MARKUS 10
10
Ruma Isa ngoa ra teina mab̄oha ncengga
(Mat. 19:1-12, Luk. 16:18)
1Edempara Ruma Isa tu'u wi'ina hid̄i ede, ro laona aka dana ra rasa Yudea ro dana ra rasa ipa b̄ae b̄a Sori Yordan. Dou mamboto mai kanggudu walina d̄i kompe ra pei Ruma Isa. Ro b̄une ranginakai Ruma Isa ngoa ra teina siad̄oho.
2Pila-pila dou Farisi mai rauna b̄a ne'ena b̄ab̄u Ruma Isa. Sod̄i b̄a siad̄oho, ”Nggahi hukum agama ndaita, sab̄ua loaku dou wi'i weina?”
3Cambe b̄a Ruma Isa, ”La Musa mbeina parenta au d̄i ru'u nggomid̄oho?”
4 #
Ul. 24:1-4, Mat. 5:31 ”Musa nakauku dou wi'i weina, sura tunti ulu wa'una sura ncengga,” cambe b̄a siad̄oho.
5”Musa tuntina parenta ede b̄ara nggomid̄oho nawancuku ncoki d̄i ngoa ra tei,” nggahi Ruma Isa d̄i siad̄oho. 6#Kej. 1:27, 5:2 ”Pala aipu sarambana, aipu wakatu ’Ruma Hatalla kandad̄ina manusia, nggahina b̄a one Ruma Hatalla kandad̄ina siad̄oho mone ro siwe. 7#Kej. 2:24 B̄ara ndedena dou mone natu'u wi'iku ina ra amana ro campona lab̄o weina, 8ndad̄i d̄uana ede ndad̄i sab̄ua.’ Ndad̄i, siad̄oho laina d̄ua dou wali, malaisi sab̄ua. 9B̄ara ndedena, au rawa'u kasab̄ua b̄a Ruma Hatalla, wati loa d̄icengga b̄a manusia!”
10Sawa'u b̄a siad̄oho lu'una d̄ei uma, anamorid̄oho-Na sod̄ina Ruma Isa mab̄oha lampa rawi ede. 11#Mat. 5:32, 1Kor. 7:10-11 Nggahi Ruma Isa d̄i siad̄oho, ”Cou ma wi'i weina edempara nikana lab̄o siwe makalai, dou ede najina d̄i weina ma sararamba ede. 12Ndede rau dou siwe mawi'i rahina edempara nikana lab̄o mone ma kalai, sia rau najina.”
Ruma Isa mbeina bareka d̄i d̄ambe-d̄ambe to'i
(Mat. 19:13-15, Luk. 18:15-17)
13Wara dou-dou mawa'a d̄ambe-d̄ambe to'i d̄i Ruma Isa loakud̄u Sia d̄ama ro mbeina bareka siad̄oho. Pala anamori-anamori Ruma Isa nggahikaina doud̄oho ede. 14Edana lampa rawi ede, Ruma Isa mbanina edempara Sia nggahina d̄i anamorid̄oho-Na, ”Co'opu d̄ambe-d̄ambe to'i ede maina d̄i Nahu! Aina kantamu siad̄oho, b̄ara dou-dou b̄une akeku d̄imandad̄i anggota ela Karaja'an Allah. 15#Mat. 18:3 Kawarapu ake! Cou mawati mai satando Ruma Hatalla b̄une sab̄ua ana dou to'i, wati d̄imandad̄i anggota ela Karaja'an Allah.” 16Sawa'u b̄a nggahi ndedena, pohu b̄a Ruma Isa d̄ambe-d̄ambe to'i ede, edempara toho b̄a Sia rima-Na ese wawo siad̄oho cua-cua ndaina ro mbeina bareka siad̄oho.
Dou mantau ra wara
(Mat. 19:16-30, Luk. 18:18-30)
17Wakatu Ruma Isa lampa lao wali-Na, sab̄ua dou mai rai-raina d̄i Ruma Isa. Dou ede sujuna d̄i tando Ruma Isa ro sod̄ina, ”Guru ma taho, auku d̄i pab̄ua karawi b̄a mada loakud̄u rakaku mori masapodakaina ro ma'ederahid̄i?”
18”B̄ab̄auku nggomi nggahikaimu Nahu taho?” sod̄i b̄a Ruma Isa. ”Wati wara ma taho, selasi ndai Ruma Hatalla. 19#Kel. 20:12-16, Ul. 5:16-20 Nggomi mawa'ura b̄ade parenta-parenta Ruma Hatalla, ’Aina hade dou, aina jina, aina mpanga, aina nuntu ra nggahi cowa, aina tipu dou, lia ra horomapu ama ro inamu.’ ”
20”Pa Guru,” nggahi dou ede, ”samenana parenta ede wa'ura b̄atu b̄a mada ra'aipu to'i wa'uku.”
21Ntanda b̄a Ruma Isa dou ede kai meci ra ca'una edempara nggahina, ”D̄i sab̄ua walipu lampa rawi d̄i pab̄ua karawi b̄a nggomi. Laora landa sara'apu ntau ra waramu; pitina mbeipu dou mancoki mori, ro nggomi d̄imaraka ntau ra wara aka saroga. Sawa'u b̄a ede mai b̄atupu Nahu.” 22Ringana nggahi ndede Ruma Isa, dou ede to'i adena, edempara tu'u wi'ina hid̄i ede kai adena masusa b̄ara sia nawancuku ntau ra warana.
23Edempara ntanda b̄a Ruma Isa anamorid̄oho-Na edempara nggahi-Na d̄i siad̄oho, ”Nawancuku ncokina d̄i ru'u b̄a dou mantau ra wara ndad̄i anggota ela Karaja'an Allah!”
24Anamorid̄oho-Na nambora akana ringana nggahi Ruma Isa ede. Pala Ruma Isa nggahi walina, ”Ana-ana-Ku, nancoki podaku ndad̄i anggota ela Karaja'an Allah! 25Nancewi mod̄apu sab̄ua onta lu'u d̄ei karonga nda'u ntewi kaisi lab̄o sab̄ua dou mantau ra wara lu'u d̄i Karaja'an Allah.”
26Nggahi ra eli Ruma Isa ede nakamboraku aka anamorid̄oho-Na, ndad̄ina siad̄oho sod̄i mena angina d̄i sab̄ua lab̄o sab̄ua dou, ”Nggara ndedesi, couku maloa salama?”
27Ruma Isa ntanda-Na siad̄oho ro cambena, ”Ru'u manusia ede wati lu'u b̄a aka, pala wati wara d̄idaloa b̄a Ruma Hatalla; sara'ana naloaku b̄a Ruma Hatalla.”
28Edempara nggahi la Petrus, ”Tiopu, madad̄oho wa'ura tu'u wi'imu sara'ana d̄i b̄atukaimu Ita.”
29Nggahi Ruma Isa, ”Imbipu: dou ma wa'ura tu'u wi'i uma ra salajana, atao sa'e ra ari monena atao amancawana, atao inana, atao amana, atao ana-anana, atao tolo ra oma rauna b̄ara b̄atuna Nahu ro b̄ara Haba Mataho ma ramai ta Ruma Hatalla, 30dou ede d̄imatarima ncewi mboto d̄i wakatu ake. Sia d̄imaraka saratu kali ncewi mboto uma, sa'e ra ari monena, amancawana, ina, ana-anana, tolo ra oma, – ro kancoki rau. Ro pea d̄i jamana ma kento, dou ede d̄imatarima mori masapodakaina ro ma'ederahid̄i. 31#Mat. 20:16, Luk. 13:30 Pala mboto dou masarambakaina ndad̄i cumpukai ro mboto ma wakatu ake cumpukaina d̄imandad̄i ma sarambakaina.”
Ruma Isa nuntuna makatolu kalikaina mab̄oha made-Na
(Mat. 20:17-19, Luk. 18:31-34)
32Ruma Isa ro anamorid̄oho-Na wunga lampana lao aka Yerusalem. Ruma Isa lampa ulu, ro anamorid̄oho-Na nadarura mena. Ro dou-dou ma b̄atu siad̄oho ta kontu rau na'iuku dahu rau. Edempara Ruma Isa ou kalai walina anamorid̄oho-Na ro ngoana siad̄oho au ma ndad̄i pea d̄i sarumbu ndai-Na. 33”Ringa ra kade'epu,” nggahi-Na, ”ndai ake wunga lao aka Yerusalem. Ta aka Ana Manusia d̄i d̄onggo d̄i dou-dou mana'ekai imam ro guru-guru agama. Sia d̄ihukum made, wa'u b̄a ede Sia d̄id̄onggo d̄i dou-dou malaina Yahudi. 34Siad̄oho d̄imakasungge-sungge Sia, nakatufeku Sia, kancokina Sia, ro nasalibku Sia. Pala d̄i ainaina katolukaina Sia d̄imamori mbali.”
Raho b̄a la Yakub ro la Yahya
(Mat. 20:20-28)
35Edempara la Yakub ro la Yahya, eded̄u ana-ana la Zebedeus, mai rakana d̄i Ruma Isa. ”Pa Guru,” nggahi siad̄oho, ”wara sab̄ua lampa rawi d̄i ne'e b̄a madad̄oho d̄ikarawi b̄a Ita, d̄i ru'u b̄a madad̄oho.”
36”Auku ne'e nggomid̄oho d̄ikarawi wea b̄a Nahu?” sod̄i b̄a Ruma Isa.
37Cambe b̄a siad̄oho, ”Madad̄oho mane'e doho d̄i kompe wana ra ku'i Ita, madohosi Ita d̄i kadera Sangaji mad̄ese ra ntasa.”
38 #
Luk. 12:50
”Nggomid̄oho wati b̄ademu au raraho b̄a nggomid̄oho,” nggahi Ruma Isa d̄i siad̄oho, ”Sab̄ua masanggo nggomid̄oho nono rad̄i mo susa ra ncoki d̄i nono b̄a Nahu ro lu'u d̄i ade hid̄i susa ra ncoki d̄ilu'ukai b̄a Nahu?”
39”Io wa'u,” cambe b̄a siad̄oho.
Edempara Ruma Isa nggahi walina d̄i siad̄oho, ”Poda nggomid̄oho d̄imanono kai mo susa ra ncoki d̄i nono b̄a Nahu, ro lu'u d̄i hid̄i susa ra ncoki d̄ilu'ukai b̄a Nahu. 40Pala mab̄oha cou d̄imadoho d̄i kompe wana ra ku'i Nahu, ede laina Nahu ma katantuna, Ruma Hatalla ma katantuna cou-cou d̄imadoho d̄i hid̄i-hid̄i ede.”
41Wakatu sampuru dou anamori-Na ma kalai ede, ringana lampa rawi ede, siad̄oho mbanina d̄i la Yakub ro la Yahya. 42#Luk. 22:25-26 Ndad̄i Ruma Isa ouna siad̄oho sara'ana, edempara nggahi-Na, ”Nggomid̄oho mab̄adeku b̄a one dou-dou mana'ekai bangsa ma wati pata Ruma Hatalla nakasusaku ela ra douna. Ro dou-dou mana'ekai siad̄oho nakasusaku siad̄oho. 43#Mat. 23:11, Mrk. 9:35, Luk. 22:26 Pala nggomid̄oho wati loamu ndede! Pala dou ma ne'e ndad̄i na'e d̄i ade weki nggomid̄oho, sia napab̄uaku ndad̄ina makarawi wea au rad̄iparalu b̄a nggomid̄oho. 44Ro dou ma ne'e ndad̄i sarambakaina d̄i ade weki nggomid̄oho, pab̄uaku ndad̄ina ada d̄i ru'u sara'ana. 45B̄ara Ana Manusia rau maina wati d̄i kab̄ua b̄a dou, Sia maina ru'u d̄imakab̄ua dou ro d̄imad̄onggo nawa-Na ru'u hori kalosa dou mamboto.”
Ruma Isa katahona la Bartimeus ma mbuda
(Mat. 20:29-34, Luk. 18:35-43)
46Siad̄oho rongga d̄i Yerikho. Ro wakatu Ruma Isa lab̄o anamorid̄oho-Na ro dou mamboto tu'u wi'ina kota ede, sab̄ua dou mambuda mawunga doho ngende d̄i kengge ncai. Ngarana la Bartimeus, ana la Timeus. 47Wakatu ringa b̄a sia b̄a one ma wunga lampa sai ede eded̄u Ruma Isa dou Nazaret, kanggica sia, ”Isa Ana Daud! Kasi to'ikaipu ade-Mu d̄i mada!”
48Sia nggahikai b̄a dou mamboto ro kauna midi. Pala sia nanaha na'e kanggicana, ”Ana Daud, kasi to'ikaipu ade-Mu d̄i mada!”
49Edempara Ruma Isa midi lalona ro nggahina ”Oupu sia.”
Ndad̄i ou b̄a siad̄oho dou mambuda ede. Nggahi siad̄oho d̄i sia ”Midira! Nggomi ou b̄a Ruma Isa, tu'u!”
50Dou mambuda ede leo pakina jumbana, edempara roci kid̄ina lao rakana Ruma Isa.
51”Auku ne'emu d̄i karawi b̄a Nahu d̄i ru'umu?” sod̄i b̄a Ruma Isa d̄i sia.
Cambe b̄a dou mambuda ede, ”Pa Guru, mada kane'e eda.”
52”Laora,” nggahi Ruma Isa, ”b̄ara nggomi imbimu d̄i Nahu, nggomi mataho.”
Wakatu ede wa'u dou ede loana eda. Edempara sia b̄atuna Ruma Isa d̄i ncai.
Currently Selected:
MARKUS 10: LAIBHP
Highlight
Share
Copy
Want to have your highlights saved across all your devices? Sign up or sign in
@LAI 2001
