MATIUS 28
28
Yesus aḇiḇer ḇyedi
28:1-10
(Mrk. 16:1-8; Luk. 24:1-12; Yoh. 20:1-10)
1Ras Mananai Yahudi isyonde kwar, ro arwo prim kaku ro ras ḇepon ro usbu ani, Maria Magdalena ma Maria ḇese ani sura sumam kaki rus ani. 2Kniko ḇama rim ḇebayo myun snar Manseren malaikat ḇyesi oso dado ker nanki ryama ḇe karui ani ma ikrisi ma kyain ro bori. 3Ḇarpon ḇyedi isnaper ma sansun ḇyena napyoper imnis manwaref bur. 4Ma manwadwaren ansi simkak ra sradadai simnis kaku snonkaku ḇepsur.
5Ḇape malaikat ani ikofen faro bin ansu ya, ḇo doḇo: “Mumkak awer; snar yafawi musewar Yesus spai ro aprop ani. 6Isya ro dineḇa, snar diḇri kwar, imnis raris moḇ ikofen kwar raya. Murama, mumam moḇ ḇyarek ro ine. 7Ma mura fasaw fa muḇaryas faro manfamyan ḇyesi mḇoi diḇri kwar ro fandu ḇemar sya. Iswara pyon mko ḇe Galilea; ro diwa nari mkomam I. Kaku ḇeri yaḇaryas faro mko kwar.”
8Subur fasau rus ani, kuker makakak fnoḇek raryaḇ ḇeba ma sufrar fasau fa sukofen ḇayir faro manfamyan Yesus.
9Kniko ḇama Yesus isrow su ma ikofen: “Aroo faro mu.” Sufanam I ma sufor wemin ḇyesu ya ma suban suba faro I. 10Rarirya Yesus ikofen faro su: “Mumkak awer. Mura mukofen faro naek Ayesi, insa sra ḇe Galilea, ma ro diwa nari smam Aya.”
Kankain Karkara Agama sararer sena
28:11-15
11Fafisu sui sya ro nyan ya faduri, manwadwaren ansi ono sra kwar ḇemnu ya ma sikofen ḇadir roi ḇeḇor ḇeḇesya anna kam faro mananir imam-imam. 12Ma sna wosi kuker ḇeḇarara-ḇeḇarara ansi kwar, sawos namuk fa ssḇuk pipi sibor faro sordade ansi 13ḇo sikofen, ḇo soḇo: “Nari mkofen radine, manfamyan ḇyesi srama ro roḇ ya ma skaraw I ro fafisu nkenef ya. 14Ma rofyor roi ḇeḇesya ine gubernur dakmnafi, nari nkawos kuker i, fa nkofadiren mko.”
15Sismai pipi ansi ma sifrur raris moḇ sisma ananun rai. Ma farfyar ine imbran ro fandu kawasa Yahudisya isof ras ine.
Sasoser ḇararyas Ankankinem Ḇeḇye
28:16-20
16 #
Mat. 26:32; Mrk. 14:28 Ma manfamyan samfur seser oser ansi sraḇe Galilea, ḇe urek rosai Yesus fyasnai kwar faro si. 17Fafisu smam I sḇansuba faro I, ḇape ono seḇirḇar. 18Yesus isnefer si ma ikofen: “Papoik nakam ro boiyaswa ma supswan ine ne ḇeḇuk kwar maro Aya. 19#Kis. 1:8 Inja mkora mura, mkofarkor er sya kam ḇe manfamyan Ayesi ma mkoḇuk masi sren faro si kuker snonsnon Kma ya ma Rumkun ya ma Rur Ḇesren ya, 20ma mkofarkor si fa sifrur roi ḇeḇor kam raris yaḇeasas kwar faro mko. Ma mkofawi, Aya ine nari yarous mko besya kwar isof awar ḇepupes.”
Currently Selected:
MATIUS 28: LAIBHW
Highlight
Share
Copy
Want to have your highlights saved across all your devices? Sign up or sign in
