MARKUS 11
11
Yesus usok doi Yerusalem tukon nggaangan
(Mat. 21:1-11; Luk. 19:28-40; Yoh. 12:12-19)
1Sambuno lolani ko Yerusalem, yanila polong doi kota Betfage tukon Betania, doi Zaitun Bunggulo eaako. Idoo lua komian Kona pololaing Yesus bintekene naloolukon. 2“Ampakono doi kampungoo nda sinasalaan,” Yesus bantile doi yanila. “Kalu komuyu usok doi kampungoo, komuyu naikon kitayo komeeng kokeledai napau modaano tokooton, mo akiyoon nabiasa komian molokitiyo. Sodiiyo do keledaidoo, tukon babayo doisumai. 3Tukon kalu daano komian momansadai doikoo oila kosababpo komuyu mosodiiyo do kaladaidoo, bontiikenemo, ‘Temeneno komo palaluuwo, tukon Yana mosobit naabalinggene.’ ”
4Yesus napololaing moluadoo ampakono, tukon laate komeeng do keledaidoo napau modaano tokooton doi bonua tataapono doi loloon bibilo. Maka yanila sodiiyo do keledaidoo. 5Domianoo mo kokondong idoo sadaiyo yanila, “He, bulaando komuyu? Bulaa kai komuyu mosodiiyo do keledaidoo napau?”
6Yanila timbiliyo bulaandomo komo lapamo Yesus tetebakene doi yanila. Maka do mianoo sodiikenemo yanila mobabayo do keledaidoo. 7Salataa polong doi Yesus, do keledaidoo bungguto yanila omobosiiyo tukon napai kalambi, maka Yesus lokitiyo doibunggono. 8Badaang komian moambasene yanila najubah doi loloon, daano koidan komo atambune doi loloon tangano kokayung panga-pangano yanila mo alayo doi asi. 9#Sad. 118:25-26 Ko mian-mian mo ampakon mantailukon tukon komian mo tuundu doi tonggulungo sasaibino wowookon, “Nggaale ko Mian Bisa! Binalakaati Yana mo lubat tukon Temeneno sambuno! 10Tubomo kona batomundoan naikon mo lubat – Daud nabatomundoan tumbunggita looluk! Nggaale ko Mian Bisa Mo Tatandak Tuuno!”
11Doibundu Yesus polong doi Yerusalem, maka usok doi Temeneno Na Bonua. Idoo Yana nunuiyo potikunggon. Bai sabab loolanimo Kona popookan, doibundu luwe ampakon doi Betania polaing-laing tukon songulo lua Kona pololaing.
Yesus kutuke koara batango
(Mat. 21:18-19)
12Modoakon kooloyono, sambuno yanila tinggale ko Betania, Yesus malaal. 13Daano modoon Yana kitayo komeeng koara batango koloono masalimbung. Jadi Yana ampakon doi kayungo sulano nakitayo kai daano kosaono. Bai sambuno Yana polong doi kayungo uuno Yana aki namalaat saono tongo loono, sabab doiya singgat akiyoon nalaate Kona saowan. 14Maka Yesus bantile doi aradoo batango, “Mulaimo diabudodoo akiyo komeeng komian mo makaan saono doikoo koikoidan!”
Yesus Napololaing-pololaing lengele dobuntilano.
Yesus usok doi Temeneno Nabonua
(Mat. 21:12-17; Luk. 19:45-48; Yoh. 2:13-22)
15Doibundu yanila polong doi Yerusalem, tukon Yesus ampakon koidan doi Temeneno Nabonua. Idoo Yana siikayo sasaibino komian mo poboluki doi lipudoo. Yana buanggeyo komeja-meja doi mian posoboli doy, tukon bangku-bangku mabalukanan tomisi lapatiing. 16Tukon akiyo komeeng komian mo pinataikon makanggi oilakai mololoiyo ko Temeneno Na Bonua kintalodoo. 17#Yes. 56:7; Yer. 7:11 Doibundu Yesus mongotunggul mian-mian idoo. Yana bantile, “Doi Kitab Moliyous lalomo totulis buno naiya: Mian Bisa bantile, ‘Daku bonua sinombuikon bonua sambeyangan sasaibino kobangsa.’ Bai komuyu tealikene mian napoakatean nadungolan!”
18Imam-imam kapalano tukon guru-guru agama lengele do bantilanoo. Maka yanila tambuun momoumbolii loloon sulano naakateo Yesus. Yanila matakut doi Yana, sabab sasaibino komian masainding momondongolii kona otunggul.
19Adukono kalipookan Yesus tukon Napololaing-pololaing otinggalemo do kotadoo.
Otunggul doi ara batango
(Mat. 21:20-22)
20Modoakon dodowasoono, salataa yanila alon doi aradoo batango, yanila kitayo do kayungo matemo polong doi anggol-anggolo. 21Maka Petrus neneeke dolobodoo moteali akiyoon nameeng kooloyo. Maka Petrus bantile doi Yesus, “Tama Guru, soba kitayo! Aradoo batango Tama mo kutuke matemo!”
22Yesus timbiliyo, “Anggayomo ko Mian Bisa. 23#Mat. 17:20; 1Kor. 13:2 Bisa komuyu moola pobantile doi bunggul nia, ‘Tobingkat tukon tasakukon doi tobun lalomo!’ Maka do langgedoo komuyu naikon kubaiyo; asal komuyu aki posasaaki, tukon komuyu anggayo baikon oila dopo binantiloo bisa-bisa teali. 24Tobikon doiya neneeke naiya: Kalu komuyu sambeyang tukon mangkabi meeng kolangge, anggayomo ko Mian Bisa molapamo beekene doi komuyu oila kopo kinabi, maka komuyu naikon talimayomo. 25#Mat. 6:14-15 Tukon kalu komuyu berdoa, bai konoamuyu aki nasanaang doi meeng komian, ompunio do mianoo looluk, sulano ko Tamamu doi surgaa naompunio kopo lalim-lalim. [ 26Kalu komuyu aki poompunio komian bailon, ko Tamamu doi surgaa koidan aki naompunio komu lalim-lalim.]”
Pasadai motuuk doi Yesus nahaak
(Mat. 21:23-27; Luk. 20:1-8)
27Yanila abali koidan doi Yerusalem. Tukon singgatoo Yesus ampakon boilingiyo ko Temeneno Na Bonua lalomo, imam-imam kapalano, guru-guru agama tukon tua-tua Yahudi lubat doi Yana. 28Yanila mansadai, “Oila kona pokok Ikoo molakukene sasaibino nia? Indee komo beena haak doi-Koo?”
29Yesus timbiliyo, “Yaku koidan yase mansadai doi komuyu. Potimbiliyomo tukon Yaku naikon bontiikene doikoo tukon indee nahaak Yaku mokubaiyo nalangge-langge nia. 30Yohanes mansau mian tukon indee nahaak, Mian Bisa kai banggapi?”
31Maka doimam-imam kapalanodoo tukon tua-tua Yahudi tambuun moposadai doi yaniladoo. Yanila bantile, “Kalu kita bantile, ‘Tukon Mian Bisa nahaak,’ Yana naikon bantile, ‘Bulaando komuyu moaki poanggayo doi Yohanes?’ 32Bai nda bantile koidan, ‘Tongo banggapi nahaak.’ ” Sabab yanila matakutene komian badaang, sabab sasaibino komian toiyo Yohanes meeng konabi. 33Jadi, yanila timbiliyo, “Kami aki mbai toiyo.”
Maka Yesus bantile doi yanila, “Kalu buno doiya, mau Yaku bai aki kuyase mobontiikon doikoo tukon indee nahaak Yaku mokubaiyo sasaibino nia.”
Currently Selected:
MARKUS 11: LAIBGZ
Highlight
Share
Copy
Want to have your highlights saved across all your devices? Sign up or sign in
