MATIUS 28

Mori mbalina Ruma Isa

(Mrk. 16:1-10, Luk. 24:1-12, Yah. 20:1-10)

1Wakatu ainaina Sabat wa'ura kalalo, ainaina Minggu subu, la Maria Magdalena ro la Maria ma kalai lao tiona rade ede. 2Wed̄i lalompa mai epu ma na'e poda. Sab̄ua mala'eka Ruma ma ralondo aka saroga edempara kiruna wadu mab̄onto ede, ro dohona ese wawo wadu ede. 3Pahu mala'eka ede b̄une kakila ai, ro kani ra lombona mawancu lanta. 4Tentara majaga ta ede na'ipiku dahuna sampe siad̄oho b̄ib̄i, ro ndad̄i b̄une dou mamade.

5Nggahi mala'eka ede d̄i dou-dou siwe ede, ”Aina dahu! Nahu kab̄adeku nggomid̄oho mangupaku Ruma Isa rasalib ede. 6Sia watid̄u warana ta ake. Sia nawa'ura mori mbali b̄une rawa'u nggahi-Na ntoina. Mai tiopu hid̄i rakarukai Sia. 7Ake, lao rocira, ngoapu d̄i anamorid̄oho-Na, ’Sia nawa'ura mori mbali, ro ake nawa'ura lao ulu aka Galilea. Ta aka nggomid̄oho ma'edaku Sia!’ Kawarapu au rawa'u nggahi b̄a nahu d̄i nggomid̄oho.”

8Dou-dou siwe ede marociku tu'u wi'ina rade ede. Kai iu neo adena campo lab̄o dahu, siad̄oho rai lao ngoana lampa rawi ede d̄i anamori Ruma Isa.

9Wed̄i lalompa Ruma Isa mai rakana dou-dou siwe ede, ro nggahi-Na, ”Salam!” Edempara siad̄oho mai rakana Sia, edempara pohu weana ed̄i-Na ro nembana Sia. 10”Aina dahu!” nggahi Ruma Isa d̄i siad̄oho, ”Lao ngoapu cina ra angi Nahu loakud̄u siad̄oho laona aka Galilea; ta aka siad̄oho d̄i edakaina Nahu.”

Mai lapo b̄a tentara majaga

11Wunga lao dou-dou siwe ede, pila-pila dou tentara majaga rade ede lao mbalina aka kota, ro lapona d̄i dou-dou mana'ekai imam samenana ma wa'ura ndad̄i. 12Dou-dou mana'ekai imam ede mafakana lab̄o dou-dou mana'ekai Yahudi, edempara mbeina piti mamboto d̄i ru'u b̄a tentara majaga ede, 13ro nggahina, ”Nggomid̄oho pab̄uapu nggahi b̄a one anamori Ruma Isa mai mpangana timba Isa aimangad̄i wunga maru nggomid̄oho. 14Nggara ringasi b̄a gubernu lampa rawi ede, nami d̄imasiwina loakud̄u nggomid̄oho wati rakamu susa au-au.”

15Edempara tentara majaga ede wehana piti ede, ro karawina b̄une au rawa'u kaukai d̄i siad̄oho. B̄ara ndedena nggahi ra eli ede mbuipu warana d̄i ade woha dou Yahudi sampe ainaina ake.

Ruma Isa katadana weki d̄i anamorid̄oho-Na

(Mrk. 16:14-18, Luk. 24:36-49, Yah. 20:19-23, Kis. 1:6-8)

16 # Mat. 26:32, Mrk. 14:28 Sampuru sab̄ua anamori Ruma Isa ede, laona aka doro to'i d̄i Galilea b̄une raparentakai b̄a Ruma Isa d̄i siad̄oho. 17Wakatu eda b̄a siad̄oho Ruma Isa ta aka, siad̄oho suju nembana Sia. Pala wara d̄i ade weki siad̄oho ma mbali mbua ade. 18Ruma Isa mai d̄enina d̄i siad̄oho, ro nggahina, ”Samenana kuasa aka saroga ro ara dunia wa'ura d̄onggo d̄i Nahu. 19#Kis. 1:8 B̄ara ndedena laopu d̄i sara'a suku bangsa d̄i sara'a dunia, kandad̄ipu siad̄oho anamori-anamori Nahu. Kandeu karasopu siad̄oho kai ngara Ama, ro Ana, ro Roh Allah. 20Teipu siad̄oho loakud̄u b̄atu ra to'akaina d̄i samenana au rawa'u parentakai b̄a Nahu d̄i nggomid̄oho. Ro kawarapu Nahu d̄imad̄ende ra wa'a nggomid̄oho ncau sampe cumpukai dunia.”

Currently Selected:

MATIUS 28: LAIBHP

Highlight

Copy