Marakusi 4

Ngkóráꞌ pándiriꞌ kana i iba pákáꞌna tampoꞌ

(Mat. 13:1-9; Luk. 8:4-8)

1Hangkani tempó, Iesu mepaturoꞌ wopiꞌi i wiwi rano Galilea. Handaꞌ ntepuꞌu tauna to lao i Iesu, álána mombegaeꞌ-gaeꞌmoheꞌ, onoꞌ miꞌi haneꞌi Ia lao mengkaheꞌ i duanga to i wongko uwai hai mehoda ionoꞌ. Hai tauna to handaꞌ meángkáꞌheꞌ i wiwi rano. 2Handaꞌ pákáꞌna to Napaturoꞌáheꞌ moliu ngkóráꞌ pándiriꞌ. Rápáꞌna, Nauliꞌ, 3“Nipehádingi! Ara hadua topohinoe to lao mohawuꞌ i hinoena, {agáiáná tampoꞌ i hinoena iti ionoꞌ miꞌi aha: ara to kedui, ara to matuꞌa, ara to kewatu pealeꞌ, hai ara woꞌo tampoꞌ to maruduꞌ}. 4Mewaliꞌ i pohawuꞌna iti, ara tinudaꞌ to manawoꞌ i tampoꞌ to matuꞌa láwiꞌ paka raporárái tauna. Haweꞌheꞌ tádáhi motilóꞌ tinudaꞌ iti duuꞌna upu. 5Ara woꞌo tinudaꞌ to manawoꞌ i tampoꞌ to kewatu pealeꞌ i wóiꞌna. Tinudaꞌ iti hawiáꞌ tueꞌ láwiꞌ mahábáꞌ tampoꞌna, 6agáiáná ane nahimbaꞌi alo, malau duuꞌna bangi, láwiꞌ tiꞌara kaladu kálándána. 7Ara woꞌo tinudaꞌ to manawoꞌ i lalu dui. Tinudaꞌ iti tueꞌ, agáiáná dui mopótóꞌ duuꞌna mate, onoꞌ miꞌi haneꞌi tiꞌara mowuaꞌ. 8Ara woꞌo tinudaꞌ to manawoꞌ i tampoꞌ to maruduꞌ. Maroꞌa katueꞌna. Kamahile-hileá duuꞌna mowuaꞌ. Ara to tálu puloꞌna kánina kahandaꞌna pewaliꞌna hangko i tinudaꞌna, ara to ini puloꞌna kánina, ara woꞌo to hangatu kánina hangko i tinudaꞌna.” 9Roo mopahaweꞌ ngkóráꞌ pándiriꞌ iti, Nahángáꞌámoheꞌ, “Maroꞌa ntepuꞌu ane ara tauna to mopailalu apa to nahádi.”

Tunggáiána Iesu mopakeꞌ ngkóráꞌ pándiriꞌ

(Mat. 13:10-17; Luk. 8:9-10)

10Roo onoꞌ, i tempóna Iesu haduduána, laomoheꞌ topeguruNa to hampuloꞌ hai rodua, hai topeuláꞌNa to ntániꞌna, mekuneꞌ i Hia, rauliꞌ, “Apa lempóna ngkóráꞌ pándiriꞌ to Nupahaweꞌ ininá?”

11Nauliꞌ Iesu, “Hangkoia, tewuniángi mani paturoꞌ kana i popárentána Pueꞌ Ala. Deꞌe-deꞌe naweꞌimokou Pueꞌ Ala pekiri bona niꞌisá lempóna paturoꞌ iti. Agáiáná ane tauna to tiꞌara meuláꞌ i Kódóꞌ, Kupaturoꞌheꞌ moliu ngkóráꞌ pándiriꞌ, 12bona tebukeki to teukiꞌ i lalu Sura Magasaꞌ node:

‘Kehapiꞌ raita miꞌi apa to Kubábehi,

agáiáná tiꞌara raisá lempóna.

Kehapiꞌ rahádi miꞌi paturoꞌKuꞌ,

agáiáná tiꞌara raisá tunggáiáNgkuꞌ,

bona tiꞌaraheꞌ mesuleꞌ i Pueꞌ Ala,

hai dósáraꞌ tiꞌara teámpungi.’ ” (Iesaia 6:9-10)

Iesu mopakanótó lempóna ngkóráꞌ pándiriꞌ kana i iba pákáꞌna tampoꞌ

(Mat. 13:18-23; Luk. 8:11-15)

13Roo onoꞌ, Iesu mohángáꞌáheꞌ, “Ane tiꞌara niꞌisá lempóna ngkóráꞌ pándiriꞌ to ininá, noumbá kaniꞌisána lempóna ngkóráꞌ pándiriꞌ to ntániꞌna? 14Topohawuꞌ iti, ia miꞌi to mopahaweꞌ ngkóráꞌna Pueꞌ Ala. 15Araheꞌ tauna to peisá rapándiriꞌ nodo iba pákáꞌna tampoꞌ iti. Araheꞌ to peisá rapándiriꞌ nodo tampoꞌ to matuꞌa. Mohádintoheꞌ ngkóráꞌna Pueꞌ Ala, agáiáná Datu Tokadake mopawuli laluraꞌ, álána tiꞌarapoheꞌ mopailalu Ngkóráꞌna Pueꞌ Ala to rahádi miꞌi iti.

16Araheꞌ woꞌo tauna to peisá rapándiriꞌ nodo tampoꞌ to kewatu pealeꞌ. Runguraꞌ mohádi ngkóráꞌna Pueꞌ Ala, liu-liu rapogóeꞌ. 17Agáiáná hampaiꞌ peá rapoinálái láwiꞌ tiꞌara maróhó pokálándána ngkóráꞌna Pueꞌ Ala i laluraꞌ, onoꞌ miꞌi haneꞌi tiꞌaraheꞌ tetidaꞌ. Ane rapopeahiahiꞌheꞌ ba rapamapári ánti pepoináláiraꞌ i ngkóráꞌna Pueꞌ, mosuliꞌheꞌ hangko i pepoináláiraꞌ.

18Araheꞌ woꞌo tauna to rapándiriꞌ nodo tampoꞌ to kedui. Rahádi ntepuꞌu ngkóráꞌna Pueꞌ hai raisá lempóna, 19agáiáná mampekiriheꞌ oaꞌ katueꞌraꞌ i duniáꞌ deꞌe, hai mampoinao peheꞌ morámpu párewá ngkáduniáꞌ. Upu-upu iti mopaꞌara peá katiꞌárána maróhó pepoináláiraꞌ, álána ngkóráꞌna Pueꞌ Ala tiꞌara piꞌi mobunduꞌ i lalu katueꞌraꞌ.

20Araheꞌ woꞌo tauna to rapándiriꞌ nodo tampoꞌ to maruduꞌ. Kamohádiraꞌ ngkóráꞌna Pueꞌ Ala, liu-liu ratarima. Rapailalu ntepuꞌu hai rapopobunduꞌ, álána ngkóráꞌna Pueꞌ Ala iti mowuaꞌ i lalu katueꞌraꞌ. Ara to tálu puloꞌna kánina kahandaꞌna hangko i tinudaꞌna, ara to ini puloꞌna kánina kahandaꞌna, ara woꞌo to hangatu kánina kahandaꞌna hangko i tinudaꞌna.”

Ngkóráꞌ pándiriꞌ kana i huluꞌ to rahumbáki

(Luk. 8:16-18)

21Molaluita wopiꞌi Iesu i tauna to handaꞌ, Nauliꞌ, “Ba ara tauna to motótó palita i lalu támbi haneꞌi nahumbáki kori ba nawoli i wóiꞌ kóiꞌ?#4:21 Iesu ia miꞌi pewangkaꞌ duniáꞌ, hai tiꞌara mani marue ina tongawaꞌ i hira apa to Natunggái. Hangaa-ngaa tiꞌara ara. Palita bateꞌna rawoli i kamapángkáꞌána bona mahingkaaꞌ, raita upu-upu tauna to i lalu támbi. 22Noꞌonoꞌ woꞌo upu-upuna paturoꞌKuꞌ, tiꞌara piꞌi ara to ina tewuniángi. Ina niꞌisá lempóna. 23Maroꞌa ntepuꞌu ane ara tauna to mopailalu apa to nahádi.”

24Nauliꞌ wopiꞌi Iesu, “Nipailalu apa to nihádi deꞌe, láwiꞌ ane nipoinao mohádi hai mampeuláꞌi ngkóráꞌna Pueꞌ iti, handaꞌ mani to ina napakanótóákou Pueꞌ Ala. 25Tauna to motarima hai mampoinálái ngkóráꞌna Pueꞌ Ala, ina tetámbái apa to raisá kana i ngkóráꞌna Pueꞌ iti. Agáiáná tauna to tiꞌaraheꞌ mampoinálái ngkóráꞌna Pueꞌ Ala, kehapiꞌ hantódiꞌ peá to raisá, bateꞌna tiꞌara mobunduꞌ láwiꞌ ina naꞌala huleꞌ Pueꞌ Ala.”

Popárentána Pueꞌ Ala rapándiriꞌ nodo katueꞌna tinudaꞌ

26Nauliꞌ Iesu, “Ane haweꞌ miꞌi popárentána Pueꞌ Ala i duniáꞌ, pewaliꞌna nodo ngkóráꞌ pándiriꞌ deꞌe: hadua tauna mantudaꞌ pare i hinoena. 27Maroꞌa mabaa ba káindi, maroꞌa i tempóna maturu ba i tempóna mearó, tinudaꞌ iti tueꞌ oaꞌ haweꞌ mahile. Agáiáná tiꞌara naisá topohinoe noumbá katueꞌna tinudaꞌna iti duuꞌna mahile. 28Rungu-runguna tampoꞌ iti mampopesupaꞌ káuna, haneꞌi taweꞌna. Hangko ionoꞌ, mowuaꞌ miꞌi, duuꞌna moꞌóntóꞌ. 29Ane mangka miꞌi, pueꞌna ina lao mampepare pare iti, láwiꞌ tempóna miꞌi.”#4:26-29 Moliu ngkóráꞌNa, Pueꞌ Ala mokióꞌ tauna mewaliꞌ taunáNa, kehapiꞌ tiꞌara taisá noumbá pewaliꞌna. Básá woꞌo 1 Korintu 3:5-7.

Popárentána Pueꞌ Ala rapándiriꞌ nodo lihu to marámbóꞌ ntepuꞌu

(Mat. 13:31-35; Luk. 13:18-19)

30Nauliꞌ Iesu, “Ane popárentána Pueꞌ Ala haweꞌ i duniáꞌ, noumbá pewaliꞌna? Popárentána Pueꞌ Ala peisá rapándiriꞌ nodo lihu to marámbóꞌ ntepuꞌu rápáꞌna nodo lihu duiꞌá.#4:30 nodo lihu to marámbóꞌ ntepuꞌu nodo lihu duiꞌá: Básá to teukiꞌ i wóiꞌ Matiu 13:31. 31Ara to mohawuꞌ lihu iti i wiwi hinoena. Lihu iti marámbóꞌ ntepuꞌu, melumbuꞌ kamarámbóꞌna hangko i upu-upu lihu to ara i duniáꞌ. 32Agáiáná ane rahawuka hai tueꞌi, ina melumbuꞌ kamapángkáꞌna hangko i rampaꞌ-rampaꞌ to ntániꞌna, láwiꞌ tueꞌ nodo hampóꞌá kau, duuꞌna mahile ntepuꞌu hai dáꞌána peisá rapohárái tádáhi hai rapebóungái.”#4:30-32 Lempóna ngkóráꞌ pándiriꞌ deꞌe rompákáꞌ: 1) noumbá Pueꞌ Ala mepárentá i laluraꞌ tauna. 2) noumbá Pueꞌ Ala mepárentá i duniáꞌ. Rungu-runguna, tiꞌara handaꞌ tauna to mepoinálái, agáiáná marue-rue tetámbái kahandaꞌraꞌ.

33Hai handaꞌ mani ngkóráꞌ pándiriꞌ to napakeꞌ Iesu mopahaweꞌ ngkóráꞌna Pueꞌ Ala i tauna to handaꞌ. Napaturoꞌheꞌ mouláꞌ pebukuáraꞌ molempónga. 34Tiꞌara ara to Napaturoꞌáheꞌ to tiꞌara moliu ngkóráꞌ pándiriꞌ. Agáiáná ane Ia perái hai topeguruNaheꞌ, hangko Napakanótóáraheꞌ upu-upu lempóna.

Iesu mampopengkaroo wui to rumihi

(Mat. 8:23-27; Luk. 8:22-25)

35I alo iti woꞌo, kalumbaꞌna, Nauliꞌ Iesu i topeguruNa, “Maimokou, laokeꞌ tándáꞌ i hambali rano Galilea.” 36Mewaliꞌ mengkaheꞌ mpuꞌumoheꞌ i duanga, haneꞌiheꞌ pohuꞌ mopálehi tauna to handaꞌ to i wiwi rano. Hai ara woꞌo duanga to ntániꞌna to meuláꞌ i hira.

37Tiꞌara marue hangko ionoꞌ, mampohidupaꞌáheꞌ wui to rumihi ntepuꞌu.#4:37 Rano Galilea biásá meangi, láwiꞌ wui haweꞌ hangko i buluꞌ to mantoleli. Duangaraꞌ narokaꞌ bálumbá to mahile, duuꞌna ina bukeꞌ miꞌi uwai. 38I tempó iti, Iesu letaꞌ i pehoda-hodaꞌá to tándáꞌ i wuntuna duanga, hai mopakeꞌ álónga to ara ionoꞌ. TopeguruNaheꞌ iti moruaꞌ Iesu, rauliꞌ, “Guru! Moapa riꞌi haneꞌi tiꞌarakeꞌ Nupotepe? Nupatodáhi pekeꞌ hurewuꞌ!”

39Kapearóna peá Iesu, liliu mokámbáróá#4:39 mokámbáróá: Laluita iti hibali hai laluita to napakeꞌ Iesu i kamokámbáróáNa setáꞌ. Básá Marakusi 1:25. wui hai bálumbá, Nauliꞌ, “Pengkaroo wui! Tindamokoꞌ bálumbá!” Mengkaroo mpuꞌu miꞌi wui, hai kásáliu rano iti tinda huleꞌ. 40Roo onoꞌ, Nahángáꞌáheꞌ topeguruNa, “Moaparakou haneꞌi malááꞌ?#4:40 Párentá to handaꞌ kánina teukiꞌ i Sura Magasaꞌ ia miꞌi “Ineeꞌkoꞌ malááꞌ.” Ane mopaisarekeꞌ katueꞌtaꞌ i Pueꞌ Ala, tiꞌarakeꞌ paraluu malááꞌ láwiꞌ Pueꞌ Ala to mokámpáikeꞌ. Mewaliꞌ peisákeꞌ woꞌo letaꞌ i katinda lalu. Básá Sura Petóiá 3:6-7; 4:9. Moapa riꞌi haneꞌi tiꞌara maniAꞌ nipoinálái?”

41Tingkáráꞌ ntepuꞌuheꞌ topeguruNa, haneꞌi mombekuneꞌheꞌ, “Heáná ripaꞌi tauna deꞌe? Mogalo riꞌi wui hai bálumbá mampeuláꞌi hawaꞌNa.”#4:41 Tunggáiána Marakusi, bona taisá kaꞌIesuna miꞌi Datu Topehómpóꞌ, Ánáꞌna Pueꞌ Ala. (Básá Marakusi 1:1.) Moliu tandaꞌ kuasaꞌ iti, Iesu mopatongawaꞌ kaꞌIana Pueꞌ Ala, láwiꞌ Pueꞌ Ala peá to makuasaꞌ i wui hai bálumbá. (Básá Sura Petóiá 65:8; 89:10; 93:3-4.)

Currently Selected:

Marakusi 4: NTBEP

Highlight

Copy