MATIUS 23
23
Yesus ibri ḇefawi nananem Refo Yahudi ma Farisisya
23:1-36
(Mrk. 12:38-40; Luk. 11:37-54, 20:45-47)
1Ma Yesus ikofen faro kawasa ḇeḇor ma faro manfamyan ḇyesya, doḇo: 2“Ḇefawinananem Refo Yahudi ma snon Farisi skain kwar ro karapesa Moses. 3Inja mkoso ma mkoḇeuser roi ḇeḇor sfarkor faro mko, ḇoi mkoso awer fararur sena, snar sfarkor na ḇape sifrur naba. 4Sfes kamnam ḇemarḇak, raimnai srir na ro kawasa sya erdai sena, ḇape mankunsi ḇardi sakḇyunekro naba. 5#Bil. 15:38; Ul. 6:8; Mat. 6:1 Fararur sifrur nakam, simarisen monda insa snonkaku smam na; imnis raris kaḇrai nadi ḇeḇam ma syatu sena pusyom ḇekwan na; 6simarisen skain ro moḇ ḇekaki ro munara ma ro ḇarpon rum nadi; 7simarisen sisma syom ro pasar ma simarisen sor siḇe Rabi. 8Ḇape mko kada, sap awer mkoḇe Rabi; snar mkosma Rabi oser monda ma mko kam mkoḇe mambekanaek. 9Ma mkap awer mansei ryakaker ḇe kma ro supswan ine, snar Kma oser monda faro mko, isoine Allah ro boiyaswa. 10Sap awer mko kako ḇemanfarkin, snar Manfarkin oser monda faro mko, isoine Wairek. 11#Mat. 20:26-27; Mrk. 9:35, 10:43-44; Luk. 22:26 Mansei ḇeba syadi ro fandu mko, iḇye wer duf farmyan mko. 12#Luk. 14:11, 18:14 Ma mansei ḇekanow mankundi, nari ḇyeḇepandun ma mansei ḇerun mankundi, nari ḇyeḇekanow.
13Mkoroë, ne, ḇefawi nananem Refo Yahudi ma kawasa Farisi, ne, kawasa ḇeḇarḇor mko, snar mkosisen kedwai Ḇaḇesasoser Boiyaswa ro ḇarpon snonkaku. Snar mankun mko mkosun ḇa ma mko dadwarek ḇeḇesewar fa ḇesun sya.
[14Mkoroë, ne, ḇefawi nananem Refo Yahudi ma kawasa Farisi, ne, kawasa ḇeḇarḇor mko, snar mkoren kabom-kabom sya rum sena ma mkosisen wark mamam snonkaku kuker nadi ḇekwan mkoḇena. Inja nari mkosmai samamyai ḇemarḇak syadi.]
15Mkoroë, ne, ḇefawi nananem Refo Yahudi ma kawasa Farisi, ne, kawasa ḇeḇarḇor mko, snar mkokaḇor soren ma mko mbranuk sup, fa mkun snonkaku oser monda insa daksun ro agama mkoḇedi ma syun kwar, mkofrur iḇe romawa for ḇemḇrerḇa, ḇeḇarḇor syadi ḇe suru ro mankun mko.
16Mkoroë, ne, manfarkin ḇepraf, ḇekofen: Soar imnis raris Rum Ari Ḇesren, soar ani dau roi oso ḇa; ḇape soar imnis raris brawen ro Rum Ari Ḇesren, soar ani iyaḇek. 17Ne, mko snonkaku ḇefawi royoḇa ma snonkaku ḇepraf, rosaiso ḇeḇefandun syadi, brawen roḇa Rum Ari Ḇesren ḇefasren brawen ansi? 18Soar imnis raris rokef farsarser, soar ani daw roi oso ḇa; ḇape soar imnis raris farsarser ḇero rokef ya, soar ani iyaḇek. 19Ne, mko snonkaku ḇepraf, rosai ḇeḇefandun syadi, farsarser roḇa rokef farsarser ḇefasren farsarser anna? 20Inja mansei ḇesowar imnis raris rokef farsarser syowar imnis raris rokef farsarser ma kako imnis raris roi ḇeḇor kam ḇerir ro bori na. 21Ma mansei ḇesowar imnis raris Rum Ari Ḇesren, syowar imnis raris Rum Ari Ḇesren ma kako imnis raris I, ḇekain ro rum ani. 22#Yes. 66:1; Mat. 5:34 Ma mansei ḇesowar imnis raris Boiyaswa, syowar imnis raris karapesa Allah ma kako imnis raris I, ḇekain ro karapesa ani.
23 #
Im. 27:30
Mkoroë, ne, ḇefawi nananem Refo Yahudi ma kawasa Farisi, ne, kawasa ḇeḇarḇor mko, snar rarwas ḇar ḇeḇesamfur ro marisan, ampui ma konsop mkoḇak na, ḇape roi ḇeḇefandun syadi ro sasoser Refo Yahudi mkamdwerna, isoine: napnapes ma sawarwar ma ḇaḇeuser. Inja kofrur oser ma kopok kamdwer ḇese na ḇa. 24Ne, mko manfarkin ḇepraf, papanursya mkoryan sibur aninem mkoḇena, ḇape onta ḇero aninem na mkoren si.
25Mkoroë, ne, ḇefawi nananem Refo Yahudi ma kawasa Farisi, ne, kawasa ḇeḇarḇor mko, snar skaninem ma ben ḇeyanan mkoḇan sren ḇandisi, ḇape donsi kada sifo kuker fasyar ma rmomen. 26Ne, snon farisi ḇepraf, mkoḇan sren ḇepon sek aninem ya dori resari, rarirya nari ḇandiri kako daksren.
27 #
Kis. 23:3
Mkoroë, ne, ḇefawi nananem Refo Yahudi ma kawasa Farisi, ne, kawasa ḇeḇarḇor mko, snar mkomnis raris russauf kuker kamara ḇepyoper, ipyumra ḇandiri ro mamam, ḇape ro dori ifo kuker ḇemar kor ma buramek. 28Rarirya kako mko, ro mamam snonkaku ro ḇandi mkonapes, ḇape ro mkodom na nafo kuker ḇarḇor ma sasar.
29Mkoroë, ne, ḇefawinananem Refo Yahudi ma kawasa Farisi, ne, kawasa ḇeḇarḇor mko, snar mkoḇawes aḇerpapor ro nabi-nabi ma mkofamankor kakop rusro snonkaku ḇesren sya ma mkokofen: 30Rofyor nko kenem ro awar kpu nkoḇesi kada nari nkakso si ḇa ro mamun smun nabi sya. 31Ḇape rarirya ido mankun mko ḇardi mkoḇe saksi, mḇoi mkoḇe kpu ro ḇemun nabi ansi. 32Inja, mkofamfon sasar ro kpu mkoḇesi! 33#Mat. 3:7, 12:34; Luk. 3:7 Ne, mko ikak, ne, ikak ḇeknampu kpu ḇyesi! Rariso nari mkoper mankun mko ro samamyai for ḇembrer ḇa? 34Inja, mkomam, Aya yawan faro mko nabi-nabi, ma snon ḇefawinananem ma ḇefawi nananem Refo Yahudi: ono ro si nari mkomun si ma mkopai si ro aprop, ono wer nari mko prer si ro rum-rum ari mkoḇena ma mkoḇewayam si ro mnu ḇe mnu. 35#Kej. 4:8; 2Taw. 24:20-21 Insa mko kamar rik ḇesbawer ro snonkaku ḇesasar ḇa, randak ro Habel snon ḇenapes ani, isof ro Zakharia Berekhya mandaḇendi, mkomun ro fandu moḇ ḇesren ma rokef farsarser. 36Yakofen faro mko: Kaku ḇeri roi ḇeḇor nane kam nari syosbabo ine siso ḇeḇar na!”
Fafko ḇekur Yerusalem
23:37-39
(Luk. 13:34-35)
37“Yerusalem, Yerusalem, au ḇemun nabi-nabi ma ḇeso si kuker karui snonkaku siwan yoḇ au sya! Rarwan nabor kwar yaswar kuf fa yafanjur romawa besi, imnis mankoko sinan ḇeryur mkun sesi ro prer ḇyesi baḇsi, ḇape mko mewer. 38Mkomam rum mkoḇanine nari ḇyeḇebur ma ḇyeusḇa. 39#Mzm. 118:26 Ma Yakofen faro mko: Randak ro knikine nari mkomam Aya wer ḇa, isof mko kofen:
Sanandik faro I ḇerama kuker Snonsnon Manseren!”
Currently Selected:
MATIUS 23: LAIBHW
Highlight
Share
Copy
Want to have your highlights saved across all your devices? Sign up or sign in
