MATIUS 24
24
FASAL 24-25 FAFAYA RO PAPUPES SUPSWAN
Allah Rum ḇyedi nari ḇyeḇekakok
24:1-2
(Mrk. 13:1-2; Luk. 21:5-6)
1Raimnai Yesus isasyar ro Allah Rum ḇyedi, ma rya. Manfamyan ḇyesi srama ma sfasnai payamyum ro Allah Rum ḇyedi. 2Ikofen faro si: “Mkomam roi ḇeḇor anna kam? Yakofen faro mko, kaku ḇeri nari karui oso ro dine ḇyeḇemam monda ḇa ḇo ḇyarek ro oso bori; nakam nari neḇekakok.”
Kanderaya myun randak
24:3-14
(Mrk. 13:3-13; Luk. 21:7-19)
3Fafisu Yesus kyain ro urek Zaitun bori, manfamyan ḇyesi srafaroi insa sawawos ro mankunsi kuker I. Sikofen, ḇo soḇo: “Wakofen maro nko, fafisu rosaiso roi anna ne nari ndamuma ya ma aḇyair rosaiso ḇefasnai raramuma bedi ma aḇyair ḇefasna papupes supswan ya?”
4Yesus kyarem faro si: “Mkepen mko insa snonkaku ono sfarkor ninyan awer mko! 5Snar snonkaku sibor srama sap snori ma sikofen: Aya ine Wairek, ma nari sfarkor ninyan kawasa sibor. 6Nari mkomnaf rakrok mbroḇ ma ḇaryas embroḇ. Rariryano mkepen mko, ma mkokarsosen awer; snar roi nane kam nari ndarirya resari, ḇape papupes ya ryama ḇaim. 7Snar er nari sikḇawes sisampum er ḇese, ma ḇaḇesasoser sisampum ḇaḇesasoser ḇese na. Nari basbiser isya ma rim ḇeba nmun ro moḇ nabor. 8Ḇape nakam insape kandera ḇemun randak ḇeyunḇe awar babo ya.
9 #
Mat. 10:22
Rofyor ani nari ssḇuk mko fa sewayam ma smun mko ma nari er ḇeḇor kam sayin mko snar snonsnon Ayedi, 10ma snonkaku sibor nari siwarki ma sḇoḇ yae si ma sayin yae si. 11Nabi sararer sibor nari sikḇawes fa sfarkor ninyan kawasa sibor. 12Ma snar sasar na, naba syadadi inja saswari ro snonkaku sibor ndoë. 13Ḇape mansei ḇemku epen isof ḇarpur ya kada nari isma aski. 14Ma Ankankinem Ḇeḇye ro Ḇaḇesasoser ine nari ḇye ḇeḇaryas ro supswan ḇesiper fa ḇyesaksi faro er sya kam, raimnai insape awar papupes ya.”
Wayam ḇemarḇak ma Wairek-Wairek sararer
24:15-28
(Mrk. 13:14-23; Luk. 21:20-24)
15 #
Dan. 9:27, 11:31, 12:11 “Inja rofyor mkomam ḇarḇor ḇeḇyeḇa ndo moḇ ḇesren, raris Nabi Daniel ikofen kwar – ḇeḇewasya mkokara pyum – 16rarirya kawasa ro sup Yudea iḇye syadi sifrar sibur ḇe bon na. 17#Luk. 17:31 Snonkaku ḇeyun wam ro kaderen ro rum ya bori ido awer fa dun roi oso ro rum ḇyedi, 18ma snonkaku ḇero yaf kyaḇer awer fa dun sansun ḇyena. 19Ara faḇye faro bin-bin ḇemoḇesḇa ma ḇesus romawa ro fafisu ani. 20Mkoḇe nadi, insa rofyor mkofrar mkobur ya isrow awer fafisu prim ya ma isrow awer ro ras Mananai Yahudi ya. 21#Dan. 12:1; Why. 7:14 Snar ro fafisu ani nari wayam ḇefnak ḇa nmun, roi ḇeradine nmun ḇaim ro awar madero isof babo ine ma nari napok nmun wer ḇa. 22Ma rofyor ya Allah ḇyuk fafisu ya fa iknampuḇa kada, nari roi ḇekenem nakam oso isma askiḇa; ḇape snar snonkaku Allah kyimfir sya, eḇedari fafisu ani ḇyei fa iknampuri.
23Rofyor ani snonkaku ono sikofen faro mko: Mkomame, Wairek isya ro dine, roḇaido Wairek isya ro diwa, mkokyar awer si. 24Snar Wairek-Wairek sararer ma nabi-nabi sararer nari sikḇawes ma nari sifrur aḇyair ḇeba syadi ma aḇyair kanandor, isof sfarkor ninyan snonkaku Allah kyinfir kwar sya kako. 25Mkoswarepen naḇye, Yakofen na ḇepon kwar faro mko.
26 #
Luk. 17:23-24
Inja, rofyor ono sikofen faro mko: Mkomame, Isya ro sup ḇeursḇa, mkoramura awer; roḇaido: Mkomame, Isya ro sim ya dori, mkokyar awer. 27Snar imnis raris samar ḇearḇeḇer ro ḇar wamurem ḇe ḇar wambarek, rarirya kuker raramuma ro Rumkun Snonkaku.
28 #
Luk. 17:37
Ro moḇ rosai ḇepsursya sisya, ro dia mankankan spanjuḇer.”
Rumkun Snonkaku raramuma ḇyedi – Sarḇer ro ara knam
24:29-36
(Mrk. 13:24-32; Luk. 21:25-33)
29 #
Yes. 13:10, 34:4; Yeh. 32:7; Yl. 2:10, 31, 3:15; Why. 6:12-13 “Fafisu wayam ani isyof fasaw bur, ori nari pyampan ma paik ya isnaiḇa ma mak sya nari sfarsapi ro nanki ma papoik-papoik ro nanki nari namarmer. 30#Dan. 7:13; Why. 1:7 Rofyor ani nari aḇyair Rumkun Snonkaku fyasnai ro nanki ma kawasa kam ro supswan ine nari skanes ma nari smam Rumkun Snonkaku ryama ro mandif ro nanki kuker papoik ma payamyum ḇyena. 31Ma nari Iwan malaikat-malaikat ḇyesi fa sisasyar ma siwuf sonker berok naba kaku ma nari siryur snonkaku Allah kyimfir kwar sya ro supswan ḇesiper.
32Mkun farkarkor ro sarḇer ara knam: Rofyor snau-snau ḇyena nakpirew ma nkakyei randak, mkofawi fyor ryas ya fyanam kwar. 33Rarirya kako rofyor mkomam roi ḇeḇor nane kam, mkofawi beri, mḇoi fafisu ḇyedi fyanam kaku kwar, ro kedwai ya ḇarpondi. 34Yakofen faro mko: Kaku ḇeri syos ine, nari ryo ḇaim, roi ḇeḇor nane ndarirya resari. 35Nanki ma supswan ine nari ndo, ḇape wos Ayedi kada nari ryoḇa.
36 #
Mrk. 13:32
Ḇape ras ma fafisu ani snonkaku oso ipok ifawiḇa beri, ma malaikat-malaikat ro boiyaswa kako roḇa, ma Rumkun ya kako roḇa, derer Mami mankundi.”
Ananun wadwaren
24:37-44
(Luk. 17:26-30, 34-36)
37 #
Kej. 6:5-8
“Snar imnis raris roi ḇeḇesya ro awar Nuh, rarirya kako nari roi ḇeḇesya anna ndarirya kako ro raramuma ro Rumkun Snonkaku ya. 38Snar imnis raris kawasa ro awar faḇruḇ ya ḇaim, sanan ma sinem, sekawin ma sfakawin si, isof ro ras Nuh syun ro wai ya, 39#Kej. 7:6-24 ma sifawi royoḇa beri ḇepon ro faḇruḇ ya ryama myun sikam, rarirya kako nari roi ḇerarirya ndama ro fafisu rarama Rumkun Snonkaku ya. 40Rofyor ani snonkaku risuru suisya ro yaf, nari oso ḇyeḇeyun ma sumin ya ḇyeḇebur; 41rofyor bin risuru suso fas, sumindi ḇyeḇeyun ma sumindi ḇyeḇebur. 42Inja iḇye mkepen mko, snar mkofawiḇa ras rosai Manseren mkoḇedi ryama ya.
43 #
Luk. 12:39-40
Ḇape mkofawi mnuk ine: Ro fafisu tuan ḇena rum ya ifawi ḇepon fafisu rosai ḇekaraw sya srama ro roḇ ya, nari iwaren ma ipok myam monda rum ḇyedi ḇo sfasyari ḇa. 44Rarirya mko kako mkofasos, snar Rumkun Snonkaku ryama ro fafisu mkokaraḇa.”
Sarber ro manfamyan ḇeḇesyowi ma manfamyan ḇeḇarḇor
24:45-51
(Luk. 12:41-48)
45“Manfamyan mansei ḇeḇesyowi ma ḇefawi nananem, ikada tuan ḇyedi ikanow i fa myamwarek snonkaku ḇyesi ma ḇyuk nanan faro si ro fafisu ya? 46Aski faro manfamyan, rofyor tuan ḇyedi isrow isya ifararur ro fararur ḇyedi ro fafisu tuan ḇyedi ryama. 47Yakofen faro mko: Kaku ḇeri nari tuan ḇyedi ikanow i fa myamwarek roi ḇeḇor ḇyena kam. 48Ḇape rofyor manfamyan ani iḇarḇor ma ikofen ro sneri: 49Tuan ayedi nari ryakaki muma ḇa, inja irandak iprer manfamyan ḇese sya, ma dan dinem kuker ḇemasaser sya, 50rarirya tuan ḇyani nari ryama ro fafisu kyara ḇaḇeri, ma ifawi ḇa, 51ma nari myun i ma ifrur faroi imnis snonkaku ḇeḇarḇor. Ro diwa kada nari ismai kankanes ma arkfafais nakor.”
Currently Selected:
MATIUS 24: LAIBHW
Highlight
Share
Copy
Want to have your highlights saved across all your devices? Sign up or sign in
