula enggo selloh nggelluhmu. Bagèhken mo tersèngèt aku taba raja i asa ipaluah aku i kurungen èn nai. 15Situhunna iculik ngo aku tikala i i nagerri kalak Heber nai, janah i sèn pè i Mesir èn, oda pernah kuulaken jahat memaing aku ikurungi.”
16Ibettoh simahan roti i kessa mo alamat mendè ngo nipi simenaku ènumen i, nai idokken ma mo taba si Josep, “Aku pè datang ma ngo nipingku. Kuipi pana kujujung tellu kirang roti i babo takalku. 17Ibas kirang kan babo kalohon lot ngo merbagè-bagè roti hatoren bai raja i, tapi merrohen mo manuk-manuk kipangani roti-roti i.”
18Ialoi si Josep mo, “Bagèen ngo alamat nipimu idi: Kirang sitellu i, artina tellu ari. 19Ibagasen tellu ari èn ipasulak raja i mo menggettap takalmu, janah bangkèmu pè igantung i sada tiang, nai merrohen mo manuk-manuk kipangani jukutmu.”
20Enggo kessa petellu ariken, tupung mo ari ulang tahun raja i, ibaing mo pèsta mbellen taba karina pugabè. Idokken mo asa ikaruarken simenaku laè ènumen dekket simahan roti i kurungen nai, janah iembah mi lebbè pengurus istana. 21Ukum simenaku ènumen ipebangkit ngo mi ulanna kin. 22Tapi ukum simahan roti ihukum matè ngo. Masa ngo karina tosè bagè sinidokken si Josep i. 23Tapi oda ngo ièngèt simenaku ènumen i nè si Josep. Sandok ilupaken ngo ia.
Currently Selected:
1 Musa 40: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
