TEALIAN 30
30
1Bai Rahel akiyon koidan namalaat pau. Tobikon doiya yana teali mesikitene koutuso langgongo, maka bantile doi Yakub, “Beenamo pau doi yaku, kalu aki, yaku naikon mate.”
2Yakub nggimoliiyo Rahel tukon bantile, “Yaku nia bolikon Mian Bisa. Yanamo komo kubaiyo ikoo aki namalaat pau.”
3Maka Rahel bantile, “Naiya kuata Bilha; pokoloimo tukon yana sulano yana mosuung. Tukon buno doiya yaku moola nateali tinano lolo yana.” 4Maka yana beekenemo Bilha doi nalangkai, tukon Yakub pokoloi doatadoo. 5Bilha tianan maka suunge meeng kopau malaneno. 6Rahel bantile, “Mian Bisa lapamo adiliyo tuuk kukopontingan. Yana lengele daku sambeang tukon yana beena meeng kopau malaneno doi yaku.” Maka yana sombuikene dopaudoo Dan. 7Bilha tianan koidan tukon suunge meeng kopau malaneno. 8Rahel bantile, “Yaku lapamo kakaate tutuuno lawane koutusonggu langgongo, maka yaku manaang,” tobikon doiya paudoo sinombuikon Naftali. 9Salataa Lea sadariyo baikon yana aki namoola malaat pau koidan, yana beekene kona ata, doiyamo Zilpa, doi Yakub sulano nateali boloki. 10Zilpa mosuung meeng kopau malaneno. 11Lea bantile, “Yaku untung,” maka paudoo sinombuikon Gad. 12Zilpa mosuung koidan meeng kopau malaneno, 13tukon Lea bantile, “Bukamaen kona monondokan yaku! Dia budodoo sasaibino koboine naikon bantile yaku monondok.” Tobikon doiya yana sombuikene dopaudoo Asyer.
14Doi tempo bapupuiyan gandum, Ruben taus doi padang tukon pososuunggene imbali meeng kopakuli kaliangano mosinakkanggon, maka babakenemo doi Lea, tinano. Rahel bantile doi Lea, “Beenamo soisik doi yaku pakuli mosinakakon domu pau napinososuunggonoo.”
15Lea timbiliyo, “Akiyoon nasukup ikoo moalayo daku langkai? Dia budodoo ikoo sobayo koidan mangala pakuli sinakakon kupau napinososuunggon.”
Rahel bantile, “Kalu ikoo yase beekene mupau napakuli doi yaku, ikoo moolamo moolo tukon Yakub popookia.”
16Salataa Yakub mule doi nabonua luwedoi padang dokinobianoo, Lea talimayo tukon bantile, “Moolomo doi yaku popookia sabab yaku lapamo beale tuuk doiya tukon pakuli sinakakon luwedoi kupau.” Maka Yakub ponikai tukon yana doi popokoo.
17Mian Bisa talimayomo Lea nasambeang, tukon yana tianan maka suunge ko pau kolimano. 18Lea bantile, “Ko Mian Bisa lapamo beena yaku tambo sabab yaku lapamo salakanggene Zilpa doi kulangkai,” tobikon doiya do napaudoo sinombuikon Isakhar. 19Lea tianan koidan tukon suunge kopau konoomo. 20Kona bantilano, “Ko Mian Bisa lapamo beekene doi yaku tambo momonondok tuuno. Dia budodoo daku langkai naikon anggayo yaku, sabab yaku lapamo mosuunggene nom kopau mala-malane,” tobikon doiya napaudoo sinombuikon Sebulon. 21Lapa doiya Lea mosuung meeng kopau moluko yana mosombuikene Dina.
22Maka Mian Bisa neneekemo naikon Rahel; Mian Bisa talimayomo kona sambeang tukon moolakene yana mosuung pau. 23Maka Rahel tianan tukon suunge meeng kopau malaneno. Rahel bantile, “Ko Mian Bisa lapamo akiyenggene kososibolii doi yaku. 24Boliisi Temeneno nabeekene doi yaku meeng kopau malaneno koidan.” Tobikon doiya napaudoo yana sombuikene Yusuf.
Yakub tukon Laban pobabaasi
25Sala lapa Rahel suun Yusuf, Yakub bantile doi Laban, “Sodiikenemo yaku mule doi kulipu. 26Sodiiyomo kutaus babayo daku boloki lua tukon kupau-pau. Yanila lapamo yaku laate doi kubalimangan doi Pinatama. Pinatama toiyo, yaku balimango kakabukuan tuuno.”
27Laban bantile doi yana, “Lengele looluk: Yaku malaat potoi baikon Temeneno lapamo balakaatiyo yaku sabab ikoo. 28Bantilemo tolongo bulaa komu kinabi.”
29Yakub timbiliyo, “Pinatama susuungo toiyomo yaku lapamo balimang kakabukuan tuuno, tukon Pinatama naiyayon tosuungi badaang sabab kupialaano. 30Akiyoon kulubat, Pinatama nabuat tinotooli kiyoon nabubula, bai diabudodoo Pinatama kaasamo. Temeneno lapamo balakaatiyo Pinatama sabab yaku. Dia budodoo laatemo kotempono yaku balimang tuuk kukaluarga susuunggu.”
31Laban bantile, “Jadi oila komo sio yaku beekene doi koo?”
Yakub timbiliyo, “Pinatama maunaaki mubeenggu oioila. Yaku naikon tataap pialayo Pinatama naiyayon, asal Pinatama satujuiyo tukon kukakabi nia: 32Pataikenemo yaku doi oloyo nia kuampakon doi tanga-tanga sasaibino Pinatama nambembe domba tambuuno, tukon mangala samba kodomba napau momopook, tukon koidan samba kombembe mongula mokambang kabai mobotik-botiki. Tongo doiya kotambo yaku mokabiyo. 33Oloyo doi bundu Pinatama ambang mutoiyo oila komo lapamo yaku lakukene komo bisa. Kalu kai Pinatama lubat tuuk palesayo daku tambo, tukon kitayo daano kombembe moaki nabotik-botiki kabai kambang, kai domba moaki namopook, Pinatama naikon toiyo baikon iyayonoo lapamo yaku ndikuke.”
34Laban timbiliyo, “Yase! Kita naikon lakukanggene oila komu usuloo!” 35Bai doi oloyodoo Laban alaase sasaibino kombembe langgilo mobotik-botiki kabai mokambang tukon sasaibino kombembe molukono mokambang, mobotik-botiki, kabai moano kona sesel moute; yana koidan alaase sasaibino kona domba momopook. Doibundu yana sumboliiyo kona pau-pau mouluse doiyayo-iyayonoo, 36maka yanila tauso tukon iyayon-iyayonoo dinodoonggon doi Yakub, kona kodoon tolu kooloyo koampakonan. Koiyayon piniala tambuuno labino luwedoi Laban koona Yakub pialayo.
37Doibundu Yakub mangala kayung hawal langa-langaano momanampal, kayung badam tukon kayung berangan, tukon kanite kosoobos luwedoi kulito tobikon teali kambang-kambang. 38Yana binggakene langa-langaanodoo doi mbembedoo tambuuno salaano, doi mbembe natampat monginuman lalomo, sabab iyayon-iyayonoo yase poubai doi tempo nalubatan monginum paisu. 39Jadi kalu mbembe-mbembedoo poubai doi kayung langa-langaanodoo salaano, kona pau botik-botiki kabai kambang kabai botik-botiki mopook.
40Doibundu Yakub mangala domba-domba maka yana posasalaanikene doi mbembe mobotik-botiki tukon mopook. Buno doiya kona kokubai namalaatan iyayon tambuuno susuungo tukon poalaasene doi Laban naiyayon tambuno.
41Kalu iyayon-iyayon mobukuan daano mopoubai, Yakub binggakene kayung langa-langaano mokinonitidoo doi yanila salaano, doi natampat monginuman lalomo. 42Bai kayung langa-langano doo aki nabinggakene doi iyayon-iyayon moaki nabukuan salaano. Sasaibino koiyayon momoute doo aki nabukuan doiyamo Laban koona, bai sasaibino koiyayon mopook, kambang tukon boti-botiki mobukuan doiyamo Yakub koona. 43Tukon buno doiya Yakub teali kaasa babasal. Yana motooli badaang kombembe domba, tambuuno, unta, keledai tambuno tukon ata-ata.
Currently Selected:
TEALIAN 30: LAIBGZ
Highlight
Share
Copy
Want to have your highlights saved across all your devices? Sign up or sign in
