MATIUS 27
27
Yesus ssḇuki faro Pilatus – Yudas marmar ḇyedi
27:1-10
1 #
Mrk. 15:1; Luk. 23:1; Yoh. 18:28 Fafisu isnai kwar, mananir imamsya ma ḇeḇarara-ḇeḇarara er Yahudi siryur ma sna wosi fa smun Yesus. 2Sai wanka ro ḇrasi, raimnai ssuni ma ssḇuki faro Pilatus, gubernur Roma ro mnu ani.
3 #
Kis. 1:18-19
Rofyor Yudas, ḇeḇoḇ Yesus ani, myam, Ismai samamyai mar-mar kwar, fyafko. Inja kyaḇer pipi sarak samfur rikior ansi faro mananir imam-imam ma ḇeḇarara sya, ḇo ikofen doḇo: 4“Aya ine yasasar kwar snar yaḇoḇ rik snonkaku ḇesasarḇa ine.” Ḇape skarem faroi: “Inko fandunrosai? Kwara ro mankundaw!” 5Rarirya syo pipi sarak ansi ḇe Rum Ḇesren ya dori, raimnai ibur moḇ ani fa rya fyes mankundi.
6Mananir Imam-Imam ssun pipi sarak ansi ma sikofen: “Pipi ansi kopok kosun siḇa ro ḇurua farsarser, snar pipi rik sirya.” 7Sawos yae faro si posa ssḇuk pipi ansi skoḇes saprop sapḇe Saprop Ḇefawi ḇefrur uren saprop, fa sifrur ḇe rus faro dakam sya. 8Iso eḇedari isof ras ine sor iḇe Saprop Rik.
9 #
Za. 11:12-13
Rarirya Nabi Yermia wos ikofen ya imnis: “Sna pipi sarak samfur rikior, isoine maeja sawos namuk kwar faro snon oser imnis karkara ro fandu er Yahudi, 10ma ssḇuk pipi ansi faro ḇaḇyak ḇefawi ḇefrur uren saprop ani, saprop ḇyedi, raris Manseren danun faro aya.”
Yesus ro ḇarpon Pilatus
27:11-26
(Mrk. 15:1-15; Luk. 23:1-5, 13:25; Yoh. 18:33–19:16)
11Raimnai ssun Yesus ḇeḇarpon gubernur Pilatus. Ma gubernur ani ifuken I: “Au ryake wairek kawasa Yahudi?” Yesus kyarem: “Iso mankundaw wakofen ya.”
12Ḇape raris safsof mananir imam-imam ma ḇeḇarara-ḇeḇarara sya sḇuksof I, kyarem wos oso ḇaḇeri. 13Inja Pilatus ikofen faro I: “Inja wamnafḇake safsof ḇeḇor saksi-saksi sine sawos faro Au?”
14Ḇape kyarem royo ḇaḇeri, isof gubernur ani ikmom kaku.
15Biasa ro ras-ras munara ḇeba gubernur fyaspar snonkaku besmai oso imnis kankinfir ro kawasa ḇeḇor ansi. 16Ma rofyor ani snon ḇeḇarḇor kaku oso isya ismai ro bui snonsnon ḇyedi Barabas. 17Snar sfanjur kwar ro dia, inja Pilatus ikofen faro si: “Mansei mkomarisen yafaspar faro mko, Barabas roba Yesus, sapḇe Kristus?” 18Pilatus ifawi kwar, mḇoi ssun Yesus ma ssḇuki faroi snar sayin I. 19Ro fafisu Pilatus kyain ro karapesa karkara ḇenapes ya, swari fyarem anun faroi: “Wafrur roi osoḇa beri faro snon ḇenapes ani, snar snon ine ifnaiḇo roḇandi yasma wayam ro mafu.”
20Ḇape snar dafdif mananir imam-imam ma ḇeḇarara sya, kawasa ḇeḇor ansi simarisen kam insa sor fa Barabas ḇyeḇefaspar ma Yesus kada isma samamyai marmar. 21Gubernur kyarem faro si ma ikofen: “Mansei ro fandu snon ansuine mkomarisen yafaspar faro mko?” Sikofen: “Barabas.” 22Pilatus ikofen wer faro si: “Rarirya ido rosaiso nari yafrur kuker Yesus, sapḇe Kristus ani?” Sikam ssibras: “Ikada ḇyeḇepai epen ro aprop!”
23Ikofen wer: “Ḇape sasar rosaiso ifrur kwar ya?” Ḇape ssibras naba syadi wer: “Ikada ḇyeḇepai ro aprop!” 24#Ul. 21:6-9 Fafisu Pilatus myam nyan ḇyena kam nefromo, isyadi wer siḇe sifrur mbrus inja dun war fa ḇyukḇan ḇramin ḇyesi ro ḇarpon kawasa ansi ma ikofen: “Aya, yaḇe sasarḇa faro rik snon ine; Irya mankun mkokarem!” 25Ma kawasa ansi kam skarem: “Mḇoi rik ḇyena nek inko ma romawa nkoḇesi!” 26Raimnai fyaspar Barabas faro si, ḇape Yesus kada siprer I raimnai ḇyeifa spai ro aprop.
Yesus isma anonef
27:27-31
(Mrk. 15:16-20; Yoh. 19:2-3)
27Ḇarpur ya gubernur sordade ḇyesi ssun Yesus ḇe rum karkara ḇenapes, raimnai sor sordade ḇese sya kam fa sfanjur ḇo sores yar Yesus. 28Sper sansun ḇyena ma ssansun I kuker syatu ḇefuk. 29Siyanem wower ro kaḇrai borek ma sriri ro Yesus ḇruri, raimnai ssḇuk amboḇer ḇaken oso fa dufepen ro ḇrasi ḇar raku ya. Posa ssḇansuba ro ḇarpon ḇyedi ma skoryae I, ḇo soḇo: “Aroo, ne Wairek kawasa Yahudi!” 30Saninef I ma ssun amboḇer ani fa ssḇuki dos ro ḇruri. 31Sonef I raposa sper sansun syatu ḇefuk ani buri ma ssansuni wer kuker sansun ḇyena. Raimnai ssuni ḇo sisasyar bur mnu ya, fa spai I ro aprop.
Yesus ḇyeḇepai epen ro aprop
27:32-44
(Mrk. 15:21-32; Luk. 23:26, 33-43; Yoh. 19:17-24)
32Fafisu sisasyar bur mnu ya, sisrow snon Kirene oso snori Simon. Snon ani sedafdifer i fa ḇyar pyan Yesus aprop ḇyedi.
33Ma sra ro moḇ ḇenirḇe Golgota, isoine: Moḇ Ḇukor bei. 34Raimnai ssḇuk anggur ḇefmnai kuker pus fa dinem. Ryepen anggur ansi kwar, imewer dinem sindi.
35 #
Mzm. 22:19
Spai I kwar posa serarwas sansun ḇyena kuker kinsor mansei ḇena nanya. 36Raimnai skain ma siwaren I ro dia. 37Ro ḇruri bori ro aprop pum ya sfas ḇair knam rosai ḇefnai fa isma samamyai ya: “Ine Yesus Wairek Yahudi.”
38Spai fnoḇek I snon mamun risuru, oso ro ḇar raku ma oso ro ḇar rasar ḇyedi.
39 #
Mzm. 22:8, 109:25 Snonkaku ḇeyunuk ro dia sonef I ma skakiker siḇrusna ḇo sikokofen, ḇo soḇo: 40#Mat. 26:61; Yoh. 2:19 “Ne, Au ḇeyoḇo ḇekakok Allah Rum Ḇesren ḇyedi ma ḇeḇawes i wer ro ras rikior, faspar mankundaw rofyor Allah Rumkun ḇyediso Au, wado bur aprop ya!”
41Rarirya kako mananir imam-imam sifnoḇek ḇefawinananem Refo Yahudi ma ḇeḇarara sya skoryae I ma sikofen, ḇo soḇo: 42“Snonkaku ḇese fyaspar si, ḇape mankundi kada ipok fa fyaspar I ḇa! I kada Wairek Israel? Ipyum syadi wado bur aprop iyasi ma nari nkokyar Au. 43#Mzm. 22:9 Ryir kakyar ḇyedi faro Allah: ipyum syadi Allah fyaspar I, rofyor Allah imarisen kuker I! Snar ikofen kwar: Aya ine Allah Rumkun ḇyedi.”
44Rarirya snon mamun spai fnoḇek I suyakkoryae I kako.
Yesus marmar ḇyedi
27:45-56
(Mrk. 15:33-41; Luk. 23:44-49; Yoh. 19:28-30)
45Randak ro oras samfur seser risuru orkok isof ro oras kior mandira, pampan ya ikawef sup ya fyor ani. 46#Mzm. 22:2 Indokada oras kior ya Yesus dor kuker mkaren ḇeba: “Eli, Eli, lama sabakhtani?” Isoine: Allah Yedi, Allah Yedi, snaro Wabur Aya? 47Kawasa ḇeyores ro dia simnaf rarirya, sikofen: “Dor Elia.” 48#Mzm. 69:22 Ma snonkaku oso ro si ryama fasaw; dun bunek, fa syowen i ro anggur ḇemnir, raimnai kyuki ro amboḇer oso ḇo isui fa Yesus dinem. 49Ḇape snonkaku ḇese sya sikofen: “Mkoḇuk awer, insa komam pan imbude Elia ryama fa fyaspar Indi.” 50Yesus dar naba wer raimnai ryir nyawa ḇyedi.
51 #
Kel. 26:31-33
Ma mkomam, eruk kroben ro Rum Ḇesren ya imsap ra ḇyesuru ro ḇo isof ro sop ma ḇyerim ḇeba, ma urek karu na nakpef, 52ma rus na nḇas, ḇo snonkaku ḇesren ḇemar kwar sya sibor siḇer si. 53Ḇarpur ro Yesus aḇiḇer ḇyedi, sikam sisasyar ro rus, ma ssun ro mnu ḇesren ya fa sfasnai mankunsi faro kawasa ḇeḇor.
54Mananir sarar ma sordade ḇyesi ḇewaren Yesus ansi simkak fafayaḇa ro fafisu smam rim ma roi ḇeḇesya anna, inja sikofen: “Kaku ḇeri, ine Allah Rumkun ḇyedi.”
55 #
Luk. 8:2-3
Ma ro dia bin ono sibor sores ḇinkwan ḇo smam, isoine bin-bin ḇeso Yesus ker Galilea fa ḇeyuf farmyan I. 56Ro fandu si kosmai Maria Magdalena, ma Maria Yakobus ma Yusuf sna suḇedi, ma Zebedeus mandaḇen ḇyesi sna sedi.
Yesus ḇyeḇekrir
27:57-61
(Mrk. 15:42-47; Luk. 23:50-56; Yoh. 19:38-42)
57Mandira kwar snon ḇenana oso snori Yusuf ḇyeknam ro Arimatea, ikako dakḇe manfamyan faro Yesus kwar. 58Rya faro Pilatus ma dor Yesus ḇaken ḇyedi. Pilatus ḇyuk sasoser insa ssḇuki faroi. 59Inja Yusuf dun ḇaken ani, ma pyarek i kuker kruḇen ḇepyoper, 60raimnai ikrir I ro rus ḇebabo ḇyedi, pyaikir ro urk karui, ma ikris kwar karui ḇeba oso ḇe kedwai rus ani, raimnai ibur.
61Ma Maria Magdalena kuker Maria ḇese ani sukain ro dia ro ḇarpon rus ani.
Siwaren Yesus rus ḇyedi
27:62-66
62Meserdi, isoine ras fasasos ya isyonde, mananir imam-imam ma snon Farisi sikam srama ro ḇarpon Pilatus, 63#Mat. 16:21, 17:23, 20:19; Mrk. 8:31, 9:31, 10:33-34; Luk. 9:22, 18:31-33 ma sikofen: “Tuan, inko swarepen, snon ḇefarkor ninyan ani fafisu ikenem ya ikofen: Ras rikior nasyof kwar nari Yiḇer Aya. 64Inja buk sasoser insa siwaren rusya isof ras ḇeḇekior ya; imbude manfamyan ḇyesi kofawiḇa ḇo srama skaraw indi, raimnai sikofen faro kawasa sya, ḇo soḇo: Diḇri kwar ro fandu ḇemar sya, isof farkarkor ninyan ḇepur ya ipyum ḇa syadi ro ḇepon ya.”
65Pilatus ikofen faro si: “Sine manwadwaren faro mko, mkora ma mkowaren rus ani pyum kaku.”
66Rarirya srama kuker fafnoḇek ro manwadwaren ansi sematerai rus ani ma siwareni.
Currently Selected:
MATIUS 27: LAIBHW
Highlight
Share
Copy
Want to have your highlights saved across all your devices? Sign up or sign in
