TEALIAN 29
29
Yakub polong doi Laban nabonua
1Yakub banggadudukene kona ampakonan tukon taus doi lipu Kanaan taalikon doi tolopot. 2Sosinggot yana kitayo komeeng kobubung doi padang, tukon doi naloolanikonan nggonggolonggon kotolu koiyayon tambuuno mobiasa binee monginum idoo. Dobubungoo pokukupo batu mobabasal. 3Kalu sasaibino koiyayon tambuuno pototongimo doi tampatoo, kopototooli nggolinggene dobatudoo doi bibil, maka doiyayonoo tambuno binee monginum. Lapa doiya pototooli iyayon abali kukupikene dobubungoo.
4Maka Yakub masadai doi pototooli iyayon modaano idoo, “Eh tulano, komuyu nia luwedoi yaa?”
Yanila timbiliyo, “Luwedoi Haran.”
5Yakub masadai koidan, “Kai komuyu tingoniiyo Laban Nahor napau?”
Yanila timbiliyo, “Tingoniiyo.”
6Yakub sadaiyo koidan, “Bulaando kona ndondoong?”
Yanila timbiliyo, “Daano monondok kai. Kitayomo, ndaiya konapau moluko kosambuno Rahel. Yana lubat mobabayo kotamano naiyayon tambuuno.”
7Yakub bantile, “Oloyo daano momadialan tukon akiyon nalaate kotempono koiyayon tambuno nainusokonan doi tondok lalomo. Bulaando doiyayon-iyayonoo moaki pobeena monginum, maka posodiikene namakaan bulung koidan?”
8Yanila timbiliyo, “Ikami sodo moola beena monginum dodomba-dombadoo kalu sasaibino koiyayon tambuno pototongimo dimbaa tukon kobatu pokukupino lapamo ngginolinggon.”
9Daanoon Yakub mobasilingan tukon yanila, Rahel lubato tukon naiyayon tambuuno. 10Salataa Yakub kitayo Rahel mopolaing kona iyayon tambunodoo, Yakub tauso doi bubungoo, maka nggolinggene kobatu pokukupino doi bibil tukon beena monginum koiyayon tambunodoo. 11Doibundu yana umayo Rahel, yana kokiil sabab napoloongganano. 12Yana bantile doi Rahel, “Yaku Ribka napau tamamu utuso.”
Maka Rahel obulen mule dombalaa nabonua sulano nasalitaikene dolanggedoo doi tamano. 13Salataa Laban lengele kobilitano kaliangano Yakub, napinaanakoo, yana obulen sulano napososuung. Laban lebeke Yakub tukon umayo, maka babayo usok doi nabonua lalomo. Lapa Yakub salitaikene sasaibino kona ndondoong doi Laban, 14Laban bantile, “Takainomo bisa, ikoo puli mololani tukon yaku.”
Yakub dungol doi bonuadoo meeng kobituwon lalomo.
Yakub balimang doi Laban sulano nalaate Rahel tukon Lea
15Daano kooloyo meeng Laban bantile doi Yakub, “Aki nateali ikoo balimang doi yaku tukon akiyo kotambono, tolongo sabab ikoo kumontolutusan. Bulaa kotambono komu kabiyano?” 16Laban daano kona pau maluko lua; kolanggongo kosambuno Lea, tukon utuso pioto kosambuno Rahel. 17Lea komatano monondok, bai Rahel kobutongo monondok tukon duduso tambongan.
18Yakub yasemo doi Rahel, tobikon doiya yana timbiliyo doi Laban, “Yaku yase balimang pitu kotaun kalu Pinatama moolakene yaku pokila tukon Rahel.” 19Laban bantile, “Lobian monondok yaku beekene yana doikoo maka baimo doi mian bailon; jadi dungolo dimbaa.” 20Maka Yakub balimang pitu kotaun kona kalumbit sulano nalaate Rahel, tukon doi yana taun-taun molapa tolongo buno bubula kooloyo, sabab naiyasano boinedoo.
21Lapa doiya Yakub bantile doi Laban, “Pitumo kotaun komo lapa; moolakenemo yaku pokila tukon Pinatama napau.” 22Maka Laban kubaiyo kona lamean basowaanan tukon koloyo sasaibino komian doi kotadoo. 23Bai doi popokoo, bolikon Rahel, bai Lea komo Laban antekene doi Yakub, tukon Yakub pokoloi tukon yana. ( 24Laban beekene kona ata moluko kosambuno Zilpa doi Lea, sulano nateali naata.) 25Sodo modoa kooloyo Yakub toiyo baikon Lea kona kinila. Maka Yakub taus doi Laban tukon bantile, “Bulaando Pinatama kubaiyo yaku buno naiya? Bolikon kai yaku balimang sulano kulaate Rahel? Bulaando Pinatama mokokoliiyo yaku?”
26Laban timbiliyo, “Mololoi adat dimbaa, pau pioto aki namoola osowaan lolukoniyo kopau langgong. 27Totiiliyomo nalapa nalamean basoanan mopitu kooloyo, maka sodo yaku bekonggon Rahel, kalu ikoo yase balimang koidan pitu kotaun.”
28Yakub yase, tukon salataa lapa dolameanoo, Laban beekene doi yana Rahel teali naboloki. ( 29Laban beekene kona ata moluko kosambuno Bilha doi Rahel, sulano nateali naata.) 30Yakub pokoloi koidan, tukon Rahel, tukon yana lobian kona iyasano Rahel doi nayasano Lea. Doibundu yana balimang pitu kotaun koidan.
Yakub napau-pau
31Salataa Temeneno kitayo baikon Lea aki nainiyas buno Rahel, Temeneno loasanemo Lea namosuung pau, bai Rahel tataap aki namalaat pau. 32Lea tianan maka mosuung meeng kopau malaneno. Yana bantile, “Temeneno lapamo kitayo daku susaan, tukon diabudodoo daku langkai naikon yasemo yaku.” Maka sombuikene napaudoo Ruben. 33Lea tianan koidan maka suunge meeng kopau malaneno. Lea bantile, “Temeneno beekenemo doi yaku napau nia koidan sabab yana lengele baikon yaku aki nainiyas.” Maka dopaudoo yana sombuikene Simeon. 34Lea tianan koidan maka suunge meeng kopau malaneno. Yana bantile, “Dia budodoo daku langkai naikon seangemo tuuno yaku sabab yaku lapamo mosuung tolu kopau malaneno.” Maka nasombuikene napaudoo Lewi. 35Doibundu Lea tianan koidan tukon suunge meeng kopau malaneno. Kona bantilano, “Idan nia yaku naikon nggaale ko Temeneno.” Maka nasombuikene napaudoo Yehuda. Lapa doiya Lea akimo namosuung koidan.
Currently Selected:
TEALIAN 29: LAIBGZ
Highlight
Share
Copy
Want to have your highlights saved across all your devices? Sign up or sign in
