TEALIAN 41

Yusuf talakanggene koalatino tomundo Mesir naolumon-olumon

1Salataa toliis lua kotaun, tomundo Mesir olumon, baikon yana daano mokokondong doi Nil Paisunobatango, bibilo. 2Sosinggot pitu kosaapi momalanak tukon motontilang kokulito tobuat doi paisudoo maka tambuun makaan bulung doi paisu batangodoo bibilo. 3Doibundu pitu kosapi bailon molubat koidan; iyayon-iyayonoo molisuk tukon baino kulito komo bungusiyo kobukuno. Sapi-sapi momolisukidoo kokondong doi sapi-sapi momalanakoo lisuko, doi paisu batangodoo bibilo. 4Doibundu saapi-saapi momolisuk kaane kosaapi-saapi momalanak. Lapa doiya tomundo bangun doi namooloan. 5Doibundu yana moolo tukon olumon koidan. Naolumon lalomo yana kitayo pitu kobatuno kogandum moano koantoko tukon meo-meoo tubo doi langaano meeng. 6Doibundu tubo koidan pitu kogandum batuno bailon, momoli-molisuk tukon mokukut sabab mbombuul lipu. 7Maka dogandumoo batuno momayot lemese domo pitudoo kobatuno moano koantoko. Lapa doiya tomundo bangun tukon toiyo baikon yana lapamo olumon. 8#Dan. 2:2 Dowa-dowasoono tomundo aki nasanaang, tobikon doiya yana sumboliiyo nainuang sasaibino komian motoiyo kopotoi tukon mian moano kona ilmu doi Mesir. Maka yana salitaikene kona olumon doi yanila, bai akiyo komeeng momoola talakanggene koalatino.

9Doibundu mouluse komo ininum bantile doi tomundo, “Oloyo nia yaku sio kuakuiyo daku kasalahan. 10Loluk Tomundo nggimoliiyo komo uluse koroti tukon yaku, maka kami inusokon doi talunggu lalomo, doi kapala pototooli kamali nabonua. 11Daano kopopokee kami lua kami olumon, tukon komai olumon aki napokakana koalatino. 12Meeng komian pamuda Ibrani daano imbali tukon kami. Yana peleleani kapala pototooli kamalidoo. Ikami salitayo komai olumon doi yana, maka yana talakanggene koalatino olumonoo. 13Tokita sasaibino bisa buno nabantilano, doiyamo: Tomundo abalinggene yaku doi kubalimangan tumbeno, bai domo ulusedoo koroti inukum mate.”

14Maka tomundo monggiuanggene Yusuf, tukon mosobit yana tinobuaton doi talunggu. Salataa lapa Yusuf bagunting tukon basoboli pakean, yana mangadapo doi tomundo. 15Tomundo bantile doi yana, “Yaku lapamo olumon, tukon akiyo komeeng komian momoola talakanggene koalatino. Daano komo popitoikene doi yaku baikon ikoo moola mutalakanggene koolumon.”

16Yusuf timbiliyo, “Bolikon yaku, bai Mian Bisa naikon komo beena katalangan mobisa.”

17Maka tomundo bantile, “Yaku olumon baikon yaku daano mokokondong doi Nil Paisunobatango bibilo. 18Maka tobuato doi paisudoo batango pitu kosaapi momala-malanak tukon kokulito motontilang, maka tambuuno momakaan bulung doi paisudoo bibilo. 19Doibundu tobuat koidan pitu kosaapi bailon, momoli-molisuk tukon baino kulit komo bunguse kobuku. Akiyoon naidan yaku mokita saapi mobunodoiya kona kulokisan posaapon doi Mesir. 20Sapi-sapi momolisukidoo kaane kabus dosapidoo pitu momalanak. 21Bai lapa doiya sapi-sapi momolisukoo tataap molisuk. Maka yaku bangun doi kumooloan. 22Doibundu yaku moolo tukon olumon koidan, baikon yaku kitayo pitu kogandum batuno moano koantoko tukon meo-meoo, tubo doi meeng kolangaano. 23Maka tubo koidan pitu kogandum batuno momayot-mayot tukon mokukut sabab mbombuul lipu. 24Gandum batuno momayotoo lemese domo anodoo koantoko. Lapamo yaku salitaikene lua daku olumonoo doi motoiyo kopotoi, bai akiyo komeeng komian momoola talakanggene koalatino.”

25Maka Yusuf bantile doi tomundo, “Lua doolumonoo pokakana koalatino; Mian Bisa lapamo bontiikene doi ku Tuan oila naikon kona linakukon. 26Pitu kosaapi momalako doiyamo pitu kotaun, tukon pitu kogandum batuno moano koantoko doiyamo pitu kotaun kai; luadoo pokakana koalatino. 27Pitu kosaapi molisuk, motokita doi bundu, tukon pitu kogandum batuno momayot tukon mokukut sabab mbombuul lipu doiyamo tempo malaalan pitu kotaun kona kalumbit. 28Bunomo lakon yaku lapamo bantile doi ku Tuan, Mian Bisa lapamo okitakene doi ku Tuan oila naikon kona linakukon. 29Mototiili naikon lubat pitu kotaun tempo namakmuran sasaibino kolipu Mesir. 30-31Lapa doiya naikon lubat pitu kotaun malaalan, tukon tempo namakmuranoo naikon tinoliminggon tuuno, sabab tempo malaalanoo naikon hebat tuuno tobikon lipu nia teali motuul. 32Ku Tuan naolumon teali lua luunggon doiya koalatino baikon langgedoo lapamo Mian Bisa tataapkanggene tukon baikon Mian Bisa naikon kubaiyo tukon mosobit.

33Tobikon doiya kona monondokan ku Tuan piliyo meeng komian mopandoi tukon mamangan kona pikilan tukon beena kuasa sulano naatule natano nia. 34-35Ku Tuan sio koidan mongoduduk pagauwe-pagauwe bailon tukon beena yanila kuasa sulano namangala meeng koobos doi lima koobos sasaibino kobapupuiyan gandum pitu kotaun doi tempo namakmuranoo, maka atambune doi kota-kota tukon dagaiyo. 36Gandumoo naikon teali palasadiaan kinaan pitu kotaun tempo malaalan naikon molubat doi Mesir. Tukon buno doiya rayat aki namate laal.”

Yusuf inoduduk teali gubernur doi Mesir

37Tomundo tukon napagawai satujuiyo Yusuf nateteloo. 38Maka tomundo bantile doi yanila, “Aki nateali kita malaat mian bailon molobian pokakana Yusuf, sabab yana Mian Bisa naroh komo pimpine.” 39Maka tomundo bantile doi Yusuf, “Mian Bisa lapamo bontiikene doi koo sasaibino nia, jadi tokitamo baikon ikoo lobian pandoi tukon mamangan komu pikilan moluwe doi indee komiano koidan. 40#Kis. R. 7:10 Ikoo naikon yaku oduduke teali gubernur, tukon sasaibino daku rayat naikon tulutiyo komu parenta. Tolongo yaku komo lobian balakuasa doi koo.” 41-42#Dan. 5:29 Lapa doiya tomundo liate kona sousolut doi limano saono mobinotik saap batomundoan, maka usokikene doi Yusuf limano saono tukon bantile, “Tukon naiya yaku oduduke ikoo teali gubernur doi posaapon ko Mesir.” Doibundu yana konoikene doi Yusuf meeng juba lenan momuyuk tukon inusokikon doi bulungo meeng koinoon mosoni. 43Maka bineekon doi Yusuf kokereta batomundoan koluano tuuk nalakitan, tukon padagai tomundo natongodotiiyas ampakon doi keretadoo salaano tukon nggeleamon, “Awas! Beena loloon! Beena loloon!” Bunomo lakon doiya Yusuf teali gubernur posaapon ko Mesir. 44Tomundo bantile doi yana, “Yakumo ko Tomundo – tukon yaku pelenggene baikon kalu akiyo komu palamisi akiyo komeeng komian doi posaapon nai Mesir nia momoola lakukene oioila.” 45-46Maka tomundo beena meeng kosambu Mesir doi Yusuf, doiyamo Zafnat-Paaneah. Binee koidan meeng koboloki kosambuno Asnat, Potifera napau motaaniyo koimam doi kota Heliopolis.

Yusuf kona umur tolu kolono kotaun salataa yana atambuune mobalimang tuuk tomundo Mesir. Maka Yusuf luwedoi kamali batomundoan tukon taus boilingiyo sasaibino dolipudoo. 47Pitu kotaun lalamo molobian makmuloo kobuta nahasil bapupuiyan lobi-lobian. 48Gandumoo Yusuf pototongikene maka yana abese doi kota-kota. Doi memeeng kokota lalomo yana mangabos gandum asi-asidoo hasilo doi kotadoo. 49Gandum mopinototongikonoo badaang tuuno tobikon Yusuf tade mobaukul, sabab kona kadaang bunomo bone doi tobun bibilo. 50Akiyoon kotempo malaalanoo nalubat, Asnat Yusuf naboloki mosuung lua kopau malaneno. 51Yusuf bantile, “Mian Bisa lapamo kubaiyo yaku toliminggene doi sasaibino daku sakisaawan tukon doi tamanggu nakaluargaa.” Tobikon doiya yana sombuikene kona pau tumbeno “Manasye”. 52Yana bantile koidan, “Mian Bisa lapamo beena doi yaku pau-pau tempo kusakisaawan lalomo,” maka yana sombuikene kona pau koluano “Efraim”.

53Pitu kotaun tempo namakmuran molapamo tinoupi lipu Mesiroo laatemo kona pupusan. 54#Kis. R. 7:11 Maka lubat pitu kotaun tempo malaalan bisa buno molapamo Yusuf bantile. Doi posaapon kodunia teali komalaalan, bai posaapon ko Mesir daano kopalasadiaan kinaan. 55#Yoh. 2:5 Salataa rayat doi Mesir tambuuno mandarita laal, yanila makabi kinaan doi tomundo. Maka tomundo sumboliiyo yanila taus doi Yusuf tukon loingiyo sasaibino oila naikon Yusuf napinarentahkon doi yanila. 56Salataa malaalanoo teali pololokon kulokis tukon kanakono sasaibino kolipu, Yusuf bukayomo sasaibino kogudang tukon mabalukon gandum doi Mesir miano. 57Luwe posaapon kodunia mian badaang lubat doi Mesir tuuk mongoli gandum doi Yusuf, sabab malaalanoo bisakai mominatakuton doi yayaa.

Currently Selected:

TEALIAN 41: LAIBGZ

Highlight

Copy