1 Musa 37
37
Si Josep dekket kaka-anggina
1Ukum si Josep hot mo ia i nagerri Kanaan, imo bekkas bapana, 2bagèen mo tarombo si Jakob:
Tikan merumur sipuluh pitu tahun si Josep anak si Jakob i, rebbak-rebbak ngo kalak i mermakani kambing bak biri-birina, imo tubuh si Bilha dekket tubuh si Zilpa imo rading bapana. Dak ibagahken ngo taba bapana pengelako siso patut.
3Ngkellengen ngo atè si Jakob midah si Josep daripada karina anakna sidèban i, kumarna si Josep tubuh, enggo narih tua-tua bapana. Tikan sidari ibahan mo baju jubah bai si Josep mendè kalohon. 4Idah kaka-kakana kessa mo ngkellengen atè bapana midah si Josep daripada kalak i, nggogo mo atè kalak i midah si Josep, gabè oda nè uè kalak i mendè permongkam tabasa.
5Tikan sada berngin, datang mo nipi si Josep, janah isukutken nipina i taba kaka-kakana, makin nggogo mo atè ni kalak i tabasa. 6Bagèen mo idokken si Josep taba kalak i, “Dengkohken kènè aku lebbè. 7Kuipi pana karina kita i juma tupung memerkessi pagè, nai cènder mo pana pagèngku i. Tibalen ndènè mengkulilingi tibalenku, janah mèter sujud taba tibalenku i.”
8“Idokken kono ngo mèter kembali raja ko janah merkuasa bai nami?” nina kaka-kakana i. Nai makin ceggona mo atè kalak i midahsa kumernaken nipina i dekket katana i.
9Enggo kessa i datang dèng ma mo nipina, janah iranaken ma mo taba kaka-kakana, “Lot dèng ma nipingku, kuidah mataniari, bulan dekket sipuluh sada bintang mersembah taba aku.”
10Isukutken ma ngo nipina i taba bapana, nai ipincang bapana mo ia, nina mo, “Nipi kadè mo nipi mi? Idokdok kono ngo roh aku dekket inangmu bak kaka-anggimu lako sujud mersembah taba kono?” 11#Ul. 7:9 Karina kaka si Josep cian midahsa, tapi ukum bapana dak iradum-radumi ngo nipina i.
Idèa si Josep janah iembah mi Mesir
12Tikan sidari nderrang laus mi Sikhem kaka-kaka si Josep lako mermakan kambing bak biri-biri bapa kalak i 13idokken bapana mo mbang si Josep, “Laus mo ko mi Sikhem mendahi kakamu, ai mermakan kambing bak biri-birinta ngo kalak i i sidi.” Ialoi si Josep mo, “Uè opa.”
14Nina bapana, “Tengen mo tah bakunè karina kakamu bagi ma dekket pinakan i, kessa i balik mo ko misèn magahken bangku.” Nai berkat mo si Josep i napa Hebron nai.
Oda pella sadikè dekkahna soh mo si Josep mi Sikhem. 15Tikanna ia menulusi kakana i jampalen pejumpa mo ia dekket sada kalak daholi mengkusoisa, “Kadè tulusenmu?”
16Ialoi si Josep mo, “Menulusi kakangku ngo. Ai mermakan kambing bak biri-biri ngo kalak i bagèndari. Ibettoh kènè ngo ndia, barang i dikè kalak i sendah bagèndari?”
17Idokken kalak i mo, “Enggo laus kalak i i sèn nai. Kudengkoh idokken kalak i, naing laus mi Dotan ngo nina.” Nai berkat mo si Josep mengayaki kakana i janah dapetsa mo kalak i, i Dotan.
18Ndaoh dèng, enggo mo itatap kalak i si Josep, janah tikan madèng ia soh mendahi kalak i, enggo sada tuptup kalak i lako munuh si Josep. 19Nina kalak i samahsa, “Tengen kènè kaltu, adoi mo enggo roh tukkang nipi i. 20Aci, sibunuh mo ia, janah sidabuhken mo bangkèna mi talaga sienggo ngkerrah. Sidokken mo taba bapa, enggo ijerngem biahat ia. Nai siidah mo tah bakunè lakona nipina i.”
21Terbertik ngo taba si Ruben arih kalak i, nai itulusi mo dalan paluahken si Josep. “Ulang ibunuh ia”, nina. 22“Sidabuh sambing mo ia mi bagasen telaga silot i gurun pasir èn, tapi ulang siligas barang pè ugahen ia sibaing.” Idokken pè bagi, kerna dok atèna ipaluah ngo si Josep janah ipasulak ia balik mi rumah. 23Soh kessa mo si Josep mendahi kakana i, mèter italkasi kalak i mo jubah si Josep simendè kalohon i. 24Nai iruah kalak i mo ia, idabuh mo mi bagasen telaga sienggo ngkerrah.
25Sidang mangan kalak i, mèter idah kalak i mo mentas nuhnuhen pertiga-tiga kalak Ismael merdalan i Gilead nai lako mi Mesir. Unta kalak i merembah rempah-rempah dekket damar. 26Nai idokken si Juda mo taba kaka-anggina, “Kadè lapatenna sibunuh angginta i? 27Lotin mo sidèa ia bai kalak Ismael adoi. Ulang pella sidersa ia. Bakunè nola pè, angginta ngo ia.” Tuju mo iakap kalak i, 28#Ul. 7:9 janah mellus kessa mo pertiga-tiga kalak Midian i, itontoni kalak i mo si Josep i telaga i nai, idèa mo taba kalak Ismael merharga duapuluh kèpèng pirak. Nai iembah pertiga-tiga i mo ia mi Mesir.
29Tikan idahi si Ruben telaga i oda nè i sidi si Josep, iribaki mo olesna kumerna bonekna. 30Idahi mo anggina, nina mo, “Oda nè i sidi bagèndari ia. Bakunè mo kubaing bagèndari?”
31Nai isèat kalak i mo sada kambing, iguyui mo jubah si Josep dekket daroh kambing i. 32Kessa i, ipasulak kalak i mo menaruhken jubah i mendahi bapa kalak i dekket tennah, “Jupa kami ngo jubah èn. Tah mada ngo baju anak bapa ndia èn?”
33Nai itandai si Jakob mo jubah i, nina mo, “Tuhu ngo, jubah anakku ngo èn. Enggo pana ijerngem biahat ia. Nong ngalè enggo mo keppè matè ipersuragè biahat anakku.” 34Iribaki si Jakob mo alesna kumarna bonekna iselluk mo pakèen merhendem. Tah piga ari dekkahna dak itangisi anakna i. 35Karina anakna dekket berruna roh lako mengapoisa, tapi oda terapoen ia. Ai nina ngo, “Soh matè aku dak kutangisi ngo anakku i.” Bagi mo dak marsak ia kumernaken si Josep anakna i.
36Tikan bagidi, idèa kalak Midian ngo si Josep i Mesir taba si Potifar, sada kalak èkuten pengabal bages raja.
Currently Selected:
1 Musa 37: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
