MATIUS 19
19
Ḇaḇefaspar
19:1-12
(Mrk. 10:1-12)
1Yesus ḇyuk farkarkor posa kwar, ibur ro Galilea ma syuḇer ro Yudea ro war Yordan ḇarya. 2Kawasa sibor semarani ḇo siso i ma ḇyuk pararei faro si rodia.
3Snon Farisi ono srama faro Yesus fa sifrowes sas i. Sifuken: “Iḇyeke snon oso fyaspar swari kuker knam famfnom monda?”
4 #
Kej. 1:27, 5:2 Yesus kyarem: “Mkowasya ḇake, ḇefrur snonkaku sya ro randak ya ifrur snon ma bin? 5#Kej. 2:24 Ma ikofen: Rarirya snonya nari ibur snari ma kmari ma ḇyeoser kuker swari, isof sukam suḇe ḇaken oser. 6Rarirya suḇe suru werḇa ḇoi suḇe oser. Inja, rosai Allah ḇyefa ḇeḇeoser kwar, snonkaku sipok sfaspar i ḇa.”
7 #
Ul. 24:1-4; Mat. 5:31 Sikofen faroi: “Rarirya ido, snaro Moses ḇyuk sasoser fa ssḇuk syap faspar rofyor snon oso fyaspar swari?”
8Yesus ikofen faro si: “Snar mkosnemna npakrek eḇedari Moses ḇyuk fa mkofaspar swa mkoḇesi, ḇape ro randak ya raririrya ḇa. 9#Mat. 5:32; Luk. 16:18; 1 Kor. 7:10-11 Ḇape yakofen faro mko: Mansei ḇefaspar swari, mḇoi swari ifrur farḇakbuk ḇa, raimnai ḇyuk bin oso ḇese, ikada ifrur farḇuk.”
10Manfamyan ḇyesi sikofen faro i: “Rofyor ḇaḇeoser fakawinya ryarirya ido, ipyum syadi fakawino awer.”
11Rarirya ikofen faro si: “Kawasa sipok sifawi kam wos ineḇa, derer faro snonkaku ḇesma fakamaman sya. 12Snon ono sisya sipok sfakawin ḇa snar spansnasem rofyor sisnassi saḇen si ḇayim, ma snon ono sḇeḇekar, ma snon ono wer mankunsi sifrur rarirya snar Ḇaḇesasoser Boiyaswa. Mansei ḇepok ḇefawi ido ikada ifawi.”
Yesus ḇyeḇok romawa kapirare si
19:13-15
(Mrk. 10:13-16; Luk. 18:15-17)
13Raimnai snonkaku ansi ssun faro Yesus roma kapira ono, insa isawardofen si ma ḇyenadi kuker si; ḇape manfamyan ḇyesi simsor snonkaku ansi. 14Ḇape Yesus ikofen: “Mkorir romawa kapira ansi, srama faro aya ḇo mkodwarek awer si; snar snonkaku ḇemnis sisya siso ḇena Ḇaḇesasoserro Boiyaswa.”
15Raimnai isawardofen si posa ḇarpur ya ibur moḇ ani.
Snonkḇor ḇenana
19:16-26
(Mrk. 10:17-27; Luk. 18:18-27)
16Snon oso ryama faro Yesus ma ikofen: “Guru, fararur syowi rosaiso nari yafrur insa yaksmai kankenem ḇemnaiḇa ya?”
17Yesus kyarem: “Snaro wafuken Aya ro mnuk rosai ḇeḇye ya? Derer oser monda ḇeḇye ya. Ḇape rofyor wamarisen waksun ro kankenemya ido beuser Allah sasoser ḇyena kam.”
18 #
Kel. 20:13-16; Ul. 5:17-20 Snon ani ikofen faro I: “Sasoser rosai ḇeḇesyani?” Yesus ikofen: “Mamun awer, wafrur farḇuk awer, kwaraw awer, ḇesaksi ankarkar awer, 19#Kel. 20:12; Im. 19:18; Ul. 5:16 ḇesyowi snami ma kmami ma waswar min besi ḇese imnis waswar mankundaw.”
20Snonkḇor ani ikofen faro i: “Nakam yaḇeuser na kwar, rosai ḇemnisḇa kaker ya?”
21Yesus ikofen faro i: “Rofyor wamarisen wafrur imnis ido, rwamura, ḇoḇ nana ḇeḇor bena ma bukna faro snonkaku ḇesaḇarar sya, rarirya nari wasmai nana ro boiyas, ḇarpurya rwamuma ma waso Aya.”
22Fafisu snonkbor ani imnaf wos anna, ibur kuker sne ḇefafardun, snar nana ḇyena nabor.
23Yesus kofen faro manfamyan ḇyesi: “Yakofen faro mko; kaku ḇeri syamswen kaku faro snon ḇenana oso fa daksun ro Ḇaḇesasoser ro Boiyaswa. 24Yakofen wer faro mko, ipyan syadi onta oso syun ro wairusmkir ya ro snon ḇenana oso syun ro Ḇaḇesasoser Allah.”
25Ro fafisu manfamyan sya simnaf rarirya, sikḇiresma sikofen: “Rofyor raririrya ido nari mansei ḇesma koreri ya?”
26Yesus myam si ma ikofen: “Faro snonkaku roi nane ndariryaḇa, ḇape faro Allah roi ḇeḇor kam ndarirya.”
Ḇaḇyak kosma ro Yesus rofyor kosoi
19:27-30
(Mrk. 10:28-31; Luk. 18:28-30)
27Raimnai Petrus kyarem ma ikofen faro Yesus: “Inko ine inkobur kam roi ḇeḇor inkoḇena kwar ma inkoso Au; inja ḇaḇyak rosaiso nari inko isma ya?” 28#Mat. 25:31; Luk. 22:30 Yesus ikofen faro si: “Yakofen faro mko, kaku ḇeri rofyor awar babo ro fafisu Rumkun Snonkaku ya dek ro karapesa nasanḇyedi, mko ine, ḇeso Aya kwar, nari mkokain kako ro karapesa samfur seser risuru fa mkakḇe mankara keret samfur seser risuru ro er Israel. 29Ma mansesi ḇebur kwar rum sena, roḇa naek ma srar sesi, roḇa sna ma kma sesi, roḇa romawa sesi, roḇa yaf sena snar Aya, snon ani nari isma kaḇer utin ḇeutin ma nari isma kankenem ḇemnaiḇa ya.
30 #
Mat. 20:16; Luk. 13:30 Ḇape kawasa ḇeḇor ḇepon sya nari spupes, ma ḇepupes sya nari spon.”
Currently Selected:
MATIUS 19: LAIBHW
Highlight
Share
Copy
Want to have your highlights saved across all your devices? Sign up or sign in
