MARKUS 1

Hotoba la Yahya Mataki kandeu karaso dou

(Mat. 3:1-12, Luk. 3:1-18, Yah. 1:19-28)

1Akeku Haba Mataho mab̄oha Ruma Isa Al Masih, Ana Ruma Hatalla. 2#Mal. 3:1 Haba Mataho ede ratampu'una b̄une ratunti b̄a Nabi Yesaya b̄une ake,

” ’Akeku dou ranggadu b̄a Nahu,’ nggahi Ruma Hatalla;

’Nggadu b̄a Nahu sia ma'ulukai d̄i Nggomi,

loakud̄u sia mahenggana ncai d̄i ru'u-Mu.’

3 # Yes. 40:3 Wara dou manggao ncau aka so sarae,

’sadiapu ncai d̄i ru'u Ruma;

kapiripu ncai-ncai d̄ilampakai b̄a Sia.’ ”

4B̄une ratunti ede, b̄une ede rauku maina la Yahya aka so sarae. Sia kandeu karasona dou ro karonggana haba ma ramai ta Ruma Hatalla. ”Nggomid̄oho pab̄uapu toba rad̄i dosa-dosamu ro pab̄uaku d̄ikandeu karaso, loakud̄u Ruma Hatalla kangampuna nggomid̄oho,” ndedeku nggahi la Yahya. 5Samenana dou rad̄i dana ra rasa Yudea ro kota Yerusalem lao kade'ena nggahi ra eli la Yahya. Siad̄oho mangakuna dosa-dosa siad̄oho, ro la Yahya kandeu karasona siad̄oho d̄i Sori Yordan.

6 # 2Raj. 1:8 La Yahya kanina kani ra lombo randawi kai kere onta. Salepena randawi kai huri, ro ngaha ra nonona eded̄u kasanto ro oi ani wub̄a. 7Sia ngoa ra kahabana haba ake, ”Pea sawa'u b̄a nahu, d̄imamai dou ma ncewi na'e ntewi kaisi nahu. D̄ima'oko salo'a wea ai sapatu rau-Na, nahu wati patuna. 8Nahu kandeu karasoku nggomid̄oho kai oi, pala Sia d̄imakandeu karasona nggomid̄oho kai Roh Allah.”

La Yahya makandeu karaso Ruma Isa

(Mat. 3:13-17, Luk. 3:21-22)

9Aipu wakatu ede Ruma Isa ramaina rad̄i Nazaret d̄i dana ra rasa Galilea, ro la Yahya kandeu karasona Sia d̄i Sori Yordan. 10Ndede losa Ruma Isa ade sori ede, Sia edana langi mahengga weki, ro Roh Allah malondo b̄une nasi dara ese wawo Sia. 11#Kej. 22:2, Mzm. 2:7, Yes. 42:1, Mat. 3:17, 12:18, Mrk. 9:7, Luk. 3:22 Edempara wara ringa eli Ruma Hatalla manggahi, ”Nggomira Ana-Ku d̄imeci ra ca'u b̄a Nahu. Nggomi makasana wea ade-Ku.”

Ruma Isa coba b̄a Ibilis

(Mat. 4:1-11, Luk. 4:1-13)

12Sawa'u b̄a ede lalo Ruma Isa wa'a b̄a Roh Allah lao aka so sarae. 13Upampuru nai Sia warana ta ede, coba b̄a Ibilis. Binata-binata daro wara rau sama-sama lab̄o Sia ta ede, ro mala'eka-mala'eka kab̄ua weana Sia.

Ruma Isa ouna dou upana mamoti

(Mat. 4:12-22, Luk. 4:14-15, 5:1-11)

14Sawa'u b̄a rabui la Yahya, Ruma Isa laona aka Galilea, ro ngoa ra kahabana Haba Mataho ma ramai ta Ruma Hatalla ta aka. 15#Mat. 3:2 Nggahi-Na, ”Wakatu nawa'ura mai; Karaja'an Allah nawa'ura d̄eni. Tobara rad̄i dosa-dosamu, ro imbipu d̄i Haba Mataho ma ramai ta Ruma Hatalla!”

16Wakatu Ruma Isa lampana aka kengge Ndano Galilea, Sia edana d̄ua dou mamoti, eded̄u la Simon ro arina la Andreas. Siad̄oho wunga wa'una uta d̄i ndano ede kai ala. 17Nggahi Ruma Isa d̄i siad̄oho, ”B̄atupu Nahu. Nahu d̄imatei nggomid̄oho ala dou.” 18Siad̄oho tu'u wi'i lalona alana edempara lao b̄atuna Ruma Isa.

19Ruma Isa lampa walina, edempara eda rauna ma kalai d̄ua dou sa'e lab̄o arina, eded̄u Yakub ro la Yahya, ana-ana la Zebedus. Siad̄oho wara ade sampana, ro wunga katahona alana. 20Ou lalo b̄a Ruma Isa siad̄oho. Siad̄oho tu'u wi'ina amana d̄i ade sampa mawara sama-sama lab̄o dou-dou ragajina. Edempara siad̄oho lao b̄atuna Ruma Isa.

Dou ralu'ukai b̄a roh seta

(Luk. 4:31-37)

21Ruma Isa ro anamorid̄oho-Na ronggara d̄i kota Kapernaum. D̄i ainaina Sabat makentona, Ruma Isa lu'u d̄i ade uma sambeakai ro tampuna ngoa ra tei. 22#Mat. 7:28-29 Dou-dou ma ringa ra kade'e Sia d̄ihi adena kai cara ngoa ra tei b̄a Sia. B̄ara Sia ngoa ra teina kai wibawa, wati b̄une guru-guru agama.

23Aipu wakatu ede sab̄ua dou ralu'ukai b̄a roh seta lu'una d̄i ade uma sambeakai ro kanggicana, 24”Oe Isa, dou Nazaret, mane'e kab̄uneku b̄a Nggomi nami ake? Sab̄ua Nggomi maimu d̄imakaleli nami? Nahu kab̄ade cou Nggomi: Nggomira maraso ranggadu b̄a Ruma Hatalla!”

25”Midi!” fica b̄a Ruma Isa d̄i roh seta ede, ”losapu rad̄i dou ake!”

26Edempara roh seta ede wiri-wiri ka'ipina dou ede, edempara losana rad̄i dou ede ro kanggica salahona. 27Samenana dou nawancuku mbora akana, ndad̄ina siad̄oho nggahi mena d̄i ade weki ndaid̄ohona, ”Au ake? Sab̄ua ngoa ra tei ma b̄ou! Kai wibawa ro kai kuasa Sia parentana roh-roh seta losa, ro siad̄oho nato'aku d̄i Sia!”

28Edempara haba mab̄oha Ruma Isa roci mbouna d̄i sara'a dana ra rasa Galilea.

Ruma Isa katahona mboto dou

(Mat. 8:14-17, Luk. 4:38-41)

29Ruma Isa ro anamorid̄oho-Na tu'u wi'ina uma sambeakai ede, ro laona aka uma la Simon ro la Andreas. La Yakub ro la Yahya lao rauna lab̄o siad̄oho. 30Riana siwe la Simon wunga supu sari'ina d̄ihid̄i marukaina. Ndad̄i wakatu Ruma Isa ro anamorid̄oho-Na lu'u d̄i ade uma ede, Ruma Isa rangoa b̄a dou mab̄oha lampa rawi ede. 31Edempara Ruma Isa laona d̄i riana siwe la Simon, ro nentina rimana, edempara bantu katu'una sia. Mbora supu sari'ina, ro sia kab̄ua weana ngaha ra nono siad̄oho.

32Aimambia, sawa'u b̄a nci'i liro, mai wa'a b̄a dou-dou d̄i Ruma Isa sara'a dou ma supu ro ralu'ukai b̄a roh seta. 33Sara'a dou d̄i kota ede nakahumbu d̄i tando uma ede. 34Edempara Ruma Isa katahona dou-dou ma ncoki ra susa iu b̄ara mboto pahu supuna, ro b̄aka kalosa rauna mboto roh seta. Sia wati kauna roh-roh seta ede nuntu ra nggahi, b̄ara siad̄oho nab̄adeku cou Sia.

Ruma Isa hotobana d̄i Galilea

(Luk. 4:42-44)

35B̄ala aisanai, mbuipu aimasubu, Ruma Isa tu'una edempara tu'u wi'ina uma. Sia laona d̄i hid̄i ma lingi ari mai b̄a kota, ro sambeana ta aka. 36Pala la Simon ro lengad̄ohona lao ngupana Sia. 37Ro sawa'u b̄a siad̄oho raka edana Sia, nggahi siad̄oho, ”Sara'a dou wunga ngupana Ita.”

38Pala cambe b̄a Ruma Isa, ”Mai ndai talampa wali lao aka kota-kota makalaina d̄i kompe ra pei ake. Nahu pab̄uaku hotoba ta aka rau, b̄ara edeku aona Nahu maiku.”

39 # Mat. 4:23, 9:35 B̄ara ndedena Ruma Isa lao kalili rerona d̄i sara'a dana ra rasa Galilea, ro hotobana d̄i uma-uma sambeakai ro b̄aka kalosana roh-roh seta.

Ruma Isa katahona sab̄ua dou ma supu ncola

(Mat. 8:1-4, Luk. 5:12-16)

40Sab̄ua dou ma supu ncola maina d̄i Ruma Isa. Dou ede doho sujuna, ro nggahina, ”Nggara ngawasi Ita, Ita maloaku kataho mada.”

41Ruma Isa kasi adena d̄i dou ede. Ndad̄i, Sia d̄amana dou ede, ro nggahina, ”Nahu ngawa, tahora!” 42Wakatu ede lalo mbora supuna ro sia tahona. 43Edempara kau b̄a Ruma Isa lao sia kai ngoa ra kawara ake, 44#Im. 14:1-32 ”Aina nuntumu d̄i cou-cou rau, pala laopu aka imam, ro rahopu sia d̄imakapastina b̄a one nggomi wa'ura taho. Edempara d̄i ru'u taho supumu ede, d̄onggo ra mbeipu koroba b̄unera kaukai b̄a la Musa, d̄ibukutikaimu d̄i dou-dou b̄a one nggomi poda-poda wa'ura taho.”

45Pala dou ede laona, ro nuntu ra nggahi ncauna mab̄oha lampa rawi ede tab̄e-b̄e sampe Ruma Isa wati loana lu'u d̄i kota kai katada weki. Sia nangge'empa ari mai b̄a kota d̄i hid̄i-hid̄i malingi. Pala dou tab̄e-b̄e namai ncauku d̄i Sia.

Currently Selected:

MARKUS 1: LAIBHP

Highlight

Copy