MARKUS 12

Andean polimang-polimang anggur asino

(Mat. 21:33-46; Luk. 20:9-19)

1 # Yes. 5:1-2 Doibundu Yesus tambuuno mobasilingan tukon andean doi imam-imam kapalano, guru-guru agama tukon tua-tua Yahudi. Yesus bantile, “Daano komeeng komian masakai meeng koanggul asino, maka pagare potikunggon. Lapa doiya yana makali buang teali alat mopiisan anggur, maka yana kekendenge komeeng kosandung batotoolian. Lapa doiya yana monggisabekene do angguroo asino doi bubula kopolimangoo maka ampakon doi lipu bailon. 2Salataa laate kotempono bapupuiyan anggur saono, do mianoo sumboliiyo komeeng kona peleleani doi polimang-polimang asidoo, sulano natalimayo kona obos. 3Bai do polimang-polimangoo lakoyo do peleleanidoo. Doibundu yanila bobokiiyo, maka sumboliiyo yana mule tukon akiyo kona kinanggi. 4Maka do asidoo tumbuno sumboliiyo koidan komeeng komian kona peleleani bailon. Bai do polimang-polimangoo bobokiiyo do peleleanidoo oluno, maka siikayo tukon totosiiyo. 5Do asidoo tumbuno sumboliiyo koidan komeeng kona peleleani bailon. Bai yanila akateyo do peleleanidoo. Tukon buno doiya momeenggon konapo lakukanano doi bubula kopeleleani bailon: daano komo binobokii tukon daano koidan komo inakate. 6Indee do asidoo tumbuno nasinumbolii koidan diabudodoo? Baimo meeng komian, doiyamo napau susuungo yana mo seange. Jadi doibundu yana sumboliiyo dona paudoo doi polimang-polimang asidoo. ‘Tantu daku pau naikon inodotii,’ kona pikikanano. 7Bai do polimang-polimangoo pobantikon meeng tukon bailon, ‘Naiyamo komo kuasaiyo. Mai nda akateyo yana, sulano kita nda malaat naobos!’ 8Maka do paudoo linako, maka inakate. Kobajano yanila sakukene doi asidoo tonggulungo.”

9Maka Yesus mansadai, “Oilamo do asidoo tumbuno nakinubai? Tantu yana lubat tukon akateyo do polimang-polimangoo, maka nasalakanggene do asidoo doi polimang-polimang bailon. 10#Sad. 118:22-23 Komuyu tantu lapamo pobacayo naiya ayat nia doi Kitab Moliyous lalomo,

‘Batu mo akimo natapake doi mobakubai bangunan

lapamo teali batu mo monondok.

11Naiyamo ko Temeneno nakokubai;

bukan maen kona monondokan!’ ”

12Maka kolaka-lakai Yahudi miano mo molongol do andeanoo, moumbolii akal molakoyo Yesus, sabab yanila toiyo do andeanoo Yesus konoikene doi yanila. Bai yanila matakutene komian mobadaang. Jadi, yanila ampakon tinggale Yesus.

Soal babealan lulu

(Mat. 22:15-22; Luk. 20:20-26)

13Bubula ko Parisi miano tukon anggota mololoiyo Herodes sinumbolii modinggalayo Yesus tukon pasadai-pasadai. 14Yanila lubat doi Yesus tukon bantile, “Tama Guru, kami toiyo Tama monondok tukon aki napopusinggon inde-inde komian napandapat. Tama mongotunggul tukon natutuuwan ko Mian Bisa namongiasan doi banggapi, sabab Tama aki nalilike komian. Eh, coba Tama bantile doi kami, ‘Mololoi peraturan nda agama, moola kai nda babeal lulu doi Tomundo kai aki? Siokai nda babeal do luludoo kai aki?’ ”

15Yesus toiyo yanila nakakaadukonan. Yana timbiliyo, “Oila kosababpo komuyu mo yase odinggalayo Yaku? Coba pokitakene doi Yaku komeeng kodoy perak.”

16Maka yanila beekene doi Yana komeeng kodoy perak. Maka Yesus mansadai, “Gambar tukon indee sambuno naiya?”

“Tomundo,” yanila timbiliyo.

17“Eh, kalu buno doiya,” Yesus bantile, “beekene doi Tomundo oila ko Tomundo koona, tukon doi Mian Bisa oila komo Mian Bisa koona.” Yanila masainding molengele Yana.

Soal tuboan luwedoi matean

(Mat. 22:23-33; Luk. 20:27-40)

18 # Kis. R. 23:8 Bubula komian doi Saduki tulano lubat doi Yesus. (Yanila daano tongusokon doi mo bapandapat mian momate akimo naikon natubo koidan.) 19#Kua. 25:5 “Tama Guru,” yanila bantile doi Yesus, “Musa tulise kona peraturan nia tuuk doi kita: ‘Kalu meeng komala-malane mate tukon akiyo kona pau, maka koutuso sio nakilayo dobalunodoo sulano nadaano kona katurunan doi mianoo mo lapamo mate.’ 20Daano kopitu komian montolutus. Kolanggongo osowaan, maka mate akiyo kona pau. 21Doibundu kokoluano osowaan tukon baluno, bai yana mate akiyo kona pau. Langgedoo mo pokakana teali koidan doi utuso kotoluno, 22tukon banggadudul polong doi kopituno. Doibundu do boinedoo susuungo mate koidan. 23Doibundu komian momate natuboan koidan, indee kai naboloki do boinedoo? Sabab domo pitu-pituiladoo lapamo pooala tukon yana!”

24Yesus timbiliyo, “Komuyu sala tuuno. Sabab komuyu aki pomangalatikene ko Kitab Moliyous mau ko Mian Bisa nakuasa. 25Sabab kalu naikon komian momate tubomo koidan, yanila akimo naosowaan koidan, bai yanila tubo pokakana komalaekat doi surgaa. 26#Tea. 3:6 Tukon tentang komian momate nainotuboiyan koidan, akiyoon baanggon komuyu pobacayo doi Musa nakitab lalomo tentang do mosolotoo mo mosua? Doi ayat-ayatoo lalomo totulis baikon ko Mian Bisa bantile doi Musa, ‘Yakumo Abraham na Mian Bisa, Ishak na Mian Bisa, tukon Yakub na Mian Bisa.’ 27Do Mian Bisadoo bolikon Mian Bisa mian momate. Yana Mian Bisa doi mian motubo. Komuyu salamo tuuno!”

Parenta mo tutuu

(Mat. 22:34-40; Luk. 10:25-28)

28 # Luk. 10:25-28 Maka lubat komeeng koguru agama mondongolii Yesus napobasalitaiyan tukon do mianoo motongusokon Saduki miano. Guru agamadoo kitayo Yesus lapamo timbiliyo do mianoo tukon monondok. Maka yana mansadai doi Yesus, “Parenta yaando komo penting doi sasaibino koparenta?”

29 # Kua. 6:4-5 Yesus timbiliyo, “Parenta tumbeno, doiyamo: ‘Polengele, eh bangsa Israel! Konda Temeneno Mian Bisa, Temenenodoo meeng. 30Seange kai konda Temeneno Mian Bisa tukon sasaibino konoamu, tukon sasaibino kobutomu tukon sasaibino komu pikiran tukon sasaibino komu bukuanan.’ 31#Basam. 19:18 Parenta koluano doiyamo: ‘Seseange kotulamu, buno ikoo seseange kobutomu susuumu.’ Akiyono koidan koparenta bailon mo lobian tuuno doi moluadoo koparenta.”

32 # Kua. 4:35 Maka do guru agamadoo bantile doi Yesus, “Kana tuuno, Tama Guru! Takainomo bisa Tama nabinantil: Ko Temeneno Mian Bisa mo momeeng, tukon akiyono koidan ko Mian Bisa bailon. 33#Hos. 6:6 Tukon kobanggapi sio naseseange ko Mian Bisa tukon sasaibino konoano, tukon sasaibino kona pikiran tukon sasaibino kona bukuanan. Tukon yanadoo sio naseseange kotulano, buno butongo susuungo. Doiya lobian kona monondokan doi mososubakonan sosubakon mosinua tukon sosubakon-sosubakon bailon doi Mian Bisa.”

34Yesus kitayo baikon do guru agamadoo lapamo timbiliyo tukon monondok tuuno. Tukon Yesus bantile doi yana, “Ikoo kabimo teali Mian Bisa namian.”

Lapa doiya akiyono komeeng komian mo barani koidan sumbetene kona pasadai doi Yesus.

Tomundo Pasalamat

(Mat. 22:41-46; Luk. 20:41-44)

35Daano mongotunggul doi Temeneno Na Bonua, Yesus mansadai, “Bulaando ko guru-guru agama moola bantile baikon do Tomundo Pasalamatoo Daud naturunan? 36#Sad. 110:1 Padahal Daud susuungo – sabab Mian Bisa Na Roh komo bontilio – bantilan,

‘Temeneno bantil doi ku Temeneno:

osulang doi bakalinga-Nggu taikon

sulano-Ku kubaiyo Komu musu-musu

sosuba doi-Koo.’

37Jadi kalu Daud mabantil do Tomundodoo Pasalamat ‘Temeneno’, bulaando kona tealian Yana mobaino Daud naturunan?”

Poingotii sulano bada-badagai doi guru-guru agama

(Mat. 23:1-36; Luk. 20:45-47)

Mianoo badaang mo daano doi Temeneno Na Bonua sanaang momondongolii Yesus momongotunggul. 38Yana bantile doi yanila, “Pobada-badagai doi guru-guru agama. Yanila yase papaakon tukon najubah mo bulusan tukon yase moinodotii doi labotan. 39Yanila yase moosulang doi osulangan mo inodotii doi bonua kaledaan lalomo tukon doi lamean-lamean. 40Yanila kokoliiyo kobalu-balu tukon alayo kona langge-langge doi nabonua. Tukon sulano napo tutupiyo do napo kulokisanoo, yanila sambeyang bulu-bulusan. Yanila babalat kona ukuman!”

Meeng kobalu nasosubakon

(Luk. 21:1-4)

41Sambuno osulang posalaanggon tukon dopetidoo sosubakon doi Temeneno Na Bonua, Yesus palatikanggene komian momongusokon doy doi petidoo lalomo. Badaang komian mokaasa momongusokon doy mobadaang; 42maka komeeng kobalu mo talalais lubat koidan. Yana mongusokon lua kodoy tambaga, doiyamo doy rimis mo soisik koanggano. 43Maka Yesus uange Kona pololaing-pololaing maka bantile doi yanila, “Popalaatikanggene naiya: Do baludoo mo talalais momongusokon doy doi petidoo lalomo lobiyoniio konabadaangan luwedoi miano bailon momongusakon doy mobadaang. 44Sabab yanila sasaibino mebee doi nabuat nalobianan. Bai do baludoo mau kai natodudulo kona talalaisan yana mebeekon komo daano doi yana – sabab doiyamo yana palaluu sulano natubo.”

Currently Selected:

MARKUS 12: LAIBGZ

Highlight

Copy