TEALIAN 42
42
Yusuf utus-utuso langgongo taus doi Mesir tuuk mongoli gandum
1Salataa Yakub lengele baikon daano kogandum doi Mesir, yana bantile doi napau-pau, “Bulaando kai komuyu motolongo basana-sanaang? 2#Kis. R. 7:12 Lapamo yaku lengele baikon daano kogandum doi Mesir; potauso dombalaa tukon pomongoli gandum sulano naaki nda mate laal.” 3Maka Yusuf utus-utuso langgongo songuloiladoo taus bangoli gandum doi Mesir. 4Bai Yakub aki napataikene Benyamin, Yusuf utuso pioto, taus polaing yanila, sabab yana matakut inai-inai nateali kosilakaan tukon napaudoo.
5Sabab malaalan doi tano Kanaan, Yakub napau-pau polaing badaang komian bailon lubat mongoli gandum doi Mesir. 6Komo mabalukon gandum doi posaapon kodunia doiyamo Yusuf, salaku gubernur doi Mesir. Tobikon doiya Yusuf utus-utuso langgongo lubat tukon sosuba doi salaano. 7Salataa Yusuf kitayo koutus-utuso langgongo, yana tingoniiyo yanila, bai yana kakaadukon aki natingoniiyo. Tukon kasar yana masadai doi yanila, “Komuyu indee komiano?”
“Kami Kanaan miano. Kami lubat tuuk bangoli kinaan,” yanila timbiliyo.
8Mau kai Yusuf natingoniiyo koutus-utuso langgongo, yanila aki natingoniiyo yana. 9#Tea. 37:5-10 Maka yana neneeke kona olumon kaliangano doi yanila. Tukon yana bantile, “Komuyu nia mata-mata; komuyu lubat solidikiyo inaando kona kalamahan komai lipu.”
10“Aki. Ikoo daku Tuan,” yanila timbiliyo. “Ikami, Tuan naata-ata lubat tolongo tuuk bangoli kinaan. 11Kami nia montolutus, ikoo daku Tuan. Kami nia mian monondok, bolikon mata-mata.” 12Yusuf bantile doi yanila, “Kakala! Komuyu lubat doi sumai tuuk solidikiyo inaando kona kalamahan natano nia.”
13Yanila timbiliyo, “Kami nia songulolua montolutus, ikoo daku Tuan, kami pau doi meeng kotama doi lipu Kanaan. Koutusonggami meeng matemo tukon kopioto diabudodoo daano doi tamanggami.”
14“Takainomo bisa buno kubantilan,” Yusuf timbiliyo, “komuyu nia mata-mata. 15Yaku yase ujio komuyu: Yaku batotopi tukon tomundo sambuno baikon komuyu aki naikon potinggale natano nia kalu koutusomuyu piotodoo aki nalubat doisumai. 16Meeng komian doi komuyu sio namule moleleiyo yana, kobailon naikon tinaan polong mubantilan tokita. Kalu aki, tukon tomundo sambuno, komuyu nia musuh namata-mata!” 17Doibundu yanila inusokon doi talunggu lalomo tolu kooloyo kona kalumbit.
18Doi oloyo kotaluno Yusuf bantile doi yanila, “Yaku mian momatakut tukon taat doi Mian Bisa. Komuyu naikon kusalamatene tukon meeng kosarat. 19Tuuk mookitakene baikon komuyu nia jujur, meeng komian doi komuyu naikon tinaan doi talunggu lalomo; kobailon moola mule tukon babayo kogandum komuyu mooliyo tuuk mukaluargaa modaano mandarita laal. 20Lapa doiya komuyu sio pobabayo koutusomuyu pioto doi yaku. Doiyamo kona bukti mubantilanoo bisa, tukon komuyu naikon aki kuhukume mate.”
Yanila satuju tukon gubernuroo nakaputusan. 21Maka yanila bantil meeng komian doi bailon, “Nah, kita diabudodoo inukum tolongo nda kasalahan doi utusonggita pioto lolukoo; yana makabi tulung bai kita aki nda paduliyo, mau kita kitayo baikon yana mandaritamo tuuno. Doiyamo kosababpo kita diabudodoo toupiyo nasakisaawan nia.”
22 #
Tea. 37:21-22
Ruben bantile, “Bolikon kai looluk lapamo yaku bantile doi komuyu sulano dopaudoo inai nabinulaandokon. Bai komuyu aki poiyase ndongoliiyo. Tukon diabudodoo kona matean sinobolikon doi kita.” 23Yusuf mangalatikene yanila nasilingan, bai yanila aki natoiyo dolanggedoo, sabab yanila basilingan tukon Yusuf tukon meeng komian parantaraan juru baasa. 24Yusuf tinggale yanila, maka kokiil. Salataa lapa moola bantil-bantil koidan, yana abali doi yanila, maka alayo Simeon, tukon monggiboboikene yana doi sasaibino koutuso salaano.
Yusuf utus-utuso langgongo abali doi Kanaan
25Yusuf maparentakene sulano karung-karung utus-utuso langgongo mobabayo natinotui tukon gandum, tukon yanila nadoy suwe-suwele inusokon doi karung-karungoo lalomo. Koidan sulano yanila binee kinaan tuuk namumuda doi loloon. Kona parentadoo linimang. 26Lapa doiya utus-utuso langgongo Yusuf muwotiiyo yanila nakeledai tukon gandum molapamo yanila oliyo, maka yanila luwemo idoo. 27Doi tampat yanila nabamoolokonan, meeng komian doi yanila bukayo kona gandum karungo sulano nabeena kaan kona keledai. Yana pososuunggenemo kona doy doi gandumoo bunggono. 28“Daku doy inabalinggon,” kona bantilano doi utus-utusodoo. “Kitayo, daano doi karung lalomo!” Yanila noano teali matakut, tukon yanila namatakutan yanila posadaimo, “Oila ko Mian Bisa nailakukon doi kita?”
29Tempo polong doi Kanaan, yanila salitaikene doi yanila tamano sasaibino kolobo molapamo yanila toupiyo. Yanila bantile, 30“Gubernur Mesir basilingan tukon kasar doi kami tukon laite kami mata-mataiyo kona lipu. 31Kami timbiliyo, ‘Kami mian monondok, bolikon mata-mata, kami mian mojujur. 32Kami sasaibino songulolua montolutus, pau luwe meeng kotama, tukon komeeng matemo, tolongo pioto daano podungoli tukon tamano doi Kanaan.’ 33Gubernuroo bantile, ‘Yaku yase ujiyo komuyu sulano potoiyo oila kai komuyu mian mojujur: Meeng komian doi komuyu, sio nadungol kobailon moola namule babayo kogandum doi mukaluargaa modaano mandarita malaal. 34Lapa komuyu abali babayomo utusomuyu pioto, yaku naikon toiyo baikon komuyu bolikon mata-mata, bai mian mojujur. Maka koutusomu yaku motaanedoo naikon yaku abalinggene doi koo tukon komuyu moola dungol doi lipu nia tukon bebas badagang.’ ”
35Doibundu, doi tempo yanila kaluale kona karung-karung antoko, yanila pososuunggene kona dombet suwe-suwele motinotui doy; maka yanila matakuto tuuno, koidan yanila tamano. 36Maka tamanoila bantile, “Komuyu kubaiyo yaku lapus sasaibino daku pau. Yusuf akiyono; Simeon akiyono koidan; tukon diabudodoo komuyu naikon alayo Benyamin koidan. Todudulo daku pandaritaan!”
37Maka Ruben bantile doi tamano, “Salakanggene Benyamin doi yaku, Tama; totiiliyo naikon yaku babayo abali, kalu aki, Tama moola muakateo lua daku pau malaneno.”
38Bai Yakub bantile, “Aki! Benyamin aki namoola komuyu tobiyo; utuso langgongo matemo tukon nia baino yana modaano dungol. Inai-inai yana namalaat silaka doi naampakonanoo. Yaku nia motuamo, tukon kosusaan komuyu naikon molubatene doi yakudoo koakibato yaku mate.”
Currently Selected:
TEALIAN 42: LAIBGZ
Highlight
Share
Copy
Want to have your highlights saved across all your devices? Sign up or sign in
