Marakusi 16

Iesu tueꞌ huleꞌ

(Mat. 28:1-10; Luk. 24:1-12; Ioh. 20:1-10)

1Liu miꞌi alo penómbáꞌá, Maria toMadalena, Maria inána Iakobu, hai Salome, laoheꞌ mohóló mina-mina to mawongi. Tunggáiáraꞌ, bona laoheꞌ mominaꞌ-minaꞌi wátámandoꞌna Iesu. 2Mewaliꞌ, mepulo-pulo i alo Minggu, i pembetona miꞌi alo, laoheꞌ i popatawuá. 3-4I tangaꞌ rárá molaluitamoheꞌ, rauliꞌ, “Heánákeꞌ to ina motulungi mogesuꞌ watu petuko babaꞌ popatawuá iti?” láwiꞌ watu iti matimi ntepuꞌu. Agáiáná kahaweꞌraꞌ i popatawuá, raita watu iti tegesuꞌ miꞌi. 5Pesuaꞌraꞌ i lalu popatawuá, moitaheꞌ hadua ánáꞌntomoane to mehoda tándáꞌ i kuáná, mewaruꞌ to bulá. Malááꞌ ntepuꞌuheꞌ towawine iti.

6Agáiáná nauliꞌ ánáꞌntomoane iti, “Ineeꞌkou malááꞌ! Kuisá to nipeliꞌ Ia miꞌi Iesu toNasare to rapakuꞌ i kau mombehape. Ia tiꞌara piꞌi ara ieneꞌ. Ia tueꞌ miꞌi huleꞌ! Nipeita karawoliáNa. 7Mesuleꞌmokou, nihángáꞌáheꞌ Peturuꞌ hai topeguruna Iesu to ntániꞌna node: Tueꞌ miꞌi huleꞌ Iesu. Ia ina moioru lao i tampoꞌ Galilea, hai ina nipohidupaꞌá ionoꞌ nodo to Nahángáꞌáꞌámokou ami.”#16:7 Básá Marakusi 14:28.

8Melangkaheꞌ towawine iti hangko i popatawuá. Wuliheꞌ apa to pewaliꞌ hai moridiꞌheꞌ. Ánti kamalááꞌraꞌ, tiꞌaraheꞌ sieruꞌ mopahaweꞌ bámbári iti i heáná peá.

[Towawineheꞌ iti laoheꞌ i Peturuꞌ hai rángána, hai mopahaweꞌ upu-upu to nahángáꞌáheꞌ ánáꞌntomoane iti ininá, agáiáná raparerembe peá. Roo onoꞌ, Iesu mohuoꞌmoheꞌ topeguruNa mopahaweꞌ Ngkóráꞌ Marasa i upu-upu tauna i humalele duniáꞌ. Bámbári to maroꞌa iti mopakanótóákeꞌ rárá molámbiꞌ katueꞌ to maroꞌa to tiꞌara mokahópóꞌá.]#16:8b Wátiꞌ iti tiꞌara teukiꞌ i upu-upu sura to sae ntepuꞌu.

Iesu mopatongawaꞌ wátáNa i Maria toMadalena hai i topeguruNa#16:9-20 Wátiꞌna ka-9 haweꞌ ka-20 tiꞌara teukiꞌ i upu-upu sura to sae ntepuꞌu.

(Mat. 28:9-10; Ioh. 20:11-18)

[ 9Kapearóna Iesu hangko i kapate i alo Minggu hungkuꞌ mabaa, rungu-runguna Ia mopatongawaꞌ wátáNa i Maria toMadalena. Maria iti to napakauriꞌ Iesu hangkoia i kanapesuaꞌina setáꞌ to pitu. 10-11Mewaliꞌ lao miꞌi Maria i topeuláꞌna Iesu, nahumbaheꞌ tangaꞌraꞌ teriaꞌ láwiꞌ masusa laluraꞌ. Nahángáꞌáheꞌ, “Tueꞌ miꞌi huleꞌ Pueꞌ! Kuita miꞌi ininá!” Agáiáná upu-upu to napolaluita Maria iti tiꞌara mpuꞌu rapoinálái.#16:10-11 Mouláꞌ toIahudiꞌ, posabikina towawine tiꞌara gaga mobunduꞌ. Rapoinálái woꞌo tauna ina rapatueꞌ huleꞌ i alo pobutusi i kahópóꞌána duniáꞌ peá (básá Iohane 11:24), mewaliꞌ tiꞌara mesuaꞌ i akala Iesu tueꞌ miꞌi huleꞌ, láwiꞌ tiꞌara mani haweꞌ kahópóꞌána duniáꞌ.

12Roo onoꞌ, Iesu mopatongawaꞌ wopiꞌi wátáNa hai rárá ntániꞌna i rodua topeuláꞌNa to tangaꞌraꞌ mesuleꞌ hangko i kótá Ierusale lao i wánuáraꞌ. 13I karaisána peá kaꞌIesuna, tauna to rodua iti liliuheꞌ mesuleꞌ huleꞌ lao i kótá Ierusale, mopahaweꞌ i topeuláꞌna Iesu to ntániꞌna apa to mewaliꞌ. Agáiáná hira woꞌo tiꞌara mepoinálái.

Iesu mopatongawaꞌ wátáNa i topeguruNaheꞌ

(Mat. 28:16-20; Luk. 24:36-49; Ioh. 20:19-23; Suro 1:6-8)

14Hangko ionoꞌ, Iesu mopatongawaꞌ mpuꞌu miꞌi wátáNa i topeguruNa to hampuloꞌ hai hadua tangaꞌraꞌ mandeꞌ. Nakámbáróáheꞌ láwiꞌ pepoináláiraꞌ makuraꞌ hai matuꞌa laluraꞌ. Tiꞌaraheꞌ mampoinálái laluitaraꞌ tauna to moita Iesu i katueꞌNa miꞌi huleꞌ. 15Upu onoꞌ, Nahángáꞌámoheꞌ, “Laomokou i humalele duniáꞌ, mopahaweꞌ Ngkóráꞌ Marasa i upu-upu tauna. 16Heáná peá to mepoinálái i Kódóꞌ hai rariu, ia ina tehómpóki hangko i huku dósá. Agáiáná heáná to tiꞌara mepoinálái, bateꞌna ina molámbiꞌ pehuku. 17Heáná peá tauna to mepoinálái, ina Kuweꞌiheꞌ kuasaꞌ mobábehi tandaꞌ kuasaꞌ to node: i lalu hangaꞌKuꞌ, hira ina mampopesuwuꞌheꞌ setáꞌ. Ina molaluitaheꞌ i lalu básá to tiꞌara raisá.#16:17 Ina molaluitaheꞌ i lalu básá to tiꞌara raisá: Iti to mewaliꞌ i Suro 2:4-11. 18Araheꞌ to ina motibaaꞌ lelótó, ba mainu rasu, agáiáná tiꞌaraheꞌ ina moapa. Ane mampekamaꞌheꞌ tauna to tiꞌara ralalu bona napakauriꞌheꞌ Pueꞌ Ala, bateꞌraꞌ mauriꞌ.”

Iesu mengkaoreꞌ lao i surugáꞌ

(Luk. 24:50-53; Suro 1:9-11)

19Karoona Pueꞌ Iesu mampolaluitaꞌá topeguruNaheꞌ, Ia mengkaoreꞌ lao i surugáꞌ. Ionoꞌ Ia mehoda tándáꞌ i kuánána Pueꞌ Ala. 20Hangko ionoꞌ, laomoheꞌ topeguruNa mopahaweꞌ Ngkóráꞌ Marasa iumbá-umbá peá. Pueꞌ mamporángáheꞌ. Naweꞌiheꞌ kuasaꞌ mobábehi tandaꞌ to metingkáráki bona tongawaꞌ katoꞌuna bámbári to raꞌánti.]

Currently Selected:

Marakusi 16: NTBEP

Highlight

Copy