TEALIAN 31
31
Yakub dambasene kobutongo luwedoi Laban
1Yakub ndongoliiyo Laban napau-pau bantile buno naiya, “Yakub lapamo alayo sasaibino kotamanggita nabuat. Sasaibino kona kaasaan luwedoi tamanggita nabuat.” 2Yakub kitayo koidan baikon Laban akimo kai napokokonoi buno looluk doi yana. 3Maka Temeneno bantile doi Yakub, “Abalimo doi tamamu natano tukon doi mumotolutusan. Yaku naikon lindungiyo ikoo.”
4Lapa doiya Yakub mosumbolii mian mopopitoikene doi Rahel tukon Lea sulano napososuung tukon yana doi padang, doi tampat nambembe domba tambuno. 5Maka Yakub bantile doi yanile, “Yaku kitayo baikon tamamuyu akimo napokokonoi buno mobiasa doi yaku; bai Mian Bisa tamanggu nangginaal lindungiyo yaku. 6Lua komuyu toiyo kai baikon yaku lapamo balimang doi tamamu yaku kai kakabukuano. 7Mau nabuno doiya yana lapamo akakanaku tukon boliiyo daku tambo polong songulo luunggon. Bai Mian Bisa aki nabatadikene yana mokubai lokis doi yaku. 8Doi tempo tamamu bantile, ‘Mbembe mobatitik-titik naikon teali mutambo,’ maka sasaibino kotambuno mosuung pau mobatitik-titik. Doi tempo yana bantile, ‘Mbembe mokambang naikon teali mutambo,’ maka sasaibino kotambunodoo mosuung pau mokambang. 9Bunomo lakon ko Mian Bisa lapamo mangala iyayon tambuno tamamu koona maka nabeekene doi yaku.
10Tukon doi tempo doiyayon-iyayonoo napoubaiyan, yaku olumon kitayo sasaibino kombembe langgilo modaano poubai, botiki manampal, boti-botiki tukon kambang. 11Tukon ko Mian Bisa batambonggon malaekat basilingan tukon yaku doi olumonoo lalomo, Yana bantile, ‘Yakub!’ Yaku koidan timbiliyo, ‘Oode’. 12Malaekatoo bantile koidan, ‘Kitayo sasaibino kombembe langgilo modaano poubaidoo botiki manampal, tukon batitik-titik tukon kambang. Yaku sangaja atule doiya doikoo sabab lapamo Kukitayo sasaibino Laban nailakukon doikoo. 13#Tea. 28:18-22 Yakumo ko Mian Bisa molapamo okitakene kobutongo doi koo doi Betel. Imbali ikoo lapamo sosubakene meeng kobatu moinonook, tukon kundongiiyo zaitun lisisono doi bunggono. Imbali koidan ikoo batotopi doi Yaku. Dia budodoo basadiamo tukon abalimo doi mutano sinuungan.’ ”
14Maka Lea tukon Rahel motimbili, “Akiyono koobos koidan luwedoi tamanggami nakaasaan naikon kami mohaakiyo. 15Kami nia yana anggene buno mian lubat. Yana lapamo balukene kami tukon oila komo lapamo yana talimayo tuuk doiya, lapamo yana akabuse koidan. 16Sasaibino kaasaan molapamo Mian Bisa alayo luwedoi tamanggami kona bisaan kami kotumbuno tukon komai pau-pau kotumbuno. Lakukenemo oila ko Mian Bisa napinarentahkon doi koo.”
17-18Maka Yakub bato-batotobomo momule doi tamano natano doi Kanaan. Yana alakite konabolo-boloki tukon napau-pau doi unta bunggono, tukon babayo sasaibino kona mbembe, domba tambuno tukon sasaibino oila komo lapamo linaat doi Mesopotamia. 19Doiya kotempono Laban daano doi padang moguntinge kona domba-domba bullono, tukon doi tempodoo Rahel ndukuke kotamano natimbalang molindungiyo yanila solipuan. 20Yakub okoliiyo Laban tukon aki napopitoikene kona luwean. 21Yana alayo sasaibino kona buat tukon mosoisobit taus. Yana pintosiiyo ko Efrat Paisunobatango maka kona tujuiyo doi lipu Gilead bunggulo.
Laban lelenggene Yakub
22Tolumo kooloyo doi bundu Laban binontiikon baikon Yakub dambaso. 23Maka Laban pototongikene kona mian badaang tukon polaing-laing yanila lelenggene Yakub pitu kooloyo kona kalumbit polong doi lipu Gilead bunggulo. 24Doi napopookan Mian Bisa lubat doi Laban doi naolumon lalomo tukon bantile, “Awas, inai kai molobosiyo Yakub tukon meeng kobantilan patolo.” 25Doi tempodoo Yakub lapamo kekendenge kona sandung doi meeng kobunggul. Doibundu doi meeng kobunggul bailon doi lipudoo koidan Laban tukon namian badaang kekendengemo kona sandung.
26Lapa doiya Laban bantile doi Yakub, “Bulaando ikoo mookoliiyo yaku tukon babayo dampas daku pau-pau, bunomo kai yanila tawanan papalangan? 27Bulaando ikoo mookoliiyo yaku tukon taus aki nabiok-biok aki napopitoi? Kalu ikoo popitoi tantu yaku sobiyo ikoo taus tukon sanaang linolaing tukon musik rebana tukon kasapi! 28Ikoo tukon aki mubeena yaku todanan sulano kuumayo daku pau tumbu salaku poalaasan. Longas tuuno komu tindakan! 29Yaku sukup bukuan tuuk mokubai lokis doi koo, bai kolubongi Mian Bisa tamamu nangginaal ingotiikenemo yaku sulano inai kunggimoliiyo ikoo. 30Yaku toiyo baikon ikoo luwe sabab yase tuuno mule. Bai bulaando ikoo mondikuke kotimbalang molindungiyo kami solipuan?”
31Maka Yakub timbiliyo, “Yaku taus tukon aki nabiok-biok sabab matakutene Pinatama naikon tahane Pinatama napau-pau. 32Kaliangano dotimbalangoo, kalu Pinatama pososuunggene meeng komian naimbaa molapamo ndikuke, yana naikon inukum mate. Palesayomo, baanggokai daano Pinatama nabarang-barang naimbaa. Kalu daano, alayomo. Tukon konda mian badaang sakisiidoo.” Yakub aki natoiyo baikon Rahel komo ndikuke dotimbalangoo.
33Maka Laban taus doi Yakub nasandung tukon palesayomo; lapa doiya yana doi Lea nasandung tukon naata lua moluko nasandung, bai dotimbalangoo aki napososuunggene. Doibundu yana usok doi Rahel nasandung lalomo. 34Daano bunodoya Rahel lapamo alayo timbalangoo tukon usekene doi unta poombosiino posikano, tukon yana susuungo osulang doi poombosiidoo bunggono. Laban palesayo sasaibino Rahel nasandung, bai aki napososuunggene timbalangoo. 35Maka Rahel bantile doi tamano, “Tama inai monggimal, yaku aki namoola kokondong mosambute Tama, sabab yaku daano bolokon.” Laban unggoliiyo tukon tutuuno, bai aki napososuunggene timbalangoo.
36Maka nggimalo Yakub, “Oila komo kulokis yaku molapamo lakukene?” yana nggimal masadai. “Oila daku sala tobikon Pinatama lelenggene yaku? 37Diabudodoo, sala lapa palesayo sasaibino daku balang, oila kai Pinatama mopososuunggon balang Pinatama koona? Tobuatenemo dobalangoo tukon abese dimbaa, sulano daku mian badaang tukon Pinatama namian badaang namonggita tukon naputusiyo indee doi antara kita komo bisa. 38Lua kolono kotaun yaku lapamo dungol doi Pinatama. Pinatama lapamo balahasil tuboimo badaang kodomba tukon mbembe tambuno, tukon akiyon naidan yaku makaan meeng kombembe luwedoi Pinatama naiyayon. 39Komo mate sinoku iyayon mobarani aki naidan yaku babayo doi Pinatama, bai yaku susuunggu komo soboliyo. Moindikuk doi tempo oloyo mau popook sidutu Pinatama tuntute sulano yaku komo soboliyo. 40Idan-idan tempo oloyo yaku pintolon tukon tempo popook yaku kumelon. Tukon idan-idan yaku aki kuteali moolo. 41Bunomo doiya daku ndondoong salataa balimang doi Pinatama lua kolono kotaun moono. Songulo sangkap kotaun kona kalumbit yaku balimang sulano kulaate Pinatama napau luadoo – tukon nom kotaun koidan sulano malaat mbembe domba tambunodoo. Tukon namalumbitanoo Pinatama boliiyo kopatambono yaku polong songulo luunggon. 42Kalu kai daku mbumbu na Mian Bisa aki nalindungiyaku, doiyamo Abraham na Mian Bisa ngginaal tukon Ishak, maka Pinatama tantu lapamo sumboliiyo yaku taus tukon akiyo daku kinanggi. Bai Mian Bisa lapamo tingoniiyo daku kasusahan tukon limang molapamo yaku lakukene, tukon kolubongi Yana lapamo beekene kona kaputusan.”
Perjanjian antara Yakub tukon Laban
43Maka Laban timbiliyo Yakub, “Boine luailadoo kupau; yanila napau daanon koongguna, tukon domba tambuno koonggunamo. Kona tutuuan, sasaibino kolobo ikoo mokitayo dimbaa yakumo kotumbuno. Bai yaku aki namoola kubaiyo oioila tuuk palataanggene daku pau tumbu. 44Tobikon doiya maimo nda mokubai perjanjian tukon mosusun batu-batu salaku paloosan doi perjanjianoo.”
45Doibundu Yakub mangala meeng kobatu tukon yana kekendenge teali batu moinonook. 46Maka yana sumboliiyo kona mian badaang mangatambun batu-batu tukon mokubai mangatambunan batu. Lapa doiyanila polaing kaan lolani dobatudoo nainatambunan. 47Laban sombuikene domangatambunanoo batu Yegal-Sahaduta, bai Yakub sombuikene Galed. 48Laban bantile doi Yakub, “Mangatambunan batu nia naikon teali tondoon lua kita.” Doiyamo kosababpo lipudoo sinombuikon Galed. 49Laban bantile koidan, “Boliisi ko Temeneno nadagaiyo kita mau ndatubo podoonggon.” Tobikon doiya lipudoo sinombuikon koidan Mizpa. 50Laban bantile koidan, “Kalu ikoo mokubai lokis doi kupau-pau, kabai mokila boi-boine bailon mau naakiyo komo toiyo, neneekemo Mian Bisa awasiyo kita. 51Naiyamo batu-batudoo molapamo yaku atambune, tukon naiya batu tondoon. 52Mau natimbunan nia, mau kai batu tondoonoo moingotikene kita baikon yaku aki namoola lupaiyo natimbunan nia tuuk molobosiyo ikoo, tukon ikoo kai aki namoola lupaiyo natimbunan nia, tukon batu moinonook nia tuuk molobosiyo yaku. 53Abraham na Mian Bisa ngginaal, tukon tamanggu Nahor nangginaal naikon teali hakim antara kita.” Maka Yakub batotopi kosakisii Ishak na Mian Bisa sinosubai, tamano, sulano natapaatiyo kona perjanjian. 54Yana kelete kona iyayon meeng tukon sosubakene doi bunggulo bunggono. Maka yana koloyo kona mian badaang sulano nakaan pososinggat. Lapamo kaan, yanila moolomo doi bunggulo. 55Modoakon kooloyono dowa-dowa soono, Laban beena ponguma poalaasan doi napau natumbu, balakaatiyo yanila, maka mulemo doi nalipu dungolan.
Currently Selected:
TEALIAN 31: LAIBGZ
Highlight
Share
Copy
Want to have your highlights saved across all your devices? Sign up or sign in
