MATIUS 18
18
Mansei ḇeba syadi ro Ḇaḇesasoser Boiyaswa
18:1-5
(Mrk. 9:33-37; Luk. 9:46-48)
1 #
Luk. 22:24
Rofyor ani manfamyan ansi srama faro Yesus ma sifuken: “Manseiso ḇeba syadi ro Ḇaḇesasoser Boiyaswa?”
2Inja Yesus dor romawa kasun oso fa dores fandu si raimnai ikofen: 3#Mrk. 10:15; Luk. 18:17 “Yakofen faro mko, kaku ḇeri rofyor mkombror ma mkomnis kuker romawa kasun ineḇa ido, nari mkopok mkosun ro Ḇaḇesasoser Boiyaswa ḇa. 4Mḇoi mansei ḇerun sneri fa imnis romawa kasun ine, iso ḇeba syadi ro Ḇaḇesasoser Boiyaswa. 5Mansei ḇefaduru romawa kasun ḇeradine snar snonsnon Ayedi, ikada fyaduru Aya.”
Mansei ḇeḇeninyan snonkaku
18:6-11
(Mrk. 9:42-48; Luk. 17:1-2)
6“Ḇape mansei ḇeḇeninyan oser ḇaken ro romawa kasun ḇekyar faro Aya sine, iḇye wer sfes karui yas-yas oso ro sasukor ḇyedi ma simsawer i ro soren. 7Supswan ryokada kuker ḇaḇeninyan ḇeḇor ḇyena: Mḇoi ḇaḇeninyan ya isya, ḇape snonkaku ḇeḇeninyan ya ryokada.
8 #
Mat. 5:30
Rarirya rofyor ḇramin roḇa wemin besi oso ḇyeninyan au, kwaruk i ma wasawen i, snar ipyum syadi faro au fa swun ro kankenem ya kuker ḇaramuk roḇa bemanis ro wasararir kuker ḇramin besuya ma wemin besuya ḇo si sawen au ro for ḇemḇrerḇa. 9#Mat. 5:29 Na rofyor mka besu ya oso ḇyeninyan au, weri ma wasawen i, snar ipyum syadi faro au fa swun ro kankenem ya kuker mka oser ro bemka risuru ḇo sisawen au ro for ḇembrerḇa.
10Mkoswarepen, ro karkara mkoḇena mkorun awer oso ro romawa kasun sine. Snar yakofen faro mko: Malaikat sesi sisya ro boiyaswa ḇemam Mami ḇarpon ḇyedi ḇesyakwar ro boiyaswa.
[11Snar Rumkun Snonkaku ryama fa ḇyuk aski faro snonkaku ḇeḇor sya.]”
Sarḇer ro domba ḇeḇor
18:12-14
(Luk. 15:3-7)
12“Rariso karkara ḇedi? Rofyor snonkaku oso ismai domba utin oser, ma oso ro si iḇor, rariso nari ryirḇake samfur risiw seser risiw ansi ro ḇonya ḇo rya syewar ḇeḇor ani? 13Ma yakofen faro mko: Kaku ḇeri rofyor ismai, raryaḇ ḇyedi iba syadi snar oser ani, ro samfur risiw seser risiw ḇeḇorḇa ansi. 14Rarirya kako Kma mkoḇedi ro boiyas imarisenḇa fa oser ro romawa sine iḇor.”
Ananun ro fandu naek ma srar
18:15-20
15 #
Luk. 17:3
“Rofyor naek bedi ifrur sasar, wasoneki ro fafisu muyerer. Rofyor imnaf anun bena rarirya wasma kaḇer naek bani wer. 16#Ul. 19:15 Rofyor imnaf auḇa, wun snonkaku oser roḇa suru wer, insa farkarkor ro snonkaku risuru roḇa kior ḇeḇesaksi ro wawos ani ḇyeḇeyawos namuk kwar. 17Rofyor fyandun siḇa, mkun wawos anna faro jemaat. Ma rofyor imewer imnaf jemaat kako, ikada komam i imnis snonkaku ḇefawi Allah ḇa roḇaido imnis snon ḇeyor som.
18 #
Mat. 16:19; Yoh. 20:23 Yakofen faro mko: Kaku ḇeri rosai mkofes ro supswan ine nari neḇefes ro boiyas ma rosai mkoper ro supswan ine nari neḇeper ro boiyas.
19Ma yakofen wer faro mko: Rofyor snonkaku risuru ro fandu mko ro supswan ine suḇe sne oser fa suyor rosairya kaker, fararyor suḇedi Kma yedi ro boiyaswa nari ḇyuki faro su. 20Snar ro moḇsai snonkaku risuru roḇa kior siryur kuker Snori, ro moḇ ani Aya isya ro fandu si.”
Sarḇer ḇekur ḇaḇepayasyos ro sasar
18:21-35
21 #
Luk. 17:3-4
Ḇarpurya Petrus ryama ikofen faro Yesus: “Manseren, nari yaḇuk ampun ḇefis faro naek yedi ḇefrur sasar maro aya? Isof ḇefikke?” 22Yesus ikofen faroi: “Roḇa! Yakofen faro au: Isof ḇe fikḇa, mḇoi isof samfur rifik ḇe fik.
23Snar Ḇaḇesasoser Boiyaswa imnis raris wairek oso ḇemarisen ḇefrur karkor kuker manfamyan ḇyesi. 24Rofyor irandak kwar kuker karkor ani, ssun faroi snon oso ḇeḇenyaki talenta syaran samfur. 25Ḇape snon ani ipok fa ḇyak nyaki ḇyenaḇa, inja wairek ani ḇyuk sasoser insa sḇoḇi kuker kina ḇyena ma nana ḇeḇor ḇyena kam fa sḇukḇak nyaki ḇyena. 26Ḇape manfamyan ani ḇyansuba ma syom wairek ani ḇo ikofen: Wakḇaḇ aya resari, nyaki ḇeḇor ayena kam nari yaḇak pres na. 27Inja saswar ya dek ro wairek ani sneri faro manfamyan ani, isof ipyos nyaki ḇyena ma ḇyemkei i.
28Ḇape rofyor manfamyan ani isasyar, isrow manfamyan ḇese wer ḇeḇenyaki faroi dinar utin oser. Iserepen i ma damkoser min ḇyani sasukor ḇyedi, ḇo ikofen: Bak nyaki bena! 29Ma min ḇyani ḇyansuba ḇo dor faroi: Wakḇaḇ aya resari, nyaki ayena nari yaḇak nakam. 30Ḇape fyandunḇa ḇoi ḇyemin ḇyani fa ismai ro bui isof ḇyakpres nyaki ḇyena.
31Min ḇese ḇyesi smam rarirya sisnesna nfafardun ma sra sikofen ḇayir roi ḇeḇor ḇeḇesya anna faro tuan sani. 32Wairek ani iwan fa sor snon ani ma ikofen faroi: Ne, manfamyan ḇeḇarḇor, nyaki bena kam yapyosna kwar snar wor kwar ro aya. 33Snaro au kako wakswar min bediḇa imnis moḇ yaswar au raya? 34Inja tuan ḇyani imsori ma ḇyuki faro ḇewaren ḇui, isof ḇyak pres nyaki ḇyena.
35Inja Kma yedi ro boiyaswa nari dakfrur rarirya kako faro mko, rofyor mkono oser-oser ḇyuk ampunḇa faro naek ḇyedi kuker sne ḇesiper.”
Currently Selected:
MATIUS 18: LAIBHW
Highlight
Share
Copy
Want to have your highlights saved across all your devices? Sign up or sign in
