MARKUS 11
11
Ruma Isa lu'una d̄i Yerusalem weha ao kai na'e ra ntoru
(Mat. 21:1-11, Luk. 19:28-40, Yah. 12:12-19)
1Wakatu d̄enira Yerusalem, siad̄oho ronggana aka kota Betfage ro Betania, d̄i kengge Doro to'i Zaitun. Ta ede d̄ua dou anamori-Na rakau lao ulu b̄a Ruma Isa. 2”Laopu aka kampo d̄i tando ede,” nggahi Ruma Isa d̄i siad̄oho. ”Ndede lu'u nggomid̄oho d̄i kampo ede, nggomid̄oho ma'edaku sab̄ua ana keledai rad̄iki, ma watipu iu nente b̄a dou. Horipu keledai ede ro wa'a ca'arapu. 3Ro nggara warasi dou masod̄imu b̄ab̄auku nggomid̄oho horikaimu keledai ede, nggahipu, ’Ruma maparaluna, ro Sia nab̄ali rociku.’ ”
4Anamori Ruma Isa d̄uana ede laona, ro edana sab̄ua ana keledai rad̄iki d̄i tad̄a ncai uma d̄i kengge ncai. Edempara hori b̄a siad̄oho keledai ede. 5Dou-dou ma kid̄i ta ede sod̄ina d̄i siad̄oho, ”Oe, au rawi nggomid̄oho? B̄ab̄au d̄i horikaimu ana keledai ede?”
6Cambe b̄a siad̄oho b̄une rawa'u nggahi b̄a Ruma Isa d̄i siad̄oho. Edempara dou-dou ede co'ona siad̄oho wa'ana keledai ede. 7Wakatu ronggana d̄i Ruma Isa, kontu keledai ede lama b̄a siad̄oho kai jumba siad̄oho, edempara nente b̄a Ruma Isa. 8Mboto dou mawira jumbana d̄i ncai, wara rau ma rea d̄i woha ncai sanga-sanga haju mpida raweha b̄a siad̄oho aka omana. 9#Mzm. 118:26 Dou-dou ma lampa ulu ro dou-dou ma d̄ende kontu, sara'ana nanggahi, ”Roi ra wadi Ruma Hatalla! Ruma Hatalla mambeina bareka d̄i Sia ma mai kai ngara Ruma! 10D̄ese ra ntasa pamareta-Na d̄imamai kento – pamarenta Daud wa'i ra waro b̄a ndaita! Roi ra wadira Ruma Hatalla Ma Wancu d̄ese ra ntasa!”
11Cumpukaina Ruma Isa rongga aka Yerusalem, edempara lu'una d̄ei Bait Allah. Ta ede tio kalili b̄a Sia. Pala b̄ara wa'ura tampu'u rindi ai, edempara Sia laona aka Betania sama-sama lab̄o sampuru d̄ua anamori-Na.
Ruma Isa sumpana fu'u ara
(Mat. 21:18-19)
12B̄ala ai sanai, wakatu siad̄oho wunga lampa losana rad̄i Betania, Ruma Isa iuna hid̄o. 13Eda sando'o b̄a Sia sampu'u fu'u ara mandad̄i ro'ona. Ndad̄i Sia laona d̄i fu'u ara ede b̄ara ne'ena tio sab̄ua wara wuana. Pala wakatu rongga Sia d̄i fu'u ara ede, Sia wati edana au-au, selasi ro'o mpoana, b̄ara wakatu ede watipu wakatu mbuakai fu'u ara. 14Edempara Ruma Isa nggahina d̄i fu'u ara ede, ”Tampu'u ake wati wara kone sab̄ua dou rau d̄imangaha wua nggomi wali!”
Anamori-anamori Ruma Isa ringana nggahi ede.
Ruma Isa lu'una d̄ei Bait Allah
(Mat. 21:12-17, Luk. 19:45-48, Yah. 2:13-22)
15Sawa'u b̄a ede siad̄oho ronggara aka Yerusalem, ro Ruma Isa lao walina aka Bait Allah. Ta ede Sia tampu'u b̄aka kalosana sara'a dou malanda ra lajo d̄i hid̄i ede. Ponga b̄a Sia meja-meja sanikina dou macepe piti, ro bangko-bangko dou malanda nasi dara. 16Ro wati wara kone sab̄ua dou rau d̄i kau b̄a Sia wa'a au-au lampa sai sarei Bait Allah ede. 17#Yes. 56:7, Yer. 7:11 Edempara ngoa ra tei b̄a Ruma Isa dou-dou ta ede. Nggahi Sia, ”D̄i ade Alkitab ratunti ndake: Nggahi Ruma Hatalla, ’Uma-Ku d̄ipehekai uma hid̄i do'akai d̄i ru'u samenana bangsa.’ Pala nggomid̄oho kandad̄ikaimu sob̄u parampo!”
18Dou-dou mana'ekai imam ro guru-guru agama ringana nggahi ede. Edempara siad̄oho tampu'u ngupana ncai b̄a ne'ena hade Ruma Isa. Siad̄oho nadahu d̄i Sia, b̄ara samenana dou nad̄ihi adena ringa ngoa ra tei b̄a Sia.
19D̄eni rangad̄i ai, Ruma Isa ro anamorid̄oho-Na tu'u wi'ina kota ede.
Tana'o rad̄i fu'u ara
(Mat. 21:20-22)
20Nai sid̄i-sid̄i, wakatu lampa sai b̄a siad̄oho fu'u ara ede, siad̄oho edana fu'u haju ede nawa'ura made sampe awa amuna. 21Edempara kawara b̄a la Petrus mandad̄i sanai sawatipu b̄a ede. Edempara la Petrus nggahina d̄i Ruma Isa, ”Pa Guru, tatiopu! Fu'u ara rasumpa b̄a Ita ede nawa'ura made!”
22Cambe b̄a Ruma Isa, ”Imbipu d̄i Ruma Hatalla. 23#Mat. 17:20, 1Kor. 13:2 Poda nggomid̄oho maloaku nggahi d̄i doro to'i ake, ’Hantapu wekimu ro lao pakipu wekimu d̄i ade moti!’ ndad̄i lampa rawi ede d̄i karawi d̄i ru'u nggomid̄oho; sura nggomid̄oho wati mbali mbua ademu, ro nggomid̄oho imbimu b̄a one au ranggahi b̄a nggomid̄oho ede d̄imapoda-poda ndad̄i. 24B̄ara ndedena kawarapu ake: Nggomid̄oho mado'asi ro rahomu au-au, imbipu b̄a one Ruma Hatalla nawa'ura mbei nggomid̄oho au raraho b̄a nggomid̄oho, ndad̄i nggomid̄oho d̄imatarimana. 25#Mat. 6:14-15 Ro nggara nggomid̄oho mado'asi, pala wara dou d̄i ihakai ademu, kangampu wa'upu dou ede, loakud̄u Amamu d̄i Saroga rau makangampu wea dosa-dosamu. [26Nggara nggomid̄oho wati kangampu weamu dou makalai, Amamu ma aka Saroga rau wati pehena kangampu wea dosa-dosamu.]”
Sod̄i mab̄oha hak Ruma Isa
(Mat. 21:23-27, Luk. 20:1-8)
27Siad̄oho lao mbali walina aka Yerusalem. Ro Ruma Isa wunga lampa kalilina d̄i ade Bait Allah, dou-dou mana'ekai imam, guru-guru agama, ro dou-dou mana'ekai Yahudi mai rakana Ruma Isa. 28Sod̄i b̄a siad̄oho, ”Kai dasa auku Nggomi karawimu sara'ana ake? Cou ma rambei hak ede d̄i Nggomi?”
29Cambe b̄a Ruma Isa, ”Nahu rau kane'e sod̄i d̄i nggomid̄oho. Cambepu ro Nahu d̄imangoa d̄i nggomid̄oho kai hak cou karawi b̄a Nahu lampa rawi ake. 30La Yahya kandeu karasona dou kai hak cou, Ruma Hatalla atao manusia?”
31Edempara dou-dou mana'ekai imam ro dou-dou mana'ekai Yahudi tampu'ura mafakana d̄i ade weki siad̄oho. Nggahi siad̄oho, ”Nggara nggahisi b̄a ndaita, ’Kai hak Ruma Hatalla,’ nanggahiku b̄a Sia, ’B̄ab̄auku nggomid̄oho wati imbikaimu d̄i la Yahya?’ 32Pala ncoki rau ne'emu nggahi, ’Kai hak manusia’ ” B̄ara siad̄oho nadahuku d̄i dou mamboto, b̄ara sara'a dou nawi'ikaiku la Yahya sab̄ua dou nabi. 33Ndad̄i, cambe b̄a siad̄oho, ”Nami wati b̄ademu.”
Edempara nggahi Ruma Isa d̄i siad̄oho, ”Nggara ndedesi, Nahu rau wati ne'eku ngoa d̄i nggomid̄oho kai hak cou Nahu karawi kai-Ku samenana ake.”
Currently Selected:
MARKUS 11: LAIBHP
Highlight
Share
Copy
Want to have your highlights saved across all your devices? Sign up or sign in
@LAI 2001
