1 Musa 22
22
Idokken Dèbata asa ipèlèken si Abraham si Isak
1 #
Heb. 11:17-19
Daoh-daoh ariin nola, iunjun Dèbata mo kepercayaen si Abraham. Dilo-dilo mo Dèbata, “O, Abraham!” Nai ialoi si Abraham mo, “Kadè ngo alè Jahowa?”
2 #
2 Kron. 3:1
Nina Dèbata mo, “Laus mo kènè mi delleng Moria dekket si Isak, anakmu sisada i, kekelengen atèmi. I babo delleng sinaing Kutuduhken bamu i sidi, pèlèken mo anakmu i, mahan pèlèen situtungen bangKu.”
3Siceggen berembenkenna, itaka-taka si Abraham mo kayu mahan menutung pèlèen, ièkèti janah iampèken mi babo kalodèna. Berkat mo ia rebbakken dekket si Isak bak dua kalak naposona mi bekkas sinidokken Jahowa bana. 4I ari petelluken itatap si Abraham mo bekkas i ndaoh dèng. 5Nai nina mo taba naposona sidua kalak i, “Tading mo kè i sèn dekket kalodè i. Ukum aku dekket anakku laus mo kami lebbè misadoi lako memèlè Jahowa, mulak pè kami nahan mendahi kènè.”
6Iampèken si Abraham mo sebban i mi bara si Isak, janah ia merembah golok dekket api. Tikan rebbak merdalan kalak i, 7nina si Isak mo, “O Pa!”
Ialoi si Abraham mo, “Kadè ngo alè anakku?”
Mengkuso mo si Isak, “Enggo mo siembah api dekket sebban, tapi idikè ngo anak biri-biri sinaing sipèlèken mahan situtungen?”
8Ialoi si Abraham mo, “Dèbata ngo mèmaken anak biri-biri i,” Nai iterrusken kalak i mo merdalan.
9 #
Jak. 2:21
Soh kessa mo kalak i mi bekkas sinidokken Jahowa taba si Abraham, ibahan mo sada langgaten janah isusun mo sebban i i babona. Nai ièkèt mo anakna i, iampèken mo mi langgaten i, i babo sebban i. 10Kessa i ibuat mo golokna lako menèat anakna i. 11Tapi dilo-dilo mo malaèkat Jahowa i langit nai, “O Abraham, Abraham.”
Ialoi si Abraham mo, “Kadè alè Jahowa!”
12“Ulang sèat anakmu, janah ulang ikekadè ko ia.” Nina Jahowa mo merkitè malaèkatna i. “Bagèndari enggo Kubettoh ipesangap janah iuèi kono ngo Aku, kerna oda ijua ko merèken anakmu sisada-sada i bangKu.”
13Nai tumulih mo si Abraham janah idah mo sada biri-biri tonggal tersangkut tandukna i rambah-rambah i. Itangkup si Abraham mo biri-biri i, ipèlèken mo bai Jahowa, mahan pèlèen situtungen singkat anakna i. 14Igerari si Abraham mo bekkas i, “Ipèmaken Jahowa ngo siniperluken”. Janah soh bagèndari ngo idokken dèba “I delleng Jahowa ipepada ngo siniperluken”.
15Idiloken malaèkat Jahowa mo sikali nai taba si Abraham, 16#Heb. 6:13-14 “Nina Jahowa: Merbulaban ngo Aku merkitè gerarKu, kerna enggo ibaing kono bagi janah oda ijua ko merèken anakmu sada-sada i bangKu, 17#Heb. 11:12 mertinèncuk mo pasu-pasungKu bamu, janah pinemparmu bagè buè bintang i langit janah bagè buè kersik i biding laut. Italuken pinemparmu ngo musuhna. 18#Ul. 3:25 Karina bangsa i tanoh èn mengido taba Aku, asa Kupasu-pasu kalak i tosè bagè pasu-pasungKu bai pinemparmu – kumarna iuèi ko katangKu.” 19Kessa i balik mo si Abraham mendahi naposona sidua kalak i, nai rebbakken mo kalak i laus mi Bersyeba, janah merian i sidi mo si Abraham.
Pemparen si Nahor
20Lot ngo kaka si Abraham mergerar si Nahor. Enggo kessa simasa i delleng Moria, idengkoh si Abraham mo berita, ukum si Mika, sinibages si Nahor enggo ualuh anakna, imo: 21Si Us, imo situaen, si Bus, anggina, si Kemuel, imo gabè empung kalak Aram, 22Si Kesed, si Hazo, si Pildas, si Jidlaf, dekket si Betuel, 23imo gabè bapa si Rebekka. 24Lot dèng ma ngo siterbuang si Nahor mergerar si Reuma, itubuhken mo si Tebah, si Gaham, Tahas dekket si Maakha.
Currently Selected:
1 Musa 22: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
